15 ¹ ካንዻ ጪኒጌን ናኒ ዮ፤ እን ሃክሊዬ እየዌ የቦቴዬ ፕርዻ ክያጃ ሹቃ እን የቁዋቅትሺቴዬ የጎርቶጝ ሃናሺያ እየው ሜይሼን። ² ክያጃ እን ሃክሊዬ እየውዻ የ ³ እን ኣን ሃቦወዬ እጝ ኣይኬ ፓይላ ሳጉጝ ሃሳስክሼያ እየው፤ ወቀትካ ቅርካ ይሁኔን ከእያይ ሺጞጝ፣ ክርስቶስ ኣርሻ ናንዳካ ሴሶ ጉዋዩ፤ ⁴ ቱቱካ፤ ከእን ቶኬኬ ወርቀትካ ውርካ ይሁኔንዻ፤ ከሹ እንካ ማክንሳ ናሹጛ፤ ⁵ ከኦይንዻ ጌዬና ኦካ ኬፍ፤ ጩዋ ጌዬና ኦካ ውር ታጵላማን፤ ⁶ ከኦይን ጩዋ ጌዬና ኦካ ጪኒጌንካ ጋጝ ጊታይ ኣይኬ ዽብ ቾን ሳጉጝ ሹ ክየም፤ ከኦካ ጊታይዻ ጁዋናን ጋኔባ ከዻቆ፤ ዬ ውር ክየም ክየም ሞትያ። ⁷ ከኦይን ጌዬና ኦካ ያዕቆብ፣ ጩዋዻ ጌዬና ኦካ ሐዋርያታን ፓይላ፤ ⁸ ከኦካ ፓይላዻ ጩዋ እን የኮምሺቴኬ ውር ጋራጝ ፕር ጌዬና ኦናኒ። ⁹ ኣን ከኦካ ሐዋርያታን ፓይላ እን ኣይ ይርኩጝ፤ ኣይን እን ኬሺው ኣን ሃሐዋርያቴ ካሺዎጝ ሃማር ኬናካ ሁሉኬን፤ ናንዳካኦ ሃዋኬያ ውርካ ቶኦካ ይሁኔን፤ ¹⁰ ኣይባዬ ጋን ከኣይኔንካ ባሪዮ ሃኣይያ እን ሃኣዮጝ፤ ኣይኔን እን ጋዬ ኣንዻ ካኒ ማቲኬን ማም እያይ፤ ፕርዻ ከኦካ ፓይላ ሳጊ ሃኣሽክያ ከቁዋቅትሺሼን፤ ኣይባዬ ማር ኣኔኔ ሃኣይኔንካ ባሪዮ እን ኣኔን ከኣኑጝ፤ ¹¹ ኣኪ ኣይን ኣኑጝ ኣይን እንግኑጝ እን ክሊኖጝ ሃይዕጝ፣ እየውዻ የኣምኒቶጝ ሃይዕጝ። {ናሹጜንካ ኣርሼን} ¹² ክርስቶስ ከእያይ ናሹጜ ከኣርሼን ክያኑጝ የኣይ ኬናካ ክሊህንቴያጝ፤ ከኦጉዩ ውር ክየም ክየም ሺጝ እያን ናሹጜንካ ኣርሼን ኣኔኬን? ¹³ ዋንቲ ናሹጜንካ ኣርሼን ማር ኣኔንያጝ ዋቲ ክርስቶስ ካኒ ናሹጝኬን እያጝጌ፤ ¹⁴ ክርስቶስ ማራ ናሹጜንያጝ ክሊማ ጉዋዩ ሃማም እያይ፤ እምነት ጉዋዩዻ ሃማም እያይ። ¹⁵ ከኦጝ ሳጊ ባሪዮ ቲታ ክርቶስ ከኣርሼን ክያኒ ሃሺጛ እያይኔ ከክሊህኔን ጉዋዩ ሃማቲያ ማኝካ ሾሮካ ውርካ ባሪዮዬ ሃጌይናያ፤ ጊታይ ኣርሹጝ ሃጊታኬና ማር ናሹጜንያጝ፤ ካኒ ቲትኬን ክርስቶስዻ፤ ¹⁶ ናንዳካኦ ጊታይ ኣርሹጝ ማር ናሹጜንያጝ ክርስቶስዻ ካኒ ናሹጝኬን። ¹⁷ ክርስቶስዻ ማራ ናሹጜንያጝ እምነት ጉዋዩ ሃማም እያይ፤ እየውዻ ሌይ ጋን የኣንቴባ ከሴሶ ጉዩ። ¹⁸ ኣያ እያይዻያጝ፤ ጊታይ ሞትኬ ክርስቶሱጝ ካህያ እያጝጌ። ¹⁹ ሃሻምቴ ክርስቶስ ቃቦጝ ሃናንዳካ ዻቆጝጵንያጝ፤ ከኦካ ውር ፓይላ ሳጊ ሃኣያ ጊታኬና ካቦኩንሲ። ²⁰ ኣይባዬ ጊታይ ክርስቶስ ሞትሾጝ ፓይላ ጋይኬ ቃያዬ ናሹጛ ከኣርሼን ክያኒ ከኣኩሉክ። ²¹ ኣርሼን ከእያይ ኩኔኬ ውር ክየሙጝ፤ ናሹጜንካ ኣርሼንዻ ማቲያ ከውር ክየም። ²² ውር ፓይላ ካኣርሼኬ ኣዳሙጝ፤ እያይን ውር ፓይላ ከክርስቶስ ማቲባ እያይ፤ ²³ ኣይባዬ ውር ክየም ክየም ማቲባ ከታራ ጊዬይ፤ ከሌሜን ክርስቶስ እን ኣይኬ ቃያጝ፤ ከኦይን ጩዋ እሺ ኩናያጝ ጊታይ ኣይካ ክርስቶሱጝ። ²⁴ ከኦካ ኣዬንካ ኦይኑጝ፤ ጌጳሞዬ ቁዋቅቲዬ ፓይላ ዻቾጝ ጩዋ፤ ጌጳሞ ሳስክዬ ኣዬ ሹኔ ባሪዮጝ፤ ከሹ እን ማቲባ ቱንሲ። ²⁵ ጋላን ፓይላ ሌይ ሃም ካሻምሼ ከኦካ ጃፍ ዱቡጝ ካጌጳዽዮጝ ሁሉኩሼባ። ²⁶ እንካ ዻቺሽዻ ሃቱንሲካ ኣርሼንካ ጋል። ²⁷ ኦኬ ፓይላ ሻምሼያ ከኦካ ጃፍ ኔኒ ዱቡ ሺጛ እያይኔ፤ ኣይባዬ ሺጝ ሻማ ኦኬ ፓይላያጝ፤ ኦኬ ፓይላ ካሻምሼ ኦካ ክርስቶስ ዱቡጝ ሻሞጝ ካማሬ ባሪዮ ሌሜኑጝ ሃልኪ። ²⁸ ሻሜ ፓይላጝ ጩዋ ባሪዮ ፓይላ ካኣዬኬ ፓይላጝ እሺ ውዋ ኔኒ ፕር ካሻምሼ ፓይላ ሃሚን ኔኑጝ ሻምሼባ ሃሚን ኔኑጝ። ²⁹ ናሹጜን ማራ ኣኔንያጝ ሺጝ ናንዳካ ውር ጊታይ ኣርሺዬ ጊታይ ዱቅዬን ሻሜን ኦ? ጊታይ ኣርሹጝ ክየምጵንዻ ሃኬና ማር ናሹጜንያጝ፣ ውር ሺጝ ናንዳካ እንግኔ ሃናንዳካኦ ካዱቅኖጝ? ³⁰ ኣይን ኡዋካ ሹ ጮል ሃሌምንቴ ኦኬ ጋራጝ ሃናንዳካኦ? ³¹ ጪኒጌን ናኒ ዮ፤ ኣን ሃኣርሺባ ሹ ጮል፤ ይንዳ ከኢየሱስ ክርስቶስ ታቺ እን ጉዋዩጝ ኦይን ናኒ ኣኔን ከእየው ሃእባጅባ [ትምክህት]፤ ³² ከኦካ ውርካ ኤፍሶን ጊታይ ዳርጊዬን ከዳቡጝ ኣያ ናንዳካ ቃቦካ ውርጵንያጝ ትርፊ ናኒ ሃኦ? ጊታይ ኣርሹጝ ናንዳካጝ ማሬ ኣርሼኑጝ፤ «ዻሚ ናንዳካጝ ካኣርሾጝ፤ «ካኣሜንባ፣ ካማቴንባ፤ ከእያይ ሺጜ እያይኑጝ ሃኣዬን ጉዋዩ። ³³ ኦይ ጊያምሼን፤ ባይዳ ጋራ እን ጊያምሺሽባ ዴንታካ ሹቃ እን። ³⁴ ዋክቴ ሃምካ ሻን ጉዩጝ፤ ኦይድ ሴሶዻ ኣሽክቴን፤ ጊታይ ማሪ ባሪዮ እባጄንዻ ኣኔባዬ ሃሺጜ ይንዻጝ ካቦኩንሲ እየውባዬ ጊያ። {ሩዋ እንካ ናሹጝ} ³⁵ ኣይባዬ ጊታይ ኣርሹጝ ናሹጝ እያን? ካፓይኔዻካ ሃኬ ሩዋ ኬና ኣይ እያን? ውር ኬና ካሺጝ እያይ ካኣኖጝ ቻሊሜንባ። ³⁶ እን ኣርሹጉጝ/ እን ኮሮጝ ማር ኣርሼንያጝ ጌይኬን ዻቆ። ³⁷ እን የኮሬዻ ሲንዴ ወይ ሃይናቲካ ጴንታ ኬና ኣይ [ቅንጣትጵን] ዬ ከታካ ሌሜን ካጌዮጝ ማር ሩዋወን። ³⁸ ዬ ባሪዮ ኬካ ክያጃ ኔኒ ኣዬንባ ሩዋ፤ ናንዳካ ጴንታክየም ክየምዻ ሃይናቲ ኣይባ ሩዋ ኔኒ። ³⁹ ኣሩጝ ፓይላ ማር ክየሜን፤ ኣሩጝካ ውር ሃክየም፤ ኣሩጝካ ዳቢ ሃእንቃ፣ ኣሩጝካ ኣርቴዻ ሃኣይናቲ እንቃ። ⁴⁰ ፕርዻ ሩዋ ጊታይካ ፎላ ዾዮኩጝ ኣኔባ፤ሩዋ ጊታይካ ዳሊ ክያኒዻ ኣኔባ፤ ኣይባዬ ጎቢንታካ ፎላ ዾዮክ ሃክየም፤ ጎቢንታካ ዳሊ ሃእንቃ። ⁴¹ ጎቢንታካ ሹሽ ሃኣይናቲ ክየም፤ ጎቢንታካ ትጌሽ ሃእንቃ፤ ፕር ካቢሊዻ ሃእንቃ፤ ጎቢንታካ ቢሊ ክየም እንዻ ከኦካ ጎቢንታካ ቢሊ እንቃ እን ሃዋና። ⁴² ናሹጜንካ ጊታይ ኣርሽዻ ሃእያይ፤ ሩዋ እን ጫፊ ኮርባ፤ ማቲ ሩዋ ኬና ማር ጫፊዬኔ ናሹጝጋ፤ ⁴³ ኮርባ ከቦውንታ፤ ናሹጝጋ ከጎቢንታ፤ ኮርባ ከዻቼን ናሹጝጋ ከቁዋቅቲ፤ ⁴⁴ ሩዋ ጊታይ ሙኖጝ ኮርባ፤ ሩዋ ጊታይካ መንፈሱጝ ናሹጝጋ። ሩዋ ጊታይ ሙኔ ኣኔያጝ ፕር ሩዋካ መንፈስዻ ኣኔባ። ⁴⁵ ዬ፤ ውር እንካ ሌሜን ኣዳም ማቲያ ፑጉ እያይ፤ ሺጝ እያይኔ ቶኳ፤ ዬ ኣዳም እንካ ታካ ሁር ማቲያ መንፈስ እንካ ኣይንቴ ዻቆጝ። ⁴⁶ ኣይባዬ እንካ ሌሜን ኩኖጝ ማርካ መንፈሴኔ ሃካ ሙኒኔን፤ ከኦይን ጩዋ እንካ መንፈስ ኩና። ⁴⁷ ውር እንካ ሌሜን ጌዬኬ ዳሉጝ ክያኑጝ ሃካ ዳሉጝ፤ ዬ እንካ ታካ ሁር ሃካ ፎላ። ⁴⁸ ጊታይ ኣይካ ዳሉጝ ሃኬካ ዳሊ፣ ጊታይ ኣይካ ፎላጝ ሃኬካ ፎላ። ⁴⁹ ከእያይ ካክምቴ ዴንታካ ውርካ ዳሉጝ፤ ፕር ሃክምባ ዴንታካ ውርካ ፎላዻ። ⁵⁰ ጪኒጌን ናኒ ዮ፤ ሃሜይሼባ እየው ይጝ፤ ኣሩጜ ኒያቡዬ ሁሉኬን ጶሮካ ባሪዮ፤ እንካ ካህዬ እን ማርካ ካህዬኔ ሻውኬን ጶሮካ ባሪዮ። ⁵¹ እየዎ፤ ሃሜይሼባ እየው ኦካ ድኬን ክየም፤ እየው ፓይላ የራጳኬን፤ ኣይባዬ ኡዋው ፓይላ ሃላውጥናባ፤ ⁵² ይንዳ ካማቲዮጝ ቲቢያ [ጡሩምባ] እንካ ሌሜንያጝ ሉጉድ ሃኬ ካርቡ እንካ ዻሩጝ። ቲቢባ ጡሩምባት ጊታይ ኣርሹጝ ማቲ ጊታኬና ማር ጫፊዬኔ ናሹጝጋ፤ ኡዋውዻ ሃላውጥናባ። ⁵³ እን ካህ እን ማር ካህዬን፤ እን ኣርሹጝ እን ማር ኣርሼኑጝ ካክምኖጝ ሁሉኩሼባ። ⁵⁴ እን ካህ እን ማር ካህዬን፤ እርሹጝ እን ማር ኣርሼኑጝ፤ ከሹካጝ ኪምኖጝ፤ ክያጃ እን ሺጜ ኣርሼን ቁጃ ከኣሸንፊዬኔ ቶኮጝ ሙኔንባ። ⁵⁵ ፕርዻ ኣርሼን ዮ፤ ኣሻኒፊዬ ናሹጜን ኑኑ ኣኔን ኦን? ኣርሼን ዮ፤ ኤ ቶኩኔን ኑኑካ ኣኔን ኦን? ⁵⁶ ቶኩኔንካ ኣርሼን ሃሴሶ፤ ቁዋቅትካ ሴሶዻ ሃክያጃ። ⁵⁷ ኣይባዬ ከዻርካ ኢየሱስ ክርስቶስ ታቺ እን ጉዋዩጝ ናንዳካ እን ኣይ ኡዋው ኣሸናፊዬኑጝ ጎሺ ካኣይካ ባሪዮ። ⁵⁸ ዬ ጪኒጌን ናኒ ጊታይ ሃናሺቶጝ ዮ፤ ቁዋቅትሺዬ ጎርባ፤ ኦይድኬ ኦኬ ክየምጵን ሁቡቡኔን፤ ናንዳካ ዋድማካ ታቺ እን ሹ ጮል ኣይ ጊታኬና ቁዋቅትሺ፤ ናንዳካኦ ጊታይ ዻቺሼን ባሪዮጝ ናንዳካጝ ማሬ ማም እያይ ኣዬኑጝ የእባጃያ።