¹ ಅಪ್ಡು ಯೇಸು ಸೈತಾನುಡಿಂಚ ಶೋದ್ಬಿಚ್ಕೊನೆಕಾಯಿ ಆತ್ಮುಡು ವಾಡ್ನಿ ಅಡ್ವಿಕಿ ತೊಡ್ಕೊಪಾಯೇ. ² ವಾಡು ನಲಪೈ ದಿವಸ್ಮು ಉಪಾವಾಸ್ಮುಂಡೆ ಆಮಿಂದ ವಾಡ್ಕಿ ಆಕ್ಲಾಯೆ. ³ ಅಪ್ಡು ಆ ಶೋದಕುಡು ವಾಡ್ ಜೊತ್ಕಿ ವಚ್ಚಿ ನುವ್ವ ದೇವುಡು ಕೊಡ್ಕಾಯಿಂಟೆ ಆ ರಾಳ್ಳು ರೊಟ್ಟಾಯಟ್ಗ ಅಪ್ಪ್ಣೆನಿ ಇಯ್ಯಿ ಅನಿ ಸೊಪ್ಪಿ ವಾಡು ⁴ ಮನುಷ್ಯುಡು ರೂಟ್ತ್ನಿ ತಿನಿ ಮಾತ್ರುಮಿಂಚ ಬದ್ಕೆಟ್ಲೆದು ,ದೇವುಡು ನೋಟಿಂಚ ವಚ್ಚೆ ಪ್ರತಿಯೋಕ್ಟಿ ಮಾಟ್ಲಿಂಚಾನು ಬದ್ಕ್ತಾಡು ಅನಿ ರಾಸಿಂದಿ ಅನೆ. ⁵ ಅಪ್ಡು ಸೈತಾನುಡು ವಾಡ್ನಿ ಪರಿಶುದ್ಮು ಪಟ್ನುಮ್ಕಿ ತೊಡ್ಕೋನಿ ಪಾಯಿ ದೇವಾಲಯ್ಮು ಶಿಕರಮಿಂದ ನಿಲ್ಪಡಿ ವಾಡ್ಕಿ ⁶ ನುವ್ವ ದೇವುಡು ಕೊಡ್ಕಾಯಿಂಟೆ ದುಗುಂಕಿ ದುಮ್ಕು, ವಾಡು ನೀ ವಿಷಯುಮ್ಲ ನಾ ದೂತುಲ್ಕಿ ಅಪ್ಪ್ನೆನಿ ಇಸ್ತಾನು, ನೀ ಕಾಲು ರಾಯ್ಕಿ ತಗ್ಲೇ ಅನಿ ವಾಳು ನಿನ್ನಿ ಸೇತ್ಲಾ ಎತ್ಕೊಂಟಾರು ಅನಿ ರಾಸಿಂದಿಕದ ಅನಿ ಸೊಪ್ಪೇ. ⁷ ದಾನ್ಕಿ ಯೇಸು ನೀ ದೇವುಡಾಯಿನ ಕರ್ತುಡಿನಿ ಪರಿಕ್ಷೀಯ್ಗುಡ್ದು ಅನಿ ಸಹ್ಮು ರಾಸಿಂದಿ ಅನೆ. ⁸ ಬಳಿಕ್ಮು ಸೈತಾನುಡು ಯೇಸುನಿ ಬಹಳ್ಮು ಎತ್ಹೃಮಾಯಿಂಡೆ ಬೆಟ್ಟ್ಮುಕಿ ತೋಡ್ಕೊಪಾಯಿ ಪ್ರಪಂಚ್ಮಿನ ಅನ್ನಿ ರಾಜ್ಯಲ್ನಿ ಅವ್ಟ್ಲು ವೈಭವಲ್ನಿ ಯೇಸುಕಿ ಸೂಬಿಚ್ಚಿ ⁹ ನುವ್ವ ನಾಕಿ ಸಾಷ್ಟಾoಗ್ಮುನಮಸ್ಕಾರ್ಮ್ನಿ ಸೇಸ್ತೆ ಇವಟ್ಲ್ನೆಲ್ಲ ನೀಕೆ ಇಸ್ತಾನು ಅನೆ. ¹⁰ ಯೇಸು ವಾಡ್ಕಿ - ಸೈತಾನುಡಾ , ನುವ್ವ ತೊಲ್ಗ್ ಪೋ . ನೀ ದೆವ್ಡಾಯಿನ ಕರ್ತುಡ್ಕಿ ಅಡ್ಡ್ಮು ಪಡಿ ವಾಡೋಕ್ಕುಡ್ನೆ ಆರಾದಿಯಾಲ ಅನಿ ರಾಸಿಂದಿ ಅನಿ ಸೊಪ್ಪೇ. ¹¹ ಅಪ್ಡು ಸೈತಾನುಡು ವಾಡ್ನಿ ಇಡ್ಸಿಡ್ಸೆ. ಮಲ್ಲಿ ದೇವಡು ದೂತ್ಲು ವಚ್ಚಿ ವಾಡ್ಕಿ ಉಪಚಾರ್ಮು ಸೇಸೆ . ¹² ಯೋಹಾನುಡು ಸೆರೇಕಿ ಪಡೆ ಅನಿ ಯೇಸು ಇನಿ ಆ ಸ್ತಳುಮ್ನಿ ಇಡ್ಸಿ ಗಲಿಲಾಯಮು ಸೀಮೇಕಿ ಪಾಯೇ. ¹³ ಬಳಿಕ್ಮು ನಜರೇತ್ ಅನೆ ಊರ್ನಿ ಇಡ್ಸಿ ಜೆಬುಲೋನ್ ನೆಫ್ತಲಿಮ್ ಅನೆ ನಾಡ್ಲುಕಿ ವಚ್ಚಿ ಸಮುದ್ರುಮು ಹತ್ರುಮ್ಲ ವುಂಡೆ ಕೆಪೆರ್ನೌಮ್ ಅನೆ ಊರ್ಲ ಇಲ್ಲ್ಸೆಸ್ಕೋನಿ ವುಂಡೆ. ¹⁴ ದೀನ್ನಿಂಚ ಯೆಶಾಯುಡನೆ ಪ್ರವಾದುಡು ಮುಖಾಂತ್ರುಮು ಸೊಪ್ಪಿಂಚಿನ ಮಾಟ ನೆರ್ವೆರ್ಸೆ, ಆ ಮಾಟ ಎಮಂಟೆ ¹⁵ ಜೆಬುಲೋನ್ ಸೀಮೆ ಮಲ್ಲಿ ನೆಫ್ತಲೀಮ್ ಸೀಮೆ , ಯೋರ್ದೊನ್ಇಂಚ ಆಕ್ಟರ ಸಮುದ್ರಮು ತೊಟ್ಗೆ ವುಂಡೆ ಸೀಮೆ ಅನ್ಯಜನಲುಂಡೆ ಗಲಿಲಾಯ್ಮು ಸೀಮೆ, ¹⁶ ಸೀಕ್ಟಿಲ ವಾಸ್ಮು ಸೇಸಿನ ಈ ಸೀಮೇಲ ಜನಲ್ಕಿ ಪೆದ್ದ ಎಲ್ಗು ಕನ್ಬಿಚ್ಚೆ, ನಿರಂತರ್ಮು ಸೀಕ್ಟಿಆಯಿನ ದೇಶುಮ್ಲ ವುನ್ಡೋಲ್ಕಿ ಸೂರ್ಯೋದಯ್ಮಾಯೇ ಅನೇದಿ. ¹⁷ ಅಪ್ಡಿಂಚ ಯೇಸು ಪರಲೋಕ್ಮು ರಾಜ್ಯುಮು ಸಮೀಪ್ಮಾಯ್ಯೇ, ದೇವುಡು ತೊಟ್ಗಿ ತಿರಿಕೊಂಡ್ರಿ ಅನಿ ಸಾರಿ ಸೋಪ್ಪೆಕಿ ಪ್ರಾರಂಬಿನ್ಚೆ. ¹⁸ ಇಟ್ಟುoಡೆನಪ್ಡು ಯೇಸು ಗಲಿಲಾಯ್ಮು ಸಮುದ್ರಮು ಹತ್ರುಮ್ಲ ತಿರ್ಗಾಡೆನಪ್ಡು ಅನ್ನ ದೊಂಬುಳ್ಳು ಇದ್ರೂ ವಲ ಎಸೆದ್ನಿ ಕನೆ . ವಾಳು ಪೇತ್ರುಡು ಅನ್ಬಿಚ್ಕೋನೆ ಸೀಮೊನುಡು ¹⁹ ಮಲ್ಲಿ ವಾಡ್ ತೊಂಬ್ದಾಯಿನ ಅಂದ್ರೆಯುಡು. ವಾಳು ಬೆಸ್ತ್ಲು , ಸಮುದ್ರುಮ್ಲ ವಲೇ ಎಸ್ತವುಂಡ್ರಿ. ವಾಳ್ಕಿ ಯೇಸುನಾ ಎನ್ಕ ರಾಂಡ್ರಿ, ²⁰ ಪಟ್ಟೆ ಬೆಸ್ತುರ್ಲಾಯಿ ಮಿಮ್ಮಲ್ನಿ ಸೇಸ್ತಾನು ಅನಿ ಸೋಪ್ನಪ್ದೆ ವಾಳು ವಾಳ್ ವಲುಲ್ನಿ ಇಡ್ಸಿ ವಾಡ್ ಎನ್ಕ ಪಾಯ್ರಿ. ²¹ ಆನಿಂಚ ಮುಂದ್ರ ಪಾಯಿ ಇಂಕ್ಕಿದ್ರು ಅನ್ನ ದೊಂಬುಲ್ನಿ ಅಂಟೆ ಜೆಬೇದಾಯುಡಿನ ಕೊಡ್ಕಾಯಿನ ಯಾಕೊಬುಡ್ನಿ ವಾಡ್ ತೊಮ್ಡಾಯಿನ ಯೋಹಾನುಡ್ನಿ ಕನೆ. ವೂಳು ವಾಳ್ ತಂಡ್ರಿಯಾಯಿನ ಜೆಬೇದಾಯುಡು ಜೊತ್ಲೋ ದೋಣಿಲ ವಾಳ್ ವಲುಲ್ನಿ ಸರಿಸೆಸ್ತಾವುನ್ದ್ರಿ. ಯೇಸು ವೂಳ್ನಿ ಪಿಲ್ಚೆ. ²² ಕೂಡ್ಲನೆ ವಾಳು ದೋಣಿಲ್ನಿ ವಾಳ್ ತಂಡ್ರಿನಿ ಇಡ್ಸಿ ಯೇಸುನಿ ಇಂಬಾಲಿನ್ಚ್ರಿ . ²³ ಯೇಸು ಗಲಿಲಾಯ್ಮ್ಲಂತ ತಿರ್ಗಾಡಿ ಆನೋಳಿನ ಸಭಾ ಮಂದಿರಮುಲ ಉಪದೆಶ್ಮು ಸೇಸ್ತಾ , ಪರಲೋಕ್ಮು ಸುವಾರ್ತೆಲ್ನಿ ಸಾರಿ ಸೋಪ್ಪ್ತ ಜನಲ್ನಿ ಅನ್ನೀ ತರ್ಮು ರೋಗುಮ್ಲಿನಿ ಅನ್ನಿ ತರ್ಮು ಬೇನೆಲ್ನಿ ವಾಸಿ ಸೇಸ್ತಾ ವಚ್ಚೆ. ²⁴ ಯೇಸು ಸುದ್ದ್ಮು ಸಿರಿಯಾ ದೆಶುಮ್ಲಾ ಅಂತ ಹಬ್ಬಿದಾನ್ನಿಂಚ ಪೈಲೋ ನೆಟ್ಗಲೇನೋಳ್ ಅಂದ್ರುನಿ ಅಂಟೆ ತರಂ ತರಂ ರೋಗ್ಮುಬಾದೆಲಿಂಚ ಕಸ್ಟ್ಮು ಪಡ್ತವುoಡೋಳ್ನಿ ದೈಮ್ ಪಟ್ಟುoಡೆವಾಳ್ನಿ ಮೂರ್ಚೆರೋಗ್ಮೊಳ್ನಿ ಪಾರ್ಶ್ವವಾಯುಮೊಳ್ನಿ ಯೇಸು ಹತ್ರುಮ್ಕಿ ತೋಡ್ಕೊವಚ್ಚ್ರಿ, ಯೇಸು ವಾಳ್ನಿ ಸ್ವಸ್ತ್ಮು ಸೇಸೆ . ²⁵ ಗಲಿಲಾಯ್ಮು ದೆಕಪೋಲಿಮು ಯೆರೂಸಲೆಮುಮು ಯೂದಾಯ್ಮು ಅನೆ ಸ್ತಳ್ಮಿಂಚನು ಯೋರ್ದೊಂಮ್ ಏಟಿನ ಆಕ್ಟಿನ್ಚಾನು ಜನಲು ಗಂಪ್ ಗುಂಪಾಯಿ ಯೇಸು ಎನ್ಕ ಪಾಯ್ರಿ.