14 ¹ ቶልባ ናሺማ፣ ኣይኔን ጊታይካ መንፈሱጝ፤ ዾርዻ ኣይኔንካ ሃሳዋ ሃሳወን ዎሺባ ከቁዋቅቲ። ² እን ሃሳወን ከልሳኑጝ ሃናንዳካ ባሪዮ ዬ ማር ናንዳካ ውሬን፤ እን ኣይካ ድኬን ናንዳካጝ ሃሳወኬ መንፈሱጝ ውር ኬናካ እባጅ ኣኔኬን። ³ ዬ እን ሃሳወን ከሃሳዋጝ ሃካ ጫንቃል ሻሜን፤ ናንዳካ ቁዋቅትሺሼኔ ናንዳካ ሌምሲዬኔ ሃሳውሼባ ውር። ⁴ እን ሃሳወን ከልሳኑጝ ሻም እሺ ኤምኑ ጫንቃል፤ ዬ እን ሃሳው ሃሳዋጝ ሻም ቶኦካ ይሁኔን ጫንቃል። ⁵ እየው ፓይላዻ የሃሳውናያ ከልሳንያጝ ሃናሺባ፤ ዬ ከኦካ እን ሳጊ የሃሳዋያ ከሃሳዋያጝ ሃናሺባ። ቶኦካ ይሁኔን ካጌዬ ጫንቃሉጝ ውር እን ሃሳወን ከልሳኑጝ ማር ሆኮልያንያጝ፤ ከኦካ እን ሃሳወን ከልሳን ሳጊ እን ሃሳወን ከሃሳዋጝ ሳጊባ። ⁶ ኣኪ ጪኒጌን ናኒ ዮ፤ ከሹካጝ ሃኩኔ ሃሚን ጉዩጝ፤ ሃማርያ ከዹዋልሺኔን ወይ ከኦኬ እባጄን ወይ ከሃሳዋ ሃሳወን ወይ ከእርርሲዬን ሃማር ⁷ ኬካ ቱሉንጎቴ ቾንጉዬ ኣኖጝ ኣይን ኦግታይ ማር ዻቆ ኣኔኑጝ ዋና ኣዬንካ ናቅዲ ጊዬይ ከኦካ ዙሉሞ እንቃ ጊታይ ሻም እያን ካቻሊዬ እባጄኑጝ? ⁸ ፕርዻ ውርካ ኤርጎ ማር ናቅዲ ልኪ ኬና ኣይካ ሺወን ዋዬንያጝ፣ ናንዳካ ፓር ሃኒን ካሼኪ? ⁹ እየውዻ የኣያ እያይ፤ ከኦካ ካት ጉዩ ክያጃ እን ማር ሆኮል ኣኔን ማር ቱሌንያጝ፣ እን የሃሳውቶጝ ሃኒን ካቻሊ ጶቅሲዬኑጝ? የኣያባ ኬናካ ሃሳውሼ ፑጉ። ¹⁰ ሃይነትካ ቶግ ጁዋኑ ኣኔባ ዳሉጝ ክያኒ፤ ቶግ ኬና ማር ሆኮል ኣኔንዻ ኣኔኬን፤ ¹¹ ኣኪ ውር ክየም ቶግ እን ሃሳዎጝ ማር ሆኮል ኔኒ እባጄንያጝ፤ ሃማቲባ ኮማና እንካ ሃሳውሾጝ፤ እሺዻ ማቲሼባ እን ኮማና። ¹² እየውዻ የኣያ እያይ፤ ኣይኔን ጊታይካ መንፈስ ናንዳካጝ የኣይቴ ጊታኬና ዎሺ ጌዬኑጝ፤ ሳጊ ዎሺ ኣይኔን ጊታይ ከሻምቴ ቶኦካ ይሁኔን ጫንቃሉጝ። ¹³ ዬ ውር እን ሃሳውኬ ልሳኑጝ ካቻሊዬ ሆኮልዬኑጝ ካይሁንቴባ። ¹⁴ ከሹካጝ ይሁኔኬ ልሳኑጝ መንፈስ ናኒዻ ይወንባ፤ ዬ ሹቦ ናኒ ኣኔኬን ኦኬ ክየምጵንዻ። ¹⁵ ኣኪ፤ ኣና ኦ ሻሜን? ሃይወንባ ከመንፈስ፣ ፕር ሃይወንባ ከሹቦዻ፤ ሃኪውባ ከመንፈስ፣ ፕር ሃኪውባ ከሾቦዻ። ¹⁶ ማራ እያይ ኣዬንያጝ ከሹካጝ የጞሺዬ ባሪዮ ከመንፈሱጝ፤ ናንዳካ ዳቢ እን ውር እጝ ኣይ ኮማናጝ እጝ እን የሃሳዎጝ ማር ዋዬንያጝ፣ ሻም እያን ናንዳካ ጎሺ ካቻሊዬ ኣሜን ሺጜኑጝ? ¹⁷ እን ከእጝ ሁሉኩሼ እን ካኬ ጎሺ ዬ ውር እንቃ ጌይኬን ጫንቃል። ¹⁸ ከኦካ እየው ፓይላ ሳጊ ናንዳካጝ ሃሃሳውኔ ከልሳኑጝ ሃጎሺባ ባሪዮ። ¹⁹ ኣይባዬ ከኦካ ቶኦካ ይሁኔን ቱዎጝ፤ ዶክ እርርሲዬን፣ ናንዳካጝ ካሃሳወ ክያጃ ሺ ታጱጝ ሳጊ፤ ካሃሳወ ክያጃ ቾን ከሹቦ ናኑጝ ሃላሻ። ²⁰ ጪኒጌን ናኒ ዮ፤ ከቃቦ ጉዩ ኦይዲ ሃንታ ማቲቴዬን፤ ናንዳካ ኦኬ ጋራ ማቲባ ሃንታ፣ ዬ ከቃቦ ጉዩ ማቲባ ውር ታታቺ። ²¹ ከክያጃዻ ሺጝ እያጜ ቶኳ፤ «ከውር ጊታይ ቶግ ጊዬይ ኣይ ኮማናጝ፤ ከካትካ ታሜንዻ፤ ሃሜይሼባ ዛርሱጝ፤ ይን ኣይባዻዬ ዋይሼንኬን ኣን። ²² ዬ ከልሳን ሃሳውኔን ሃዹዋልሺኔንካ ውር ጊታይ ማር ኣምኒዬን ዬ ማርካ ጊታይ ኣምኒዬኔን፤ ዬ ሃሳዋ ሃሳወን ሃካ ውር ጊታይ ኣምኒ ዬ ማርካ ውር ጊታይ ማር ኣምኒዬኔን። ²³ ኣኪ ውርካ ቶኦካ ይሁኔን ፓይላ ፑኡሺሜን ክየምጵኔ ጋኔን ከልሳን ሃሳውኔኔ፤ ኮማና ወይ ውር ጊታይ ማር ኣምኒዬን ሻዋ ሃምካ ቶኦያጝ፤ ሺጝኬኒ ጮያ? ²⁴ ኣይባዬ ፓይላ ጋኔን ከሃሳዋ ሃሳውኔኔ፣ ኮማና ወይ ውርካጝ ማር ኣምኒዬን ሁሉካያጝ ኖክዬንባ ከፓይላ፣ ከፓይላዻ ቶዬንባ፤ ²⁵ ኦይን ድኬ ሻን ክያንዻ ዹዋልሼንባ ፕርዻ፣ ባሪዮ ከኣኩሉክ ኣኔን ጫቃን ጊዬይ ክያኒ ሺጝ እያይኔ ኮምፓርሲዬ ይወንባ ባሪዮ። {ይሁኔን እን ኣይ ገዛጝ} ²⁶ ጪኒጌን ናኒ ዮ፤ ኣኪ ካሺጚ ኦ? ከሹካጝ የፑጪቶጝ ውር ክየም ክየም ኣኔ ይያሪ፣ ኣኔ እርርሲዬን፣ ኣኔ ዹዋልሺኔን፣ ኣኔ ከልሳን ሃሳውኔን፣ ኣኔ ሆኮልዬን። ዬ ይን ፓይላ ካኣይካ ጫንቃል ሻሜን። ²⁷ ካጝ ሃሳወን ከልሳኑጝ ኣኔያጝ፤ ዻ ወይ ጁዋንቲሽያጝ ጂያን ካሃሳውኬ ታራ ጊዬይ፤ ፕር ዶክ ካሆኮሊባ። ²⁸ ውርካጝ ካሆኮሊ ማር ኣኔንያጝ ከኦካ ጫቃንካ ውር ካጌይ ሹዬ፤ ካሃሳውሼ እሺ ኤምኑዬ ባሪዮዬ። ²⁹ ካሃሳውና ውርካ ቶግካ ባሪዮ ዻ ወይ ጂያን፤ ዶክ ፕር እን ሃሳዎጝ ካሄክንሲ ሹቃ። ³⁰ ከኦካ ጫቃንካ ውር ጊታይ ቆቢዻ ውር ክየም ክያጃ ኦኬ ክየምያጝ፤ ውርካ ሃሳዋ እንካ ሌሜን ካኡፍ ሹይ። ³¹ እየው ክየም ክየም ከእርርቴዬ እየው ክየም ክየም ከቁዋቅትሺሽቴዬ እየው ፓይላ ከታራ ጉዩ ከሃሳውቴ ሃሳዋጝ የቻሊያባ። ³² ኡሲ ጋራን ጊታይ ከውራንካ ቶካ ባሪዮ፤ ዋይሼንባ ውራን ካቶካ ባሪዮ። ³³ ባሪዮ ኣምላክ ሹቃ ዬ ማር ኣምላካ ጋሊንሺኔኔን፤ ከኦካ ቶኦካ ይሁኔንካ ውር ጊታይካ ይሁኔን ፓይላ ሃእያይ። ³⁴ ሃኣጚ ከኦካ ጫቃንካ ውር ካቃብ ሹይ፤ ከእያይ ክያጄዻ ሺጜ ካዋይሼንባዬ ዬ ካሃሳውኖጝ ካኒ ናሺሼኬን እንግን። ³⁵ ሃኣጚ ጊታይ ዎሲ እባጄን ኦኬ ክየም ክየም ኣኔያጝ፤ ካጋንሽ ጁማንቴን ጊዬይ ጶሮክ፤ ናንዳካኦ ሃኣጚ ሃሳወና ኦካ ጫቃንካ ውርያጝ ሃኬና ቦኩንሲ። ³⁶ ክያጃካ ባሪዮ ቱሎጝ ሃኬ እየዊ? ሞ ሄክሾጝ ሃናንዳካ እየውጵኒ? ³⁷ ውር ክየምጵንዻ ሺጝ ኣን ሃኣይ ውርካ ቶካ ባሪዮያጝ ወይ ሺጝ ሃኣኔ ኣይኔንካ መንፈስያጝ ሃቶኩሼ እየው ኣዬ ኤርጎካ ባሪዮጝ ካእባጅባ፤ ³⁸ ዬ ማራ ይን እባጄን ኣዬንያጝ፣ እሺዻ ካማር እባጄን። ³⁹ ዬ ጪኒጌን ናኒ ዮ፤ ናንዳካ ሃሳዋ ሃሳወን ዎሺባ ከቁዋቅቲ፤ ከልሳን ሃሳውኔንዻ ኦይድ ሃርጊንቴን፤ ⁴⁰ ኣይባዬ ፓይላ ካኣይኬ ሌሞዬ ልኪዬ።