¹ ನಾನು ಮೀ ಹತ್ರನ್ಕಿ ಹಮ್ಪೆ ಮಾ ಸಹೋದರಿ ಐನಾ ಪೋಯಿಬೆನೀ ಪ್ರೀತಿಯಿಂಚ್ಚ ಅಂಗೀಕರಿಚಂಡಿ . ಆಕೆ ಕೆಂಕ್ರೆಯ ಪಟ್ಟಣಮ್ಲಾ ವುಂಡ ಸಭೆಯ ಸೇವಕಳ್ ಅಯ್ಯಿಂದಿ . ² ಆಕೆನೀ ಕರ್ತುಡು ಶಿಷ್ಯಳ್ ಅನಿ ದೇವಜನಲ್ಕಿ ಸರಿ ಅಯ್ಯಿ ಸೇರಿಬಿಚ್ಕೊನೀ ಸಹಾಯಮು ಯಾವ ವಿಷಯಮ್ಲಾನು ಬೇಕೈಯುಟ್ನೂ ಸಹಾಯಮ್ನಿ ಸೇಯಂಡ್ರಿ . ಆಕೆ ನಾಕಿ ಅನೇಕಲ್ಕಿ ಸಹಾಯಮ್ ಸೇಸ್ಸಿಂದಿ . ³ ಕ್ರಿಸ್ತ ಯೇಸುವಿನ ಸೇವೆಲ್ಲಾ ನಾ ಜೊತೆಕೆಲಸಮೈನಾ ಪ್ರಿಸ್ಕಳಿಕಿ ಅಕ್ವಿಲನಿಕಿ ನಾ ವಂದನೆಲ್ನಿ ಸೋಪಂಡ್ರಿ . ⁴ ವಾಳು ನಾ ಪ್ರಾಣ ಸಂರಕ್ಷಣೆಕೈಯ್ಯಿ ವಾಳ್ ಪ್ರಾಣಲ್ನೀ ಅಪಾಯನ್ಕಿ ಗುರಿಸೇಸ್ಲಿ . ನಾನು ಮಾತ್ರ ಕಾದು ಅನ್ಯಜನಲ ಸಭೆಯೋಳ್ ಅಂದ್ರೂ ವಾಳ್ ಉಪಕಾರನೀ ಸ್ಮರಿಸ್ತಾರು . ⁵ ವಾಳ್ ಇ೦ಟ್ಲಾ ಕೂಡೆ ಸಭೇಕಿ ಸಹ ನಾ ವಂದನೆಲ್ನಿ ಸೋಪಂಡ್ರಿ . ಆಸ್ಯ ಸೀಮೆಲಾ ಕ್ರಿಸ್ತುಡ್ಕಿ ಪ್ರಥಮಫಲ ಐನ್ನಟ್ಟ ನಾ ಪ್ರಿಯುಡ್ ಐನಾ ಎಪೈನೆತನುಡ್ಕಿ ವಂದನೆ . ⁶ ಮಿಕ್ಕೊಸ್ಕರಮು ಬಹು ಶ್ರಮೆನಿ ಪಟ್ನಾ೦ಟ ಮರಿಹಳ್ಕಿ ವಂದನೆ . ⁷ ನಾ ಸ್ವಜನಲೂ ಜೊತೆ ಸೇರೆಯೋಳು ಐನ್ನಾಟ್ಟ ಅಂದ್ರೋನಿಕನುಡ್ಕಿ ಯೂನ್ಯನಿಕಿ ವಂದನೆ ; ವಾಳು ಅಪೋಸ್ತರುಲ್ಲಾ ಪ್ರಸಿದ್ದಮೈನಾಳು , ಮಲ್ಲಿ ನಾಕಿಂತ ಮುಂದ್ರ ಕ್ರಿಸ್ತುಡ್ನಿ ನ೦ಬೊಳ್ ಅಯ್ಲಿ . ⁸ ಕರ್ತುಡ್ಲಾ ನಾ ಪ್ರಿಯಮೈನಾ ಅ೦ಪ್ಲಿಯಾತುಡ್ಕಿ ವಂದನೆ . ಸೇವೆಲಾ ಮಾ ಜೊತ್ಲಾ ಕೆಲಸೋಡ್ ಐನ್ನಾಟ್ಟ ಉರ್ಬಾನನಿಕಿ ನಾ ಪ್ರಿಯಮೈನಾ ಸ್ತಾಖುನಿಕಿ ವಂದನೆಲು . ⁹ ಕ್ರಿಸ್ತುಡ ಸೇವೆಲಾ ಪರಿಶೋಧಿತುಡು ಐನ್ನಾಟ್ಟ ಅಪೆಲ್ಲನುಡ್ಕಿ ವಂದನೆ . ಅರಿಸ್ತೊಬೂಲನ ಇನ್ಟೂಲ್ಕಿ ವಂದನೆಲು . ¹⁰ ನಾ ಸ್ವಜನದವೊಡ್ ಹೆರೋಡಿಯೋನುಡ್ಕಿ ವಂದನೆ . ¹¹ ನಾರ್ಕಿಸ್ಸನುಡ ಇನ್ಟೋಳ್ ಲೋಗ ಕ್ರಿಸ್ತುಡ್ನಿ ನ೦ಬ್ನಾಟ್ಟೋಳ್ಕಿ ವಂದನೆ . ¹² ಕರ್ತುಡ ಸೇವೆಲ್ಲಾ ಪ್ರಯಾಸಮ್ ಪಟ್ನಾಟ್ಟ ತ್ರುಫೈನಳಿಕಿ ತ್ರುಪೋಸಳಿಕಿ ವಂದನೆಲು . ಕರ್ತುಡ ಸೇವೆಲ್ಲಾ ಬಹಳಮೈಯ್ಯಿ ಪ್ರಯಾಸ ಪಟ್ನಾಟ್ಟ ಪ್ರಿಯ ಪೆರ್ಸೀಸಳಿಕಿ ವಂದನೆ . ¹³ ಕರ್ತುಡ ಭಕ್ತುಲ್ಲಾ ಪ್ರಸಿದ್ದಮೈನಾ ರೂಫನಿಕು ನಾ ತಲ್ಲಿಲಕ ವುಡ್ನಾಟ್ಟ ವಾಡ್ ತಲ್ಲಿಕೂ ವಂದನೆಲು . ¹⁴ ಪ್ಲೆಗೊನನಿಕೂ ಹೆರ್ಮೆಯನಿಕೂ ಪತ್ರೋಬನಿಕೂ ಹೆರ್ಮಾನನಿಕೂ ವಾಳ್ ಜೊತ್ಲಾ ಸಹೋದರಿಲ್ಕೂ ವಂದನೆಲೂ . ¹⁵ ಫಿಲೊಲೊಗನಿಕೂ ಯೂಲ್ಯಳಿಕೂ ನೇರ್ಯನಿಕೂ ವಾಡ್ ಸೇಲ್ಲಾಕ್ಕು ಒಲು೦ಪನಿಕೂ ವುಳ್ ಜೊತ್ಲಾ ವುಂಡ ದೇವಜನಲ್ ಅಂದ್ರುಕ್ಕು ವಂದನೆಲೂ . ¹⁶ ಪವಿತ್ರಮೈನಾ ಮುದ್ದುಪೆಟ್ಟಿ ಒಕ್ಕನೋಕ್ಕಳು ವಂದಿಚಂಡಿ . ಕ್ರಿಸ್ತುಡ ಸಭೇಲ್ಕೆಲ್ಲಾ ಮಿಮ್ಮಲ್ನಿ ವಂದಿಸ್ತಾಮು . ¹⁷ ಸಹೋದುರುಲೇ ಮೀಳು ಹೊದ್ನಾಟ್ಟ ಉಪದೇಶಕಿ ವಿರುದ್ದಮೈಯ್ಯಿ ಭೇಧಲ್ನಿ ವಿಘ್ನಲ್ನಿ ಮಿಮಲ್ಲಾ ಉಂಟುಸೇಸೊಳ್ನಿ ಗುರುತುಪಟ್ಟಿ ವಾಳ್ನಿ ಇಸ್ಪೆಟ್ಟಿ ತೊಲಗಿ ಪೊಂಡ್ರಿ ಅನಿ ಮಿಮ್ಮಲ್ನಿ ಅಡಿಕ್ಕೊಂಟಾನು . ¹⁸ ಅಟ್ಟೋಳು ಮಾ ಕರ್ತುಡ್ ಐನಾ ಕ್ರಿಸ್ತುಡ ಸೇವೇನ್ನಿ ಸೇಸ್ದಾನೆ ವಾಳ್ ಕೊಡಪು ಸೇವೆನೀ ಸೇಸ್ಸೋಳ್ ಅಯ್ಯಿ ನಯ ನುಡಿಲ್ನಿಚ್ಚ ಹೊಗಳಿಕೆ ಮಾಟ್ನಿಚ್ಚನು ನಿಷ್ಕಪಟಿಲ ಹೃದಯಲ್ನಿ ಮೋಸಂಸೇಸ್ತಾರು . ¹⁹ ಮೀ ವಿಧೇಯತ್ವಮು ಅಂದ್ರುಕ್ಕು ಪ್ರಸಿದ್ದಮ್ ಅಯ್ಯುಂಡೆದಾನಿಚ್ಚ ದಿನ್ನಿ ರಸ್ನಾನು . ಮೀ ವಿಷಯಮ್ಲಾ ಆನಂದಮ್ ಪಡ್ತಾನು . ಮೀಳು ಮೊಚ್ಚಿದಾನ್ ವಿಷಯಮ್ಲಾ ಬುದ್ದಿವಂತ್ಲು ಸೇಡ್ಡೆತನಮ್ ವಿಷಯಮ್ಲಾ ಕಳ೦ಕಲೆನೋಳು ಅಯ್ಯುಂಡಾಲನೀ ಅಪೆಕ್ಷಿಸ್ತಾನೂ . ²⁰ ಶಾಂತಿದಾಯಕುಡು ಐನಾ ದೇವುಡು ಶೀಘ್ರಮಯ್ಯಿ ಸೈತಾನುಡ್ನಿ ಮೀ ಕಾಲು ದುಗುನ ಹೇಸ್ಸಿ ತೋಕ್ಕೆಬಿಸ್ತಾಡು . ಮಾ ಕರ್ತುಡ್ ಐನಾ ಯೇಸು ಕ್ರಿಸ್ತುಡ ಕೃಪೆ ಮೀ ಜೊತ್ಲಾವುಂಡ್ನಿ . ²¹ ಜೊತ್ಲಾ ಕೇಲಸಮ್ಮೋಡ್ ಐನ್ನಾಟ್ಟ ತಿಮೊಥಿಯುಡು ನಾ ಸ್ವಜನಲ್ ಐನಾ ಲೂಕ್ಯಡೂ ಯಾಸೋನನುಡೂ ಸೋಸಿಪತ್ರಡೂ ಮೀಕಿ ವಂದಲೆಲ್ನಿ ಸೋಪ್ತಾರು . ²² ಈ ಪತ್ರಿಕೆನಿ ರಸ್ನಾಟ್ಟ ತೆರ್ತ್ಯ ಅನೆ ನಾನು ಮಿಮ್ಮಲ್ನಿ ಕರ್ತುಡ್ಲಾ ವಂದಿಸ್ತಾನು . ²³ ನಾಕೀ ಸಮಸ್ತ ಸಭೆಕ್ಕಿ ಅತಿಥಿಸತ್ಕಾರನೀ ಸೇಸ್ತಾವುಂಡ್ನಟ್ಟ ಗಾಯುಡು ಮಿಮ್ಮಲ್ನಿ ವಂದಿಸ್ತಾಡು . ಈ ಪಟ್ಟಣ ಖಜಾನೆಕಿ ಮೇಲ್ವಿಚಾರಕುಡ್ ಐನ್ನಾಟ್ಟ ²⁴ ಎರಸ್ತುಡೂ ಸಹೋದುರುಡ್ ಐನಾ ಕ್ವರ್ತುಡೂ ಮೀಕಿ ವಂದನೆಲ್ನಿ ಸೋಪ್ತಾರು . ²⁵ ಅನಾದಿ ಅಯ್ಯಿ ಗುಪ್ತಮೈನಾಟ್ಟ ಮರ್ಮಮು ಇಪ್ಡು ಪ್ರಕಾಶಂಕಿ ವಚ್ಚಿ ನಿತ್ಯಮೈನಾಟ್ಟ ದೇವುಡ ಅಪ್ಪಣೆ ಪ್ರಕಾರ೦ಗ ಪ್ರವಾದಿಲ್ ಗ್ರ೦ಥಲ್ ಮುಲಕಮೈಯ್ಯಿ ಅನ್ಯಜನಲ್ ಅಂದ್ರುಕು ನಂಬಿಕೆ ಅನೆ ವಿಧೇಯತ್ವನ್ನಿ ಉಂಟುಸೇಸ್ಸೇಕೊಸ್ಕರಮೈಯ್ಯಿ ²⁶ ತಿಲಿಚಲ್ಪಟಿ೦ದೀ . ಪ್ರಾಕಾಶನ್ಕಿ ವಚ್ಚುಂಡ ಈ ಮರ್ಮನ್ಕಿ ಅನುಸಾರ ಅಂಟ್ಟೆ ಯೇಸು ಕ್ರಿಸ್ತುಡ ವಿಷಯಮೈನಾಟ್ಟ ನಾನು ಸಾರ್ತೆವುಡ್ನಾಟ್ಟ , ²⁷ ಸುವಾರ್ತೆಕಿ ಅನುಸಾರಮಯ್ಯಿ ಮಿಮ್ಮಲ್ನಿ ಸ್ಥಿರಪಡಿಚ್ಚೆಕಿ ಶಕ್ತಮೈನಟ್ಟ ಜ್ಞಾನ ನಿಧಿ ಐನಾ ವಕ್ಕೆ ದೇವುಡ್ಕಿ ಯೇಸು ಕ್ರಿಸ್ತುಡ್ ಮೂಲಕ೦ಗ ಯುಗಯುಗಾ೦ತರಮ್ಲಾನು ಸ್ತೋತ್ರಮ್ ಕಾನಿ . ಆಮೆನ್ .