² Gobu go krey rupi go Israel wywy opabu tõ mumbuwã, David puãma krey wychobu watama dja tapy gatu rupi. Gobu dja wechãma etakrã kudjã kbeigatuechegi dja eche ydjoma. ³ Gobu Dawid buema pranduwã: Awa rõ go kudjã? Gobu dja buetygi inama idjape: Go rõ Betsabe, Eliam tey kudjã, Uria breko, go Het puatygi. ⁴ Go David buema mõndo dja buetygipe eruwã go kudjãpe dja endape. Gobu idja ĩkema idjaji. Go kreybu go kudjã rõ dja eche ype kuchĩma go kudjã pirã kuwẽwã. Gobu oma emi dja tapype. ⁵ Gobu Betsabe brawoma. Go buema dja buetygipe Dawipe kiuwã: Cho brawoma dje miwe. ⁶ Gobu David inama Joabpe: bue gami cho ẽndape Uriape, Het puagi. Gobu Joab buema Uriape David endape. ⁷ Uria ekõmbu idja ẽndape Dawid prãnduma: Eche gatu ko Joab? Cho irõndy wywy eche gatu ko emi? Mawenõnga o go tõ mumbu? ⁸ Gobu David inama Uriape: Dje tapype ga kua, dje pychã kuchĩ ga mondo. Uria wẽmbu go ymachidja tapy puare, Dawid buema idja kuere rupi bue gatu. ⁹ Uria rõ ikẽma ymachidja tapy djãwa ikẽ lluãndype go dja buetygi wywy bychepe, go ollã dja tapype. ¹⁰ Gobu etakrã buetygi kiuma mondo Dawipe. Go inama idjape: Uria ollãwe dja tapype. Gobu David inama Uriape: Dje wata pukullãwe ko? Buerã dje ollã dje tapype? ¹¹ Gobu Uria inama emi Dawidpe: Apã Wachu arca wyra djapopyre ĩ we pire djapopyrepe, Israel emi Juda pua wywy, cho rekoatygi Joab emi cho rekoatygi buetygi wywy ĩma go djõpe. Cho ko ikẽwerã cho tapype, bakupyre uwerã emi bue tykuwerã, emi cho ikẽwerã ko cho brekodji? Djepe emi cho djawẽwatygipe rõ cho prawoeche, go nõnga cho djapollãwerã. ¹³ Gobu David inama Uriape: Warõ kowe krey rupiwe, go kuẽmbu cho djepe buewerã. Uria ollãma Jerusalenpe go krey emi duwe krey pewe. ¹² Go Davi pukama Uriape bakupyre uwã emi bue tykuwã edji, chã watama djono idjape. Gobu dja wẽma o go krey wychobu owã dja ike endatype dja buetygi wywydji emi ollã dja tapype. ¹⁵ Go duwe kuẽmbu, Dawid djawu paramami Joab puarã, gogi rama Uria ipo rupi idja puarã. ¹⁴ Go djawu parapyre rõ kowe: Uriape djono gami tõ mumbu buchãwãpe go tõ mumbuaty chidjagi chã ruwã pendje rypydji ga ĩmba, go idjape browã, gobu idja manowã. ¹⁷ Go Joab oma bropawã go chupape. Gope Uriape mima go pua kbe rõ krymbaeche. ¹⁶ Gobu wẽmba romabu go tapy tãrã puagi tõ mumbupawã Joabdji djukama tãrã prowi David tõ allãngi wywype, gogi bychepe manoma emi Uria, go Het puagi. ¹⁸ Gobu Joab buema mondo etakrã dja buetygi kiuwã Dawidpe go tõ mumbudjiwa. ¹⁹ Go Joab inama go dja buetygipe: Kiupa mõndo go ymachidja wachugipe go tõ mumbudjiwa. ²⁰ Dje wechãmbu ymachidja wachugi prãndjãmbu, ina mondo djepe: Buerã pẽndje tapyllãeche chupa djãwẽ tõ mumbuma? Pendje kuallã ko gogi wywy pendjepe djukawerã tapy ywadjiwe? ²² Go Joab buetygi oma David ẽndape emi kiupama mondo idjape go inawe nongaeche: ²³ Go pua kbe rõ chidjaeche. Gogi wywy ekõma orepe bropawã go djõpe, ore buema idja ekõawe rekuaty go chupa pechepyre djãwã wachu djawẽ. ²⁴ Go tykõ pechepyre ruwa ywadjiwe wachĩ piratygi djywãmbama dje buetygi wywype. Tãrã prowi manoma ymachidja wachu buetygi wywy. Gogi wywy bychepe manoma emi dje buetygi Uria, go Het puatygi. ²⁵ Gobu Dawid inama go djawu ratygipe: Kowe nonga dje inawerã Joabpe: Chĩnga ruwieme gogidji, go pembuku rõ pychoaty tõ mumbu chidja ga reko edji. Miĩ mondo go chupa pendje ipo wydji. Go nonga dje djawu chidja mẽwẽrã idjape. ²⁷ Uria breko kuama idja ime rõ manoma go chĩngama idjadji. ²⁶ Go kudjã okryrallãdjiwa krãpĩ rabu, dja tyru braa pypyllãma, Dawid buema eruwã Betsabepe dja tapype. Go rõ kowebu dja brekoma gobu dja memby rekoma etakrã kbe'e. Kowe rõ David djapowedjiwa bue buchãeche Apã Wachu chã ruwa.