¹ ಆ ಕಾಲುಮ್ಲ ಯೇಸು ಸಬ್ಬತ್ ದಿನುಮ್ಲ ಪೈರ್ಲು ಸೇನ್ಲುಲ ಪಾತ ವುಂಡ್ನಪ್ಪ್ಡುಯೇಸು ಶಿಷ್ಯುಲು ಆಕ್ಲಾಯಿ ತೆನೆಲ್ನಿ ಇರ್ಸ್ಕೊನಿ ತಿಂಟ ವುಂಡ್ರಿ . ² ಪರಿಸಾಯುಲು ದಾನ್ನಿ ಕನಿ - ಸೂಡಿ , ನೀ ಶಿಷ್ಯುಲು ಸಬ್ಬತ್ ದಿನುಮ್ಲ ಸೈನಾರ್ ಕೆಲ್ಸುಮ್ನಿ ಸೇಸ್ತಾರು ಅನಿ ಯೇಸುಕಿ ಸೊಪ್ಪ್ರಿ . ³ ಯೇಸು ವಾಳ್ಕಿ - ದಾವಿದುಡು ತಾನೂ ವಾಡ್ ಜೊತ್ಲ ವುಂಡ್ನೋಳು ಆಕ್ಲಾಯ್ನಪ್ದು ಏಮಿ ಸೇಸೆ ಅನೇದ್ನಿ ಮೀರು ಓದ್ಲೆದಾ . ⁴ ವಾಡು ದೇವುಡು ಆಲಯುಂ ನೋನ್ಕಿ ಪಾಯಿ ಯಾಜಕುಲು ಮಾತ್ರುಮೆ ಹೊರ್ತು ವಾಳಾವ್ನಿ ವಾಳ್ ಜೊತ್ಲ ವುಂಡೋಳಾವ್ನಿ ತಿನ್ಗುಡ್ದಾಯುಂಡಿನ ನೈವೆದ್ಯುಮು ರೊಟ್ಳುನಿ ತಿನೇ ಕದ . ⁵ ಇದ್ಕಾಕುನ್ನ ಸಬ್ಬತ್ ದಿನುಮ್ಲ ಯಾಜಕುಲು ದೇವುಡು ಆಲಯುಮ್ಲ ಸಬ್ಬತ್ ದಿನುಮ್ನಿ ಮಿಕ್ಕ ದಿನ್ಮುಲಾಕ ಸೇಸಿನ್ದಾಯಿನು ವಾಳು ತಪ್ಕಿ ಗುರಿಯಾಯೇಟ್ಲೆದು . ದೀನ್ನಿ ಮೀರು ಧರ್ಮಶಾಸ್ತ್ರುಮ್ಲ ಓದ್ಲೆದಾ ? ⁶ ಆಯ್ತೆ ಈನ ದೇವುಡು ಆಲಯುಮುಕಿಂತ ಹೆಕ್ವೋಡು ವುಂಡಾಡನಿ ಮೀಕಿ ಸೊಪ್ತಾನು . ⁷ ನಾಕಿ ಯಜ್ನುಮು ವದ್ದು , ಕರುಣೆನೆ ಕಾವಾಲ ಅನೆ ಅರ್ಥ್ಮುನಿ ಮೀರು ತಿಲ್ಸುಂಟೆ ನಿರಪರಾಧಿಲ್ನಿ ಅಪರಾಧಿಲು ಅನಿ ತೀರ್ಪು ಸೇಸ್ತವುನ್ಡ್ಲೆದು . ⁸ ಮನುಷ್ಯು ಕುಮಾರುಡು ಸಬ್ಬತ್ ದಿನುಮ್ಕಿ ಒಡೆಯುಡಾಯ್ನಾಡು ಅನಿ ಸೊಪ್ಪೇ . ⁹ ಯೇಸು ಆನಿಂಚ ಸಭಾಮಂದಿರ್ಮುಕಿ ಪಾಯ್ನಪ್ಡು ಆನ ಸೈಬತ್ನೋಡು ಒಕ್ಡು ವುಂಡೆ . ¹⁰ ಅಪ್ಡು ವಾಳು ವಾಡ್ ಮಿಂದ ತಪ್ನಿ ಮೊಪಾಲ ಅನಿ ವಾಡ್ನಿ - ಸಬ್ಬತ್ ದಿನುಮ್ಲ ಸ್ವಸ್ಥ್ಮು ಸೇಸೇದಿ ಸರಿನಾ ಅನಿ ಅಡುಗ್ರಿ . ¹¹ ಅಂದ್ಗು ವಾಡು - ಮೀಲಾ ಯೋಳ್ಕಾರ ಒಕ್ಕೇ ಓಕ್ ಗೊರ್ರ ವುಂಡಿ ಆದಿ ಸಬ್ಬತ್ ದಿನುಮ್ಲ ಕುಣಿ ನೋನ್ಕಿ ಪಡ್ತೆ ವಾಡು ದಾನ್ನಿ ಪಟ್ಕೋನಿ ಪೈನ್ಕಿ ಸೀಯ್ಕುನ್ನ ವುಂಟಾಡ ? ¹² ಗೋರ್ರ್ಕಿಂತ ಮನುಷ್ಯುಡು ಎಂತೋ ಹೆಕ್ವ . ದಾನ್ನಿಂಚ ಸಬ್ಬತ್ ದಿನುಮ್ಲ ಮಂಚಿ ಕೆಲ್ಸ್ಮು ಸೇಸೇದಿ ತಕ್ಮುದೆ ಸರಿ ಅನಿ ಉತ್ರುಮಿಚ್ಚಿ ಆ ಮನುಷ್ಯುಡ್ಕಿ - ¹³ ನೀ ಸೈ ಚಾಚು ಅನಿ ಸೊಪ್ಪೇ , ವಾಡು ಚಾಚೆ . ¹⁴ ಆದಿ ಸಂಪೂರ್ಣುಮಾಯಿ ವಾಸಿಯಾಯಿ ಇಂಕೊಕ್ಟಿ ಅಟ್ಟಾಯೇ . ಆಯ್ತೆ ಪರಿಸಾಯುಲು ಆಕ್ಟರ್ಕಿ ಪಾಯಿ ವೂಡ್ನಿ ಯಾವ್ ಉಪಾಯ್ಮಿಂಚ ಸೊಂಪ್ದಾಮು ಅನಿ ವಾಡ್ಕಿ ವಿರೋದ್ಮಾಯಿ ಆಲೋಚ್ನುಮು ಸೇಸ್ಕೊನ್ರಿ . ¹⁵ ಯೇಸು ದಾನ್ನಿ ತಿಲ್ಸಿ ಆನಿಂಚ ಹೊರ್ಟಿಪಾಯ್ರಿ . ¹⁶ ಅನೇಕುಲು ಯೇಸು ಎನ್ಕ ಪಾಯ್ರಿ . ಯೇಸು ವಾಳನ್ದ್ರುನಿ ಸ್ವಸ್ಥ್ಮು ಸೇಸಿ ತಾನು ಇಟ್ಟೋಡನಿ ಯೋಳ್ಕು ಪ್ರಕಟಿಯ್ಗುಡ್ದನಿ ವಾಳ್ಕಿ ಖಂಡಿತ್ಮಾಯಿ ಸೊಪ್ಪೇ . ¹⁷ ಇಟ್ಟ ಯೆಶಾಯುಡನೆ ಪ್ರವಾದಿ ಮುಖಾಂತ್ರುಮು ಸೊಪ್ಪಿಚ್ಚಿನ ಮಾಟ ನೆರ್ವೇರೆ , ಅದೇಮಂಟೆ - ¹⁸ ಇಗೋ ನಾ ಸೇವಕುಡು , ವೂಡ್ನಿ ನಾನು ಆರ್ಬಿಚ್ಕೊನ್ನಾನು , ವೂಡು ನಾಕಿ ಇಷ್ಟುಡು , ನಾ ಪ್ರಾಣ್ಮು ಪ್ರಿಯುಡು . ವೂಡ್ಳ ನಾ ಆತ್ಮುಮ್ನಿ ವುಂಡ್ಬಿಸ್ತ , ವೂಡು ಅನ್ಯ ಜನಲ್ಕು ನ್ಯಾಯ್ಮು ವಿದಿನಿ ಸಾರ್ತಾಡು . ¹⁹ ವೂಡು ಜಗ್ಲುಮು ಆಡೆಟ್ಲೆ , ಬೀದಿಲ್ಲ ವೂಡ್ ಧ್ವನಿ ಯೋಳ್ಕು ಇನೆಟ್ಲೇದು . ²⁰ ಜಜ್ಜಿನ ದಂಟ್ನಿ ಇರ್ಸೇಯ್ಕುನ್ನಾನು ಆರಿಪಾತವುಂಡಿನ ದೀಪುಮ್ನಿ ನಂದಿಯ್ಕುನ್ನಾನು ನ್ಯಾಯ್ಮುನಿ ದಿಗ್ವಿಜಯುಮ್ಕಾಯಿನು ಅಂಪಿಸ್ತಾಡು . ²¹ ಅನ್ಯಜನಲು ವೂಡ್ ಪೇರ್ನಿ ಇನಿ ನಿರೀಕ್ಷಇಂಚ ವುಂಟಾರು . ²² ದೈಮು ಪಟ್ಟಿ ಗುಡ್ಡೋಡು ಮೂಗುಡು ಆಯಿನ ಒಕ್ಕುಡ್ನಿ ಯೇಸು ದೆಗ್ರುಕಿ ತೋಡ್ಕೊನೋಚ್ರಿ , ಯೇಸು ವಾಡ್ನಿ ಸ್ವಸ್ಥ್ಮು ಸೇಸೆಕಿ ಆ ಮೂಗುಡ್ಕಿ ನೋರು ಕಂಡ್ಳು ರೊಂಡು ವಚ್ಚೆ . ²³ ದಾನ್ಕಿ ಜನಲಂದ್ರು ಬೆರ್ಗಾಯಿ - ವೂಡು ದಾವಿದುಡುಕುಮಾರುಡೇಮಿ ಅನಿ ಮಾಟ್ಲಾಡ್ತಾ ವುಂಡ್ರಿ . ²⁴ ಆಯ್ತೆ ಪರಿಸಾಯ್ಲು ದಾನ್ನಿ ಇನಿ - ವೂಡು ದೈಮುಲು ಒಡೆಯುಡು ಆಯಿನ ಬೆಲ್ಜೆಬೂಲುಡು ಸಹಾಯ್ಮಿಂಚ ದೈಮ್ಲುನಿ ಇಡ್ಬಿಸ್ತಾಡೆ ಹೊರ್ತು ಬೇರ ರೀತಿಯಿಂಚ ಇಡ್ಬಿಚ್ಚೆಟ್ಲೆ ಅನ್ರಿ . ²⁵ ಯೇಸು ವಾಳ್ ಆಲೋಚ್ನುಮುಲ್ನಿ ತಿಳ್ಚ್ಕೋನಿ ವಾಳ್ಕಿ ಸೊಪ್ಪಿಂದೆಮಂಟೆ - ಯಾವ್ ರಾಜ್ಯುಮಾಯ್ತೆನು ತನ್ಲ ಭೇಧ್ಮು ಪುಟ್ತೆ ಪಾಡಾಯ್ಪಾತಾದಿ , ತನ್ಲ ಭೇಧ್ಮು ಪುಟ್ಟಿನ ಯಾವ್ ಪಟ್ನುಮಾಯ್ತೆನು ಇಂಟಾಯ್ತೆನು ನಿಲ್ಪಡೆಟ್ಲೆ. ²⁶ ದಾನ್ಲಾಕ್ನೆ ಸೈತಾನುಡು ಸೈತಾನುಡ್ನಿ ತೊಂಬ್ರುಬಿಸ್ತೆ ತನ್ಲ ಭೇಧ್ಮು ಪುಟ್ಟಿಚ್ಕೊನಟ್ಗಾಯೆ . ²⁷ ಅಟ್ಟಾಯ್ತೆ ವಾಡ್ ರಾಜ್ಯುಮು ಎಟ್ಟ ಉಳ್ಸ್ತಾದಿ ? ನಾನು ಬೆಲ್ಜೆಬೂಲುಡು ಬಲ್ಮಿಂಚ ದೈಮ್ಲುನಿ ಇಡ್ಬಿಚ್ಚೆದಾಯ್ತೆ ಮೀವೊಳು ಯೋಳ್ ಬಲ್ಮಿಂಚ ಇಡ್ಬಿಸ್ತಾರು ? ದಾನ್ನಿಂಚ ವಾಳೆ ಮೀಕಿ ನ್ಯಾಯ್ಮು ತೀರ್ಬಿಚ್ಚೋಳಾಯ್ತಾರು. ²⁸ ನಾನು ದೇವುಡು ಆತ್ಮುಮು ಬಲ್ಮಿಂಚಾನೆ ದೈಮ್ಲುನಿ ಇಡ್ಬಿಚ್ಚೆದಾಯ್ತೆ ದೇವುಡು ರಾಜ್ಯುಮು ಮೀ ದೆಗ್ರುಕಿ ವಚ್ನೆ . ²⁹ ಇದ್ಕಾಕುನ್ನ ಒಕ್ಡು ಮೊದ್ಲು ಬಲಿಷ್ಟುಡ್ನಿ ಕಟ್ಟಿ ಏಯ್ಕುನ್ನ ಆ ಬಲಿಷ್ಟುಡು ಇನ್ಟ್ನಿ ಹೊಕ್ಕಿ ವಾಡ್ ಸೊತ್ನಿ ಸುಲ್ಕೊನೇದಿ ಎಟ್ಟ ? ಕಟ್ಟಿ ಏಸಿನ್ಮಿಂದ ವಾಡ್ ಇನ್ಟ್ನಿ ಸುಲ್ಕೋನೋಡು . ³⁰ ನಾ ಪಕ್ಷುಮು ಪಟ್ನೋಡು ನಾಕಿ ವಿರೋಧಿ , ನಾ ಜೊತ್ಲ ಒಕ್ಟಿಗೂಡಿಯ್ನೋಡು ಚದ್ರಿಚ್ಚೋಡಾಯ್ತಾಡು. ³¹ ದಾನ್ ಕಾರ್ಣ್ಮಿಂಚ ಮೀಕಿ ಸೊಪ್ತಾನು , ಮನುಷ್ಯುಲು ಸೇಸೆ ಪ್ರತಿಯೋಕ್ಟಿ ಪಾಪಂಕಿ ದೂಷ್ನೆಕು ಕ್ಷಮಾಪಣ್ಮು ವುನ್ಟಾಯ್ತಾದಿ , ಆಯ್ತೆ ಪವಿತ್ರಾತ್ಮುಮು ದೂಷ್ನೆಕಿ ಕ್ಷಮಾಪಣ್ಮು ಲೇದು . ³² ಯೋವ್ದಾಯ್ತೆನು ಮನುಷ್ಯು ಕುಮಾರುಡ್ಕಿ ವಿರೋಧ್ಮಾಯಿ ಮಾಟ್ಲಾಡ್ತೆ ಆದಿ ವಾಡ್ಕಿ ಕ್ಷಮಿಚ್ಚೇಕಿ ಆಯ್ತಾದಿ , ಪವಿತ್ರಾತ್ಮುಕಿ ವಿರೋಧ್ಮಾಯಿ ಮಾಟ್ಲಾಡ್ತೆ ವಾಡ್ಕಿ ಇಹುಮ್ಲಾವ್ನಿ ಪರುಮ್ಲಾವ್ನಿ ಕ್ಷಮಿಚ್ಚೇಕಿಪಡೆಟ್ಲೆ . ³³ ಮಾನು ಮಂಚಿದಿ ಅಂಟೆ ದಾನ್ ಫಲ್ಮು ಮಂಚಿದಿ ಅನಂಡ್ರಿ . ಮಾನು ಉಳ್ಕು ಅಂಟೆ ದಾನ್ ಫಲ್ಮು ಹುಳ್ಕು ಅನಂಡ್ರಿ . ³⁴ ಪಲ್ಮಿಂಚಾನೆ ಮಾನ್ ಗುಣ್ಮು ಗೊತ್ತಾಯ್ತಾದಿ .ಸರ್ಪುಮುಜಾತಿಯೋಳಾ , ಮೀರು ಶೆಡ್ದೋಲಾಯುoಡೆದಾಯಿ ಮಂಚಿ ಮಾಟ್ಲುನಿ ಆಡೆದಾನ್ಕಿ ಮೀಲಾ ಎಟ್ಟಾಯ್ತಾದಿ ? ಹ್ರುದಯುಮ್ಲ ನಿನ್ದುಂಡೆದೇ ನೋರ್ಲಾ ವಚ್ಚೇದಿ . ³⁵ ಮನ್ಚೋಡು ತನ್ ಮಂಚಿ ಬೊಕ್ಕಸ್ಮು ನೋನಿಂಚ ಮಂಚಿ ವಸ್ತುಲ್ನಿ ಸೀಸ್ತಾಡು , ಶೆಡ್ದೋಡು ಶೆಡ್ಡೆ ಬೊಕ್ಕಸ್ಮು ನೋನಿಂಚ ಶೆಡ್ಡೆ ವಸ್ತುಲ್ನಿ ಸೀಸ್ತಾಡು . ³⁶ ಇದ್ಕಾಕುನ್ನ ನಾನು ಮೀಕಿ ಸೋಪ್ಪೇದಿ ಎಮಂಟೆ ಮನುಷ್ಯುಲು ಊರ್ಕೆ ಆಡೆ ಪ್ರತಿಯೋಕ್ಟಿ ಮಾಟಿನ ವಿಷಯ್ಮಾಯಿ ನ್ಯಾಯ್ಮು ವಿಚಾರ್ಣ್ಮು ದಿನುಮ್ಲ ಉತ್ರುಮು ಇಯ್ಯಾಲ . ³⁷ ನೀ ಮಾಟ್ಲಿಂಚಾನೆ ನೀತಿವಂತುಡನಿ ತೀರ್ಪು ಹೊಂದ್ತಾವು , ನೀ ಮಾಟಿಂಚಾನೆ ಅಪರಾಧಿ ಅನಿ ಹೊಂದ್ತಾವು ಅನೆ . ³⁸ ಅಪ್ಡು ಶಾಸ್ತ್ರಿಲ್ಲಾನು ಪರಿಸಾಯುರ್ಲಾನು ಕೆಲುವ್ಲು - ಬೋಧಕುಡಾ , ನೀಯಿಂಚಾಯೆ ಓಕ್ ಕಾರ್ಯುಮುನಿ ಸೂಡಲನಿ ಮಾಕಿ ಅಪೇಕ್ಷುಮು ವುಂಡಾದಿ ಅನಿ ವಾಡ್ನಿ ಅಡ್ಗೆ ವಾಡು ವಾಳ್ಕಿ ಉತ್ರುಮು ಇಚ್ಚಿಂದೆಮಂಟೆ - ³⁹ ವ್ಯಭಿಚಾರ್ಮುಲಾಕವುಂಡೆ ಈ ಶೆಡ್ಡೆ ಸಂತತ್ಮು ಸೂಚಕ್ಮು ಕಾರ್ಯುಮ್ನಿ ಸೂಡಲನಿ ಅಪೇಕ್ಷಿಸ್ತಾದಿ .ಆಯ್ತೆ ಯೋನುಡು ಅನೆ ಪ್ರವಾದಿಲ ಆಯಿನ ಸೂಚಕ್ಮು ಕಾರ್ಯುಮೆ ಹೊರ್ತು ಬೇರ ಯಾವ್ಡಿ ದೀನ್ಕಿ ಸಿಕ್ಕೆಟ್ಲೆದು . ⁴⁰ ಅಂಟೆ ಯೋನುಡು ಎಟ್ಟ ಮೂಡು ದಿನ್ಮು ಮಾಟಲ ಪದ್ನ ಪೆದ್ದ ಶಾಪ ಕೊಡುಪ್ನೋನ ವುಂಡ್ನೋ , ಅಟ್ಟೆ ಮನುಷ್ಯು ಕುಮಾರುಡು ಮೂಡು ದಿನ್ಮು ಮಾಟಲ ಪದ್ನ ಭೂಗರ್ಭುಮುನೋನ ವುಂಟಾಡು . ⁴¹ ನ್ಯಾಯ್ಮು ವಿಚಾರ್ಣುಮುಲ ನಿನೆವೆ ಅನೆ ಪಟ್ನುಮೊಳು ಈ ಸಂತತಿಯೋಳ್ನೋನಿಂಚ ನಿಲ್ಪಡಿ ವೂಳ್ನಿ ಅಪರಾಧಿಲು ಅನಿ ಸೊಪ್ತಾರು , ವಾಳು ಯೋನುಡು ಸಾರಿನ ವಾಕ್ಯುಮ್ನಿ ಇನಿ ದೇವುಡು ತೊಟ್ಗಿ ತಿರಿಕೊನ್ರಿ , ಆಯ್ತೆ ಈನ ಯೋನುಡುಕಿಂತಾನು ಹೆಕ್ವೋಡು ವುಂಡಾಡು . ⁴² ದಕ್ಷಿಣ್ಮು ದೇಶುಮಿನ ರಾಣಿ ನ್ಯಾಯ್ಮುವಿಚಾರಣ್ಮುಲ ಈ ಸಂತತಿಯೋಳ್ ಜೊತ್ಲ ಲೇಸಿನಿಲ್ಪಡಿ ವೂಳ್ನಿ ಅಪರಾಧಿಲನಿ ಸೊಪ್ತಾದಿ , ಆದಿ ಸೋಲೋಮೋನುಡ ಜ್ನಾನ್ಮುನಿ ತಿಳ್ಚ್ಕೊನೆದಾಂಕಿ ಭೂಮಿಲ ಕಟ್ಟಕೊನೆಯಿoಚ ವಚ್ಚೆ , ಆಯ್ತೆ ಈನ ಸೋಲೋಮೊನುಡು ಕಿಂತಾನು ಹೆಕ್ವೋಡು ವುನ್ದಾಡು . ⁴³ ದೈಮು ಮನುಷ್ಯುಡ್ನಿ ಇಡ್ಸಿ ಪಾಯಿನ ಮಿಂದ ವಿಶ್ರಾಂತಿನಿ ಹುಡುಕ್ತ ನೂಳ್ ಲೇನಿನ ಸ್ಥಳ್ಮುಲ ತಿರ್ಗಾಡ್ತಾದಿ . ⁴⁴ ವಿಶ್ರಾಂತ್ಮು ಸಿಕ್ಲೇನಿನ ಕಾರ್ಣುಮಿಂಚ ಆದಿ - ನಾನು ಇಡ್ಸಿ ವಚ್ಚಿನ ನಾ ಇಂಟ್ಕಿ ತಿರ್ಗಿ ಪಾತಾನು ಅನ್ಕೋನಿ ವಚ್ಚಿ ಆ ಇಲ್ಲು ಒಕ್ಕುಲು ಲೇಂದಿ ಊಕಿ ಅಲಂಕರಿಚ್ಚುಂಡೇದಿ ಆಯುಂಡೆದ್ನಿ ಕನಿ ಪಾಯಿ ತನ್ಕಿಂತ ಶೆಡ್ದೇವಿಆಯಿನ ಬೇರೆ ಯೋಡು ದೈಮ್ಲುನಿ ವಾಳ್ ಜೊತ್ಲನೆ ತೋಡ್ಕೋನಿ ವಚ್ಚೇದಿ ⁴⁵ . ಅವಿ ನೋನ್ಕಿಹೊಕ್ಕಿ ಆನ ವಾಸ್ಮು ಸೇಸ್ತಾವಿ . ಅಪ್ಡು ಆ ಮನುಷ್ಯುಡು ಅಂತ್ಯುಮು ಸ್ಥಿತಿ ಮೊದ್ಲಿಕಿಂತ ಶೆಡ್ದೆದಾಯ್ತಾದಿ . ದೀನ್ಲಾಕ್ನೆ ಈ ಶೆಡ್ಡೆ ಸಂತತಿಕಿ ಅಯ್ತಾದಿ ಅನೆ . ⁴⁶ ವಾಡು ಜನಲು ಗುಂಪು ಜೊತ್ಲ ಇಂಕ ಮಾಟ್ಲಾಡ್ತಾ ವುನ್ನಪ್ದು ವಾಡ್ ತಲ್ಲಿ ತೊಮ್ಮುಳ್ಳು ವಾಡ್ನಿ ಮಾಟ್ಲಾಡಿಯಾಲನಿ ಆಕ್ಟಾರ ನಿಲ್ಪಡುಂಡ್ರಿ . ⁴⁷ ಅಪ್ಡು ಒಕ್ಡು - ಇಗೋ , ನೀ ತಲ್ಲಿ ನೀ ಸಹೋದುರ್ಲು ನಿನ್ನೀ ಮಾಟ್ಲಾಡಿಯಾಲನಿ ಆಕ್ಟಾರ ನಿಲ್ಪಡುಂಟಾರು ಅನೆ . ⁴⁸ ದಾನ್ಕಿ ವಾಡು ಆ ಮಾಟ ಸೊಪ್ನೋಡ್ಕಿ - ನಾಕಿ ತಲ್ಲಿ ಯೋಳು ? ⁴⁹ ನಾಕಿ ಸಹೋದುರ್ಲು ಯೋಳು ? ಅನಿ ಸೊಪ್ಪಿ , ಶಿಷ್ಯುಲು ತೊಟ್ಗಿ ಸೈ ಸೂಪಿ - ಇಗೋ ನಾ ತಲ್ಲಿ , ನಾ ಸಹೋದರುಲು . ⁵⁰ ಪರ್ಲೋಕ್ಮುಲ ವುಂಡೆ ನಾ ತಂಡ್ರಿ ಚಿತ್ಮುಲಾಕ ನಡ್ಸೋಡೆ ನಾಕಿ ತೊಂಬ್ದು ಶೆಲ್ಲ ತಲ್ಲಿ ಆವಾಲ ಅನೆ .