¹ Gobu Dawid prãnduma Apã Wachupe: Cho owerã ko etakrã go Juda chupape gope ekõwã? Go Apã Wachu inama: O gami. Gobu Dawid prãnduna idjape: Maty cho owerã? Go Apã Wachu inama: Hebronpe. ² Gobu David djupima go idja mirõ brekodji Ahinoam, Jisreel puagi, emi Abigail, goro Nabal brekowe, Carmel puagi. ³ Gobu Dawid rama emi go kbe ĩngi idjadji, idja irondy wywydji. Gogi wywy rõ ĩmbama Hebrõnpe. ⁴ Go Juda puagi wywy ekoma Hebrõnpe go prawowe David Juda ache irõndygi wywy ymachidjagirã. Gobu djawuma reko Dawidpe: Jabes, go Galaad puagi, pechema Saulpe. ⁵ Gobu David rama djawu parapyre Jabespe, go Galaad puagi, kiuma reko idjape: Apã Wachu pendje kuwẽwera pendje prawo gatu buare idjape emi Saulpe djonoma kuarewe endawepe. ⁶ Apã Wachu ro pendje djawẽwã, go rõ praru gatu pendje djãmpabu. Cho emi djapo gatuwerã pendjepe go pendje djapo gatu buare. ⁷ Kowebu chidja ga mondo pendje ipo krymba ga reko. Saul manowe djepe, Saul rõ pendje Apã. Juda tapy puagi wywy chopẽ prawoma idja ymachidjagirã. ⁸ Go Abner, Ner tey'y, Saul to allãngi wywy nõa reko ymachidja rama Isboset, Saul tey, owã Mahanaim rekuaty. ⁹ Go mima idjape go chupa ymachidjagirã Galaad llabu, Suri llabu, Jisreel llabu, Efrain llabu, Benhamin llabu, go Achẽ wywy kreywe rekuatywa Israel duwe Achẽ llabu. ¹⁰ Isboset rekobu chengypychã tapa ruy'y ekõma Israel chupa ymachidjagirã, go kuwẽngatu reko mirõ ruy'y. Juda ache wywy rõ mudjãma Dawidpe. ¹¹ David kuwẽ reko Juda irõndy wywype go wachapa ruy'y Hebronpe. ¹³ Go Joab, Sarvia memby, go David tõ mumbuatygi oma emi. Doroma reko Gabaon y djawẽ. Joãb wapy gatuma y kua rekuatywa, Abner go y duwe rekuatywa. ¹⁴ Gobu Abner inama Joãbpe: Puã kua kowebu, kbuchuwe wywy, tõ mumbu reko nandje chã ruwa! Joab inama emi: Puã ga mondo kowebu! ¹⁵ Gobu puãma go etakrã mirõ Benjamin pua, etakrã mirõ Isboset pua, Saul tey'y, go etakrã mirõ David buepyty puagi. ¹⁶ Go etakrã etakrã pychy reko biri reko pychoma pe'e akua edji wywy gobu wapa go wywy. Go chupape rõ bykuawe Helcat Hazurim, go rõ Gabaon rekuaty. ¹⁷ Tõ mumbu buchãma reko go kreybu. David emi dja kuere mudjãndygi chidjama Abner emi Isarael puagi llabu. ¹⁸ Dawid kbe bychepe ĩ brewipychã idja tey'y, gogi rõ Sarbia memby: go rõ Joab, Abisai emi Asael. ¹⁹ Go Asael mỹro chidja go wachu mỹrõ nonga. Gobu Asael mỹrõma Abner kuere rupi, go upiallãma llu rekuaty llãchu rekuaty. ²¹ Gobu Abner maĩ dja kuere rekuaty gobu inama: Dje ko Asael? Idja inama: Guei cho. ²⁰ Gobu Abner idjape inama: Kapyry llu rekuaty gobu llachu rekuaty, gobu bro ga mondo duwe kbedji emi kawã ga mondo idja llapowedji. Go wedja djuellã go kuere rupi. ²² Go Abner djawu reko Asaelpe: Amaty kua! Mudjãeme cho kuere rupi! Bue ware cho djepe pychowerã emi ywype itypyrã? Manonga ko cho ĩwerã cho pawe Joab chã ruwa cho djepe brobu? ²³ Go Asael ollãwe, go buare Abner pychoma mondo wyra akua pukupe dja rukã ipo, go wyra puku akua wẽma mondo dja eche rekuaty. Gobu wama mondo emi manoma. Kove endape rõ ache wywy wachabu, pytama gope echewe wechãwã. ²⁴ Joab go Abisai oma dja kuere rupi. Krey wychobu ekõma Amma kuambukupe, go rõ Gia ruwa Gabaon ape ka embeji. ²⁵ Go Benjamin irondy wywy noãma reko edji. Abnerdji oma emi kuãmbuku endawepe. ²⁶ Gobu Abner pukama Joãbpe, go inama: Gorawẽ pembuku rupi dje pychowerã ko? Dje kuallã ko krampibu ĩwerã enda djã prãndjã? Djawu gami dje pawe wywype mudjãllãwã dja pawe wywy kuere rupi! ²⁷ Go Joab djawu emi Apã Wachu bykuapyredji: Dje djavullã rawe kove krey wembu, go Israel puagi wywy mudjãllã rawema idja pawe wywype! ²⁸ Gobu Joab mimbyma mondo achĩpurã ãchĩ Juda kawãma, emi go Israel puagi pachollãma emi. ²⁹ Go Abner watama Arawa embe rupi go chabambu, ypurã Jordan wachama o gobu wema emi Mahanaimpe. ³⁰ Go Joab mudjãllãma Abnẽrpe. Nõama reko duve rekuatywa ĩwegi wywype. Dawid kuere mudjãndygi bychepe ĩllãma etakrã tõ wachu kbe'e, gobu Asael. ³¹ Go Dawid kuere mudjãndygi broma mondo Benjamin puagi emi Abner irõndy bychewagi brewipychã wachapa tapa kbe'epe. ³² Gobu rama Asael echeve, pechema dja apã kuarewepe Belenpe. Joab emi dja kuere mudjandygi watama o chawambu. Krey wẽmbu wẽma Hebronpe.