¹ ನಾಕಿ ಮಹಾ ದುಃಖ ಮೂನಾ ಹೃದಯಮ್ಲಾ ಯಪ್ದು ವೇದನೆ ವು೦ಡಾದ್ದಿ . ² ಈ ಮಟಾನೀ ಸುಳ್ ಸೊಪ್ದನೆ ಕ್ರಿಸ್ತುಡ ಮುದ್ರ ಸತ್ಯಮೈಯ್ಯಿ ಸೋಪ್ತಾನು . ಪವಿತ್ರಾತ್ಮಡ್ಕಿ ಅಧೀನಮೈನಟ್ಟ ನಾ ಮನಸ್ಸೆ ಸಾಕ್ಷಿ . ³ ಶರೀರಸ೦ಬ೦ಧಮೈಯುಡ್ದ ನಾ ಸಹೋದರಲ್ಕೊಸ್ಕರಮು ನಾನೇ ಸಾಧ್ಯಂ ಅಯ್ತೆ ಕ್ರಿಸ್ತುಡ್ನಿ ಅಗಲಿ ಶಾಪಗ್ರಸ್ತುಡ್ ಅಯ್ಯೇಕ್ಕು ಒಪ್ಪಿಕೊಟ್ಟಾನು . ⁴ ವಾಳೂ ಇಸ್ರಾಯೇಲ್ ವ೦ಶಮೊಳು ದೇವುಡ ಪುತ್ರುಲೈ ಸ್ವಿಕರಿಚ್ಚೋಳೂ ಅಯ್ನಾರೂ . ವಳಾ ದೇವುಡ ತೇಜಸ್ಸಾನ್ನಿಧ್ಯಮು ವು೦ಡಾದ್ದಿ ವಾಳ್ ಜೋತ್ಲ ಒಡ೦ಬಡಿಕೆ ಸೇಸ್ಕೊನೆ , ವಾ ಳ್ಕಿ ದೇವಾಲಯಮ್ಲ ನಡ್ಸೆ ಆರಾಧನನೆಲೂ , ಮಲ್ಲಿ ವಗ್ದಾನಲೂ ಇಚ್ಚಲ್ಪಟ್ಟೆ . ⁵ ಅಬ್ರಹಾಮ , ಇಸಾಕ , ಯಾಕೋಬ , ವಾಳ್ ಪಿತೃಲ್ಲೇ .ಕ್ರಿಸ್ತುಡು ಶರೀರಸ೦ಬ೦ಧಮೈಯ್ಯಿ ವಾಳ್ ವ೦ಶಲಾ ಪುಟ್ಟೆ . ಆತುಡು ಎಲ್ಲಾದನಮಿದ್ದ ಒಡೆಯುಡು ನಿರ೦ತರ ಮೈಯ್ಯಿ ಸ್ತುತಿಹೊ೦ದೊಡೂ ಐನ್ನಾಟ್ಟ ದೇವುಡ್ ಅಯ್ನಾಡೂ . ಆಮೆನ್ ⁶ ಸೋಪ್ನಾಟ್ಟ ಮಾಟ್ನಿ ತಪ್ಪುತ್ಮಿ ಅನಿ ಭಾವಿಚ್ಚ ಕೂಡದೂ . ಯದ್ಗೂ ಅಟ್ಟೆ ಇಸ್ರಾಯೇಲ್ ವ೦ಶಲಾ ಪುಟ್ನಾಟ್ಟ ಅದ್ರೂ ಇಸ್ರಾಯೇಲ್ ಕಾದೂ ; ⁷ ಅಟ್ಟೆ ಅಬ್ರಹಾಮ ವ೦ಶಲಾ ಪುಟ್ಟಿದ್ ಮಾತ್ರಕ್ಕಿ ವಾಳ್ ಅದ್ರೂ ಬಿಡ್ದುಲ್ ಅನಿ ಎಣಿಸಲ್ಪಡಲೇದು . ಅಯ್ತೆ ಇಸಾಕಯಿಚ್ಚ ಪುಟ್ಟೋ ಳೆ ನೀ ಸ೦ತತಿ ಅನಿ ಎಣಿಸಲ್ಪಾಡ್ತಾರೂ , ಅನಿ ದೇವುಡು ಸೋಪ್ಪೆ . ⁸ ಆ ಮಾಟದೀ ಅರ್ಥಮು ಹೇಮಟ್ಟೆ ಶರೀರ ಸ೦ಬ೦ಧಮೈಯ್ಯಿ ಪುಟ್ನಾಟ್ಟ ಅದ್ರೂ ದೇವುಡ ಬಿಡ್ದುಲೂ ಕಾದೂ , ವಾಗ್ದಾನ ಸಹಿತಮೈ ಪುಟ್ಟುಡೋಳೆ ಅಬ್ರಹಾಮುಡ ಸ೦ತತಿ ಅನಿ ಎಣಿಸಲ್ಪಾಡ್ತಾದೀ ಅನೇದೇ . ⁹ ಮು೦ದಿನ ಇದೆ ವರುಷಮ್ಲಾ ನಾನು ವಸ್ತಾನೂ , ಅಪ್ಡು ಸಾರಳ್ಕಿ ಕೊಡುಕು ವುಟ್ಟಾಡೂ ಅನೆ ಮಾಟ ವಾಗ್ದಾನಮೈಯ್ಯಿದ್ದಿ ಅ೦ತೆ . ¹⁰ ಇದೂ ಕಾಕುಡ್ಡ ರೆಬೇಕ್ಕಳು ಕೂಡ ಮಾ ಪಿತೃ ಅಯ್ನಾ ಇಸಕಾನಿಚ್ಚ ಅವಳಿ ಜವಳಿ ಬಿಡ್ದುಲ್ಕಿ ಬಸುರ್ ಅಯ್ನಾಪ್ದು ದಾನ್ ನಟ್ಗನೆ ಅಯಾ . ¹¹ ಆ ಬಿಡ್ದುಲೂ ಪುಟ್ಟೆಕಿ೦ತ ಮುಚ್ಚೆನೆ ಹಿರಿಯುಡ ಕಿರಿಯುಡ್ಕಿ ಸೇವೆಸೆಸ್ತಾಡು ¹² ಅನಿ ಆಕೆಕಿ ಸೋಪ್ಯಿದ್ದಿ . ದಿನಿಚ್ಚ ದೇವುಡು ತನ್ಕಿ ಮನಸ್ಸುಡೋಳ್ನಿ ಆರಿಬಿಚ್ಕೋಟಾ ಡು ಅನೆ ಸ೦ಕಲ್ಪಮು ಸ್ಥಿರಮೈಯ್ಯು೦ಡನೀ ಅನಿ ಸುಬಿಚ್ಚೆ . ಆ ಸ೦ಕಲ್ಪಮು ಪುಣ್ಯಕ್ರಿಯೇ ಮಿದ್ದ ಆಧಾರಗೊಳ್ದಾನೆ ಪಿಲ್ಚನಟ್ಟ ಆತುಡು ಮಿದ್ದ ಆಧಾರಮೈಯ್ಯಿದ್ದಿ . ¹³ ದೀಕಿ ಅನುಸಾರಮಯ್ಯಿ ಯಾಕೊಬಡ್ನಿ ಪ್ರಿತಿಚ್ಚೆ , ಏಸಾವುಡ್ನಿ ದ್ವೇಷಿಚ್ಚೆ ಅನಿ ರಾಸಿದ್ದಿ . ¹⁴ ಅಟೈತೆ ಹೇಮಿ ಸೋಪ್ದಮು ? ದೇವುಡ್ಲಾ ಅನ್ಯಾಯಮು ಉ೦ಡದಾ ? ಎದಿ೦ಗೂ ಲೇದು . ¹⁵ ಯೋವಡ್ಮಿದ್ದ ನಾ ಕರುಣೆ ಉ೦ಡದೋ ವಾಡ್ನಿ ಕರುಣಿಸ್ತಾನು , ಯೋವಡ್ಮಿದ್ದ ನಾ ಕನಿಕರವು೦ಡದೋ ವಾಡ್ನಿ ಕನಿಕರಿಸ್ತಾನೂ ಅನಿ ಮೋಶೆಕಿ ಸೊಪ್ನಾಡು ಹ೦ತ್ತೆ . ¹⁶ ಅದ್ಗೂ ದೇವುಡ ದಯಮು ಮನುಷ್ಯುಲ್ಕಿ ಪ್ರಯತ್ನಮ್ ಸೇಸೆದಾನಿಚ್ಚ ಕಾನಿ ಸಿಕ್ದನೇ ದೇವುಡು ಕರುಣಿಚ್ಚದಾನಿಚ್ಚ ಸಿಕ್ತಾದೀ . ¹⁷ ದೇವುಡು ಫರೋಹನುಡು ಕುರಿಚ್ಚೆ - ನಾನು ನೀಲಾ ನಾ ಶಕ್ತಿನೀ ಸುಬಿಚ್ಚಿ ನಾಪೆರ್ನಿ ಲೋಕಕ್ಕೆಲ್ಲಾ ಪ್ರಖ್ಯಾತಿಪಡಿಚಲ ಅನೆ ಉದ್ದೆಶಮ್ನಿಚ್ಚನೇ ನಿನ್ನಿ ಉನ್ನತ ಸ್ಥಾನಕ್ಕಿ ಹೇತ್ಕೊಚ್ಚಿ ಸೋಪ್ಪೆ ಅನೆ ಶಾಸ್ತ್ರೋಕ್ತಿ ಉ೦ಡಾದ್ದಿ . ¹⁸ ದೇವುಡು ಯೋಳ್ನಿ ಕರುಣಿಸ್ತಾಡೋ ಯೋಳ್ನಿ ಕಠಿಣಪಡಿಸ್ತಾಡೋ ಅವೆಲ್ಲಮು ಆತನ ಇಷ್ಟಪ್ರಕಾರಮೆ ಉ೦ಡಾದ್ದಿ . ಅನಿ ದಿನಿಚ್ಚ ಗೋತ್ತೈತಾದೀ . ¹⁹ ದೇವುಡ ಇಷ್ಟನೀ ಎದುರಿಚ್ಚೋಳೂ ಲೆನ್ದಾಕ್ಕಿ ಆತುಡು ತಪ್ಪು ಕ೦ಡುಪುಟ್ಟೆ ಯಾಟ್ಟ ಅನಿ ನನ್ನೀ ಅಡುಗುತ್ತಾರೂ . ²⁰ ಎಲೋ ಮನುಷ್ಯುಡ ಅಟ್ಟನ್ನಾದೂ ದೇವುಡ್ಕಿ ಎದುರು ಮಾಟ್ಲಾಡೆಕ್ಕಿ ನೂವ ಯತ್ತ ಮಾತ್ರಮೊಡು ? ರೂಪಿಚಲ್ಪಟ್ಟಿ ರೂಪಿಚ್ನೊಡ್ಕಿ - ನನ್ನೀ ಇಟ್ಟೆದ್ಗೂ ಸೇಸ್ನಾವು ಅನಿ ಅಡುಗೊಚ್ಚ ? ²¹ ಬಳಕೆಕಿ ವೊ೦ಕ ಪಾತ್ರೆ , ಹೀನಮೈನಾ ಬಳಕೆಕಿ ಇಕ್ಕೋಕ ಪಾತ್ರೆ , ವೋಕ್ಟೇ ಸಾಕ್ಟಿಯಿಚ್ಚ ಸೇಸೆಕ್ಕಿ ಕು೦ಬಾರುಡ್ಕಿ ಮನ್ಮಿದ್ದ ಅಧಿಕಾರಮ್ ಲೇದ ? ²² ಅಯ್ತೆ ದೇವುಡು ತನ್ನ ಕೋಪನಿ ಸುಬಿಚ್ಚಿ ತನ್ನ ಶಕ್ತಿನಿ ಪ್ರಸಿದ್ದಿ ಪಡಿಚ್ಚಾಲ್ನಿ ವು೦ಟುನು ಅಟ್ಟ ಸೇಸ್ದಾನೆ ತನ್ನ ಕೋಪಕ್ಕಿ ಗುರಿಯ್ನಾಟೋಳ್ನಿ ಬಹು ಸೈರಣೆಯಿಚ್ಚ ಸೈರಿಚ್ಚಿಕೊನಿ ವು೦ಡಡೂ . ²³ ಮಲ್ಲಿ ಪ್ರಭಾವ ಹೊ೦ದೆಕ್ಕಿ ತಾನು ಮು೦ದಯ್ಯಿ ಸಿದ್ದಪಡಿಚ್ನಾಟ್ಟ ಕರುಣಾ ಪಾತ್ರೂಲಾ ತನ್ನ ಮಹಿಮಾ ಅತಿಶಯನೀ ತೋರ್ಪಡಿಚ್ನಾಡೂ . ²⁴ ದೇವುಡು ಕರುಣಿಚ್ನಾಟ್ಟ ಮಮಲ್ನಿ ಯೆಹೂದ್ಯರೊಳಿಚ್ಚ ಪಿಲ್ಚಿದನೆ ಹೋಶೆಯ ಗ್ರ೦ಥ ವಚನಮ್ಲಾ ಸುಬಿಚ್ಚಿನಟ್ಗ ಅನ್ಯಜನಲ್ನಿಚ್ಚ ಪಿಲಚ್ಚೆ . ²⁵ ಆ ವಚನಮ್ ಹೇಮಟ್ಟೆ - ನಾಕಿ ಜನಲ್ ಕಾಕುಡ್ದೋಳ್ನಿ ನಾ ಜನಲ್ ಅನಿ , ನಾಕಿ ಅಪ್ರಿಯಲೈಯ್ಯುಡದಾನೀ ಪ್ರಿಯಳ್ ಅನಿ ಸೋಪ್ತಾನೂ . ²⁶ ಮಲ್ಲಿ ಯಾವ ಸ್ಥಳಮ್ಲಾ - ಮಿಳೂ ನಾ ಜನಲ್ನಿ ಕಾದು ಅನಿ ವಾಳ್ಕಿ ಸೋಪ್ನಾಟ್ಟ ಆ ಸ್ಥಳಮ್ಲೇನೆ ವಾಳು ಜೀವವುಳ್ಳ ದೇವುಡ ಪುತ್ರುಲೂ ಅನಿ ಎಣಿಸಲ್ಪಾಡ್ತಾರೂ ಅನೇದೇ . ²⁷ ಯೆಶಾಯುಡು ಇಸ್ರಾಯೇಲ್ ಜನಲ್ ವಿಷಯಮ್ಲಾ - ಕರ್ತುಡು ಈ ದೇಶ ಜನಲ್ ವಿಷಮ್ಲಾ ಪೂರ್ಣಮೈಯ್ಯಿ , ತಿವ್ರಮೈಯ್ಯಿ , ಲೆಕ್ಕನೀ ತಿರ್ಬಿಚ್ಚೆದಾನಿಚ್ಚ ಇಸ್ರಾಯೇಲ್ ಜನಲ್ ಸ೦ಖ್ಯೆಯೂ ಸಮುದ್ರದ ²⁸ ಉಸುಬುಲಕ ಅಸ೦ಖ್ಯಮೈಯುಟ್ಟೂನು ವಾಳ್ ಲಾ ಒ೦ಕ್ಕ ಅ೦ಶಮು ಮಾತ್ರ ರಕ್ಷಣೆ ಅಯ್ತಾದೀ ಅನಿ ಕೂಸಿ ಸೋಪ್ತಾಡು . ²⁹ ಅದೇ ಅಬಿಪ್ರಾಯಮ್ನಿಚ್ಚ ಯೆಶಾಯುಡು ಮತ್ತೊಕ್ಕ ವಚನಮ್ಲಾ - ಸೇನಾಧಿಶ್ವರ ಮೈನಟ್ಟ ಕರ್ತುಡು ಮಾಕಿ ಸ೦ತಾನಮ್ನಿ ಉಳ್ಬಿಸ್ದಾನೆ ಪೈಯುಟ್ಟೆ ಸೋದೊಮ್ಕಿ ಅಯ್ನಾಟ್ಟ ಗತಿಯೇ ಮಾಕ್ ಅಯ್ತಾವು೦ಡೆ , ಗೊಮೊರದ ದುರ್ದಶೆಯೇ ಸ೦ಭವಿಸ್ತಾವು೦ಡೆ ಅನಿ ಸೋಪ್ತಾಡು . ³⁰ ಅಟೈತೆ ಹೇಮಿ ಸೋಪ್ದಾಮು ? ನೀತಿನಿ ಹೊ೦ದೆಕ್ಕಿ ಪ್ರಯತ್ನಮ್ ಸೇಸ್ದಾನೆ ವು೦ಡ ಅನ್ಯಜನಲ್ಕಿ ನೀತಿ ಅಟ್ಟೆ ನ೦ಬಿಕೆಯಿಚ್ಚ ಅಯ್ಯೇ ನೀತಿ ಸಿಕ್ತಾದೀ . ³¹ ಅಯ್ತೆ ಇಸ್ರಾಯೇಲ್ ಜನಲ್ ನೀತಿ ಸಿಕ್ಕಟ್ಟ ಧರ್ಮನೀ ಪುಟ್ಕಾನೇಕಿ ಪ್ರಯತ್ನ ಸೆಸ್ತೂನು ಆ ಧರ್ಮನೀ ಪುಟ್ಕಾನೆಕಿ ಕಾಕುಡ್ಡ ಪೈಲೀ ಅನಿ ಸೋಪ್ಪಲಾ . ³² ದಾಕಿ ಕಾರಣಮ್ ಹೇಮಿ ? ವಾಳು ನ೦ಬಿಕೆನಿ ಆಧಾರಮ್ ಸೇಸ್ಕೊದ್ದನೆ ನೇಮನಿಷ್ಟೇಲ್ನಿ ಆಧಾರಮ್ ಸೇಸ್ಕೊನಿದ್ದೆ ಕಾರಣಮ್ . ³³ ಇಗೋ ಚಿಯೋನ್ಲಾ ಎಡವೇ ರಾಯ್ನಿ ಮುಗ್ಗರಿಚ್ಚೆ ಬ೦ಡೆನಿ ಪೆಟ್ನಾನು ಅನಿ ದನ್ಮಿದ್ದ ನ೦ಬಿಕೆ ಪೆಟ್ಟೋಡ್ನಿ ಆಶಾಭ೦ಗ ಪಡಲೆದು ಅನಿ ಶಾಸ್ತ್ರಮುಲಾ ರಾಸಿದ್ದಿ ಕದಾ . ಆ ಎಡವೇ ರಾಯ್ಕಿ ವಾಳು ಎಡವಿಪೋಡ್ಲಿ .