¹ ಪ್ರತಿ ಮನುಷ್ಯಡು ವಾಡ್ ಮಿಂದ್ದ ವುಂಡ ಅಧಿಕಾರಿಲ್ಕಿ ಅಧೀನಮ್ ಅಯ್ಯುಡ್ನಿ . ಯದ್ಗು ಅಂಟ್ಟೆ ದೇವುಡ್ನಿಚ್ಚ ಹೊರತು ಒಕ್ಕುಳ್ಕೂ ಅಧಿಕಾರಮ್ ವುಂಡೆಲೇದು ; ವುಂಡ ಅಧಿಕಾರಿಲೂ ದೇವುಡ್ನಿಚ್ಚ ನೇಮಿಚ್ಚಲ್ ಪಟ್ಟುಡೋಳು . ² ದಾನಿ೦ಚ್ಚ ಅಧಿಕಾರಕ್ಕಿ ಎದುರು ಪಡೋಡು ದೇವುಡ ನೇಮಕಮ್ನಿ ಎದುರಿಸ್ತಾಡು ; ಎದುರಿಚ್ಚೊಳು ಶಿಕ್ಷೆಕೀ ಒಳಗೈತಾರು . ³ ಸೇಡ್ಡ ಕೆಲಸಮ್ನಿ ಸೇಸೋಡ್ಕಿ ಅಧಿಪತಿಯಿಂಚ್ಚ ಭಯಮ್ ವು೦ಟಾದೇ ಹೊರತು ಮೊಂಚ್ಚಿ ಕೆಲಸಮ್ನಿ ಸೇಸೋಡ್ಕಿ ಭಯಮ್ ಹೇಮಿ ವುಂಡಲೇದು . ನೂವ ಅಧಿಕಾರಿಕಿ ಭಯಮ್ ಪಡ್ದನೆ ವುಂಡಾಲನೀ ಅಪೆಕ್ಷಿಸ್ತಾವಾ ? ಮೊಂಚ್ಚಿದಾನ್ನಿ ಸೇಸ್ಸಿ ಅಪ್ಡು ಆ ಅಧಿಕಾರಿಯಿಂಚ್ಚ ನೀಕಿ ಹೊಗಳಿಕೆ ಉಂಟೈತಾದೀ . ⁴ ವಾಡು ನೀ ಹಿತಕೊಸ್ಕರ ದೇವುಡ ಸೇವಕುಡು ಐನಾಡುಕದಾ . ಅಯ್ತೆ ನೂವ ಸೇಡ್ಡದಾನ್ನಿ ಸೇಸ್ತೆ ಭಯಮ್ ಪಡಲಾ ; ವಾಡು ಉರ್ಕ ಸೇತ್ಲಾ ಕತ್ತಿನೀ ಪುಟ್ಕಲೆದು ; ವಾಡು ದೇವುಡ ಸೇವಕುಡು ಅಯ್ಯುಂಡ್ಡಿ ಸೇಡ್ಡದಾನ್ನಿ ನಡಿಪಿಚ್ಚೋಡ್ಕಿ ದೇವುಡ ದಂಡನೆನೀ ವಿಧಿಸ್ತಾಡು . ⁵ ಅದ್ಗೂ ದಂಡನೆ ಐತಾದೀ ಅನಿ ಮಾತ್ರ ಮನಸ್ಸಿಕಿ ನ್ಯಾಯಮೈಯ್ಯಿ ಸುಬಿಚ್ಚೆದಾನಿಚ್ಚನೂ ವಾಡ್ಕಿ ಅಧೀನ ಅಯ್ಯೇದೀ ಅವಶ್ಯಮು . ⁶ ಕಾರಣಮ್ನಿಚ್ಚನೇ ಮೀಳು ಕಂದಾಯಮ್ನಿ ಕೂಡ ಇಸ್ತಾರು . ಯದ್ಗು ಅಂಟ್ಟೆ ಕಂದಾಯಮ್ ಎತ್ತೊಳು ದೇವುಡ ಉದ್ಯೋಗಿಲ್ ಅಯ್ಯುಂಡ್ಡಿ ಆ ಕೆಲಸಮ್ಲಾನೇ ನಿರತಲ್ ಐನಾರು . ⁷ ವಾಳ್ ವಾಳ್ಕಿ ಸಲ್ಲಿಚ್ಚೆದಾನ್ನಿ ಸಲ್ಲಿಚಂಡಿ ; ಯೋಳ್ಕಿ ಕಂದಾಯಮೋ ವಾಳ್ಕಿ ಕಂದಾಯಮು , ಯೋಳ್ಕಿ ಸುಂಕಮೋ ವಾಳ್ಕಿ ಸುಂಕಮು , ಯೋಳ್ಕಿ ಭಯಮೋ ವಾಳ್ಕಿ ಭಯಮು , ಯೋಳ್ಕಿ ಮರ್ಯಾದೆಯೋ ವಾಳ್ಕಿ ಮರ್ಯಾದೆಯು ಸಲ್ಲಿಚಂಡಿ . ⁸ ಒಕ್ಕನೋಕ್ಕಲ್ನಿ ಪ್ರಿತಿಚಲಾ ಅನೆ ಋಣಮ್ ಇಸ್ಪೆಟ್ಟಿ ಬೇರೇ ಯಾವ ಸಾಲಮು ಮೀಕಿ ವುಂಡಗೂಡ್ದು . ಮತ್ತೊಕಲ್ನಿ ಪ್ರೀತಿಚ್ಚೋಡು ಧರ್ಮಪ್ರಮಾಣನೀ ಎಲ್ಲಾ ನೇರವೆರಿಚ್ನಾಡು . ⁹ ಯಂಟ್ಟ ಅಂಟ್ಟೆ ವ್ಯಭಿಚಾರಾಮ್ ಸೇಯ್ಗುಡ್ದು , ನರಹತ್ಯಮ್ ಸೇಯ್ಗುಡ್ದು , ದೊಂಗತನಮ್ ಸೇಯ್ಗುಡ್ದು , ಬೇರೆಯೋಳ್ ಸೋತ್ತುನೀ ಆಶಿಚ್ಗುಡ್ದು , ಈ ಮೊದಲೈನಾ ಎಲ್ಲಾ ಕಟ್ಟಳೆಳು - ನೀ ನೆರೆಯೋಡ್ನಿ ನೀಲಕನೇ ಪ್ರೀತಿಚಾಲ ಅನೆ ಒಕ್ಕ ಮಾಟ್ಲಾ ಅಡಕಮೈಂದಿ . ¹⁰ ಪ್ರೀತಿ ಬೇರೆಯೋಳ್ಕಿ ಯಾವ ಕೆಡ್ನಿ ಸೇಸ್ಸೇಲೆದು . ಅದ್ಗು ಪ್ರೀತಿಯಿಂಚ್ಚನೇ ಧರ್ಮಪ್ರಮಾಣಮು ನೇರವೆರ್ತಾದೀ . ¹¹ ಇಪ್ಡು ಕಾಲಮು ನಿದ್ರನಿಂಚ್ಚ ಎಚ್ಚರಮೈಯ್ಯಿ ಕಾಲಮ್ ಅನಿ ತಿಲಿಚ್ಕೊನೀ ದೀನ್ ಎಲ್ಲಾ ಸೇಯ್ಯಂಡ್ರಿ . ಮಾಮು ಕ್ರಿಸ್ತುಡ್ನಿ ಮೊದ್ಲು ನಮ್ನಾ೦ಟ್ಟ ಕಾಲಮ್ಲಾ ವುಡ್ ವುಡ್ನಟ್ಗ ಇಪ್ಡು ಮಾ ವಿಮೋಚನೆ ಹತ್ತಿರಮ್ ಅಯಾ . ¹² ಸೀಕ್ಟಿ ಜ್ಯಾಸ್ತಿ ಮಟ್ಗ ಕಳೆಸಿಪಯಾ ; ಪೋಗ್ಲು ಸಮೀಪಮ್ ಅಯಾ . ಸೀಕ್ಟಿಕಿ ಅನುಗುಣಮೈನಾ ಕೃತ್ಯಲ್ನಿ ಇಸ್ಪೆಟ್ಟಿ ಯೇಲ್ಗುಕಿ ಅನುಗುಣಮೈನಾ ಆಯುಧಲ್ನಿ ಧರಿಬಿಚ್ಕೊಂದಾಮು . ¹³ ದುಂದೌತಣಮು , ಕುಡಿಕತನಮು , ಕಾನಿ ಕಾಮ , ವಿಲಾಸ , ನಿರ್ಲಜಾತ್ವ ಕೃತ್ಯಲ್ನಿಚ್ಚಕಾನಿ , ಜಗಳ್ಮು , ಕೊಡಪ್ಪುರಿಲಾ ಕಾನಿ , ಕಾಲಮ್ನಿ ಕಳಿಸ್ದನೆ ಪೋಗಲ್ ಪೋದ್ಕಿ ಸರಿ ಅಯ್ಯಿ ಮಾನಸ್ಥಲೈಯ್ಯಿ ನಡಿಸ್ಕೊಂದಾಮು . ¹⁴ ಶರೀರ ಆಶೆಲ್ನಿ ಪೂರೈಚ್ಚೆಕಿ ಚಿಂತಿಸ್ದನೆ ಕರ್ತುಡ್ ಐನಾ ಯೇಸು ಕ್ರಿಸ್ತುಡ್ನಿ ಧರಿಚ್ಕೊಂಡಿ .