16 ¹ ፕር ጋን ፑኡሺዬንባ ቢሬ እን ሻምሼ ውርካ ይሁኔን ናንዳካ ውርካ ቶኦካ እንካ ገላትያጝ ከእያይ ሃኣዬ እንግን ኤርጎጝ ሻምባ እያይ። ² ቢሬ ፑኡሺዬን ካሻሞጝ ካማርሼ እን ኣን ካኩዋወ ኣዬኔ፤ ከኦካ ጫቃን ጉዩ ውር ክየም ክየም ከእያይ ዾቅሾጝ ከሳምንት ካሻም ሹ እንካ ሌሜን ዋናዬ ካጋጁጝጋ። ³ ከሹካጝ ሃኩኖጝ ናንዳካ ውራን ጊታይ እየው የእድቶጝ ካኣይ እንግን ወርቀትካ ይዕሲዬኔ ኣይኔን እን ካሄክሺሼ ኢየሩሳሌሜ ሃይዕሲባ እንግን። ⁴ ኩዬን ናኒ ሃኦኬና ዎሺሼያጝ ፓይባ ከኣን። {ቃቦካ ሐዋርያታን} ⁵ ከዻርካ መቄዶንያ ሳጊዬን ናኒ ናንዳካጝ ካማሬ ሺዽዬኑጝ፤ ሄክሽያ መቄዶንያያጝ ጩዋ ሃኩንባ ሃሚን ጉዩጝ። ⁶ ከታካጝ ሃኩዮጝ ኣይን ራቅ ኬና ኣይ እያን ከኩዬን ናኒ ከኬልሺ ኣንባዬ፤ ካኡፑኔ ኦጉዩ ኣኔባ፤ ወይ ከባርጊን ካኡፑኔ ኦጉዩ ኣኔባ። ⁷ ጋን ከጉዋር ናኒ ሃሳጊያጝ ካቶዬ እየው ሃዎሺኬን፤ ሃኬ ክያጃካ ባሪዮያጝ ሹ ኬና ኣይ ራጅሜ ካኡፑኔ ኦጉዩጝ ሃቃቢባ። ⁸ ኣይባዬ ሌይ ሃምካ ቶንቶሮ እንካ ሹካ ዶጝታም ሃኡፌንባ ኤፍሶን፤ ⁹ ናንዳካኦ ቦውሼያ ኣን ሃፑክ ታቺካ ዋድማ፤ ውር ጁዋኑ ጊታኬና ምኔ ኣን ኣኔባ። ¹⁰ ጢሞቴዎስ ኩና ዮግ ጉዩያጝ፤ ሪጊ ካማር ኣኔኔ ካኡፔኬ እየው ሻሚባ፤ እሺዻ ሃውርኬና ኣሽክዬን ዋድማካ ታቺ እን ከኣኔ። ¹¹ ውር ክየምጵንዻ ካማር እሺ ቦውዬን፤ ካዋኬ ዮጝ ናኒ ከሹቃጝ ኬልሺ እሺባ፤ ዋኬን ኔኒዻ ሃኣኒና ከጪኒጌን ኔኒ ካሊዬን። ¹² ናንዳካ ጪኒጌን ጉዋዩ ናንዳካ ኣጵሎስ ፕር፤ ከጪኒጊን ካኩዋወ ሃሚን ካሎን ሃይወንያ እሺ፤ ዬ እሺ ጋን ካኩዋዎጝ ካኒ ዎሽኬን ዬ ኣግሼያ እሺያጝ ኩንባ። ¹³ ጬዬንባ፤ ቁዋቅትሽባ ከእምነት፤ ቁዋቅትሺሽባ፣ ኣይ ቁዋቃ፤ ¹⁴ ኦኮጝ የሺጝቴ ሻሜን ፓይላ ኣሽኪኬ ናሺማ። ¹⁵ ውርካ ጶሮካ እስጢፋኖስ ከኦካ ኣካይያ ጋዬ ውርካ ይሁኔን ዋድምሼን ጋይኔ እንግን ኤታጋኑጝ የእባጃያ፣ ጪኒጌን ናኒ ዮ፤ ይጝ ሃይወንያ እየው፤ ¹⁶ ጊታይ ኣይኬ እንግኔ ከእንግንዻ ጊታይ ዻቺኬ ዋድማጝ ፓይላ ዋይሼን እንግንባ። ¹⁷ ከእስጢፋኖስ፣ ከፈርዶናጥሴ ከኣካይቆሴ ፓይኔን ዋዝንሲያ ኣን፤ ናንዳካ ኦ እየው ከእን የማርቴ ኦጝ ኣኔኑጝ እጝ ጆጊ ኦናኒ ቋቁሻ፤ ¹⁸ መንፈስ እን ናኒዻ እን ጉዩዻ ኡፑሻዬ። ዬ ውራን ጊታይ ኣይኬ ጊታጝ እባጄን ሁሉኩሼባ። {ክያጃካ ይዕሲዬን} ¹⁹ ውርካ ቶኦካ ይሁኔን ጊታይ ኣኔን እስያጝ ቦዋ እየው ሆፎ። ኣቂላዬ ጵርሳቅላዬ ጊታይ ኣኔን ኦጉዋይካ ቶኦካ ይሁኔን ጊዬይዻ ሆፎ ኬና ጎቢዬ ከታቺ እን ጋያ እየው። ²⁰ ጪኒጊን ፓይላ ቦዋ እየው ሆፎ፤ እየው ከጋጝ ከሹንቄን ኬና ይሁሺኔ ኣይባ ጋጝ ጌሶ። ²¹ ጌሶጝ ኣን እን ቱኩሼ እየው ከቡዋ ናኑጝ ሃኣይ ጳውሎስ። ²² ካጝ ማር ታቺ እን ናሺዬኑጝ ኣኔያጝ ካኣይ ኬና ጋሺዬ። ²³ ኣይኔንካ ኢየሱስ ታቺ እን ካኣይኬ እየው። ²⁴ ናሺማ ናኒ ከኢየሱስ ክርስቶስ ካኣይኬ እየው ፓይላ፤ ኣሜን።