¹ Go ymachidjagi ekombu dja tapype, Apã Wachu mema djape bue djapollãwã dja byllãndygidji. ² Ymachidjagi djawuma Profeta Natandji. Mai gami, cho ekõ tapy gatu wyra gatu djapopyre cedro gatudjiwa. Apã wachu arca wyradji djapopyre go ĩ tapy tyru wachudji djapopyrepe. ³ Go Natan djawuma ymachidjagipe: amayty kua, djapo gami dje djawã djawuwe nonga, Apã Wachu dje djãwẽwa. ⁴ Go chãwãmbu, Apã Wachu djawuma Natandji, djawuma idjape go nonga. ⁵ Oga mondo djawuwã cho buetygi David endape: Kowe nonga ina pendje Apãeche, dje ko djapo djue tapy cho ekõ endarã. ⁶ Cho ekõllãndy tapy djãwãpe, cho nuebu djepe Israel irondy wywype Egipto chupa puare kowebu wyche emi, cho ekõ tyru wachu djapopyrepe arca wyradji djapopyre endatype. ⁷ Cho ekõ bukubu djepe Israel irondy wywy bychepe, cho ina ko gogi wywype cho chupa pua yma chidjagipe: bue ware ko dje djapollã cho tapyrã cedro wyra gatudji. ⁸ Kowebu, djawu gami cho buetygi Davidpe: kowe nonga ina pendje Apãeche: cho rõ djepe prawowe wachupurã warõandy byche puare, dje ekõwã Israel chupape ymachidjagi. ⁹ Cho dje djãwẽwaty go dje o rupi: dje chã ruwã cho bropawerã go djedji mbyllandygi cho djapowerã dje bykuapyredji djawu gatuwã, emi duwe rekuatywa wywy krymballawã ymachidja wachueche nonga. ¹⁰ Cho miwerã cho chupa Israel dja endarãpe dja ekowã dja llaporãechepe, wedjallãwerãma gope, go dja mbyllãndygi reko buchãllãwerãma idjape go dja ekõwe nonga nondjebu ¹¹ Cho mi buare ymachidja djawu bowoaty cho chupa Israel llabu, djepe cho mewerã bue djapollãwã dje byllãndygidji, go buare cho kiu djepe, cho puã miwerã dje llaporã tapy. ¹² Go dje monowã krapï wëmbu djepe pechewerã dje apã djãwe. cho puãwerã etakrã dje irondydjiwa, wëwerã djedjiwa. ¹³ Idja puãwerã tapy cho bykuapyrepe etakrã tapy cho mi gatuwerã idjape gorãwe Israel ymachidja wapy endatype. ¹⁴ Cho rõ dja aparã, dja rõ cho teyrã, dja ekõ gatullãbu cho pachowerã idjape kbe'e wywy wyrã minipe kbe'e tey wywy pachoatype. ¹⁵ cho chĩnga djeky matãllãwerã idjadji, cho matawe nonga Sauldji, go cho matãwe idjape, cho mima djepe dja endawepe. ¹⁶ Go dje tapy mi gatupyrã dje ekõwerã dje chupape ymachidja go rãwẽ matãbechewerã, gorawẽ endarã dje yma chidja rekowerã. ¹⁷ Kowe djawu dja wechãwe ikẽ pou nonga rupi, emi djape mewe nonga, go nongaiche Natan djawuma Davidpe. ¹⁸ Gobu ymachadja David ikẽ roma go dja djawu endatype, go puãma Apã Wachu chã ruwa, dja inama: cho Apãeche cho rekuatygi, bueko cho, emi cho tapy puagi dje chope eruare kowepe. ¹⁹ Go nongabu djepe dje puarã ichakrãeche kowe wywy, go buare dje djawuma emi dje buetygi lluawã rekuaty emi go nonga dje praru gatu reko ywy llabuwa wywydji. ²⁰ Buerõ David djawu mewerã wyche djepe dje kua gatu dje buetygipe cho rekuatygi. ²¹ Kowe bue gatueche dje djapoma dje djawu rupi, dje djãwã djawuwe nonga, dje kiuwe kowe dje buetygipe. ²² Go nonga dje, ore Apãeche dje naina wachu,ïllãeche dje nonga, ïllã emi Rekuaty kainallãgi dje nonga, go duwe rekuatygi wywy dje nongallã, go ore wenduwe nonga ore pycha rupi. ²³ Awa ko dje chupa Israel nonga, chupa gatuechegi kowe ywy llabu. dje rõ ore Apãeche, dje prawoma Israel dje chupa dje mema dje bykuapyre dje djapowe bue wachu gogi wywy chã ruwã, go dje djapowe begatu kowe ywy wachu llabu, dje prawo gatudjiwa dje chupa puagi dje matãwe Egipto puare go dje llapo, go duwe chupa byche puare, go dja rekuaty wywy byche puare emi. ²⁴ Dje kuwẽ gatuma dje chupa pua Israelpe, dje llapo go chupa gorãwẽ ïwerã go dje cho rekuatygi, dje ekõ gogi wywy apã eche. ²⁵ kowẽbu dje cho rekuatygi, djapo gami go dje djawu inawe nonga dje djawuwe nonga dje buetygi dje chupa pua wywype emi, dje djapowã dye inawe nonga. ²⁶ Go dje bykuapyredji kua rekopyrã go rãwẽ, gogi wywy inawã: ywadji nuabyre wachu rekuatygi ekõma Israel rekuatygi; go dje buetygi David tapy ekõwerã dje chã ruwa go rãwẽ. ²⁷ Dje rõ go ywachiwa nuabyre wachu rekuatygi go Israel rekuaty emi dje kiu gatuma dje buetygi pychape dje inama, cho puãwerã dje llapo tapy kowe djawu rupi dje buetygi krymba gatuma ra dja djãwãpe pukawã kowe bue dje chã ruwã. ²⁸ dje rõ ore rekuatygi ore Apãiche, dje djapo gatuma dje djawu, djawu mebyre dje buetygipe ²⁹ cho puka djepe kuwẽ gami dje tapy pua buetygi wywype go wywy ekowã dje echã ruwa gor ãwẽ dje inawe ore Apãiche, go dje kuwẽ gatu rupi dje buetygi tapy kuwẽ gatupyrã go rãwẽ.