13 ¹ ከኦካ ውሬ ከይዕሲዬን ሃሳውያ ልሳንያጝ፤ ዬ ናሺማ ማር ኦናኒ ኣኔንያጝ ሃውይኬ ናስ ኬና ኡቹኪ ወይ ሃውይ ጸናጽል ኬና ኮሺ። ² ሃኣኔያ ኣይኔንካ ሃሳዋ ሃሳወንያጝ፣ ኦካ ድኬን ፓይላዬ ኦኬ እባጄን ፓይላዬ ሃእባጅያጝ፤ ሃኣኔያ እምነት ኬናካ ቡጭ ጋግያጝ፣ ዬ ሃማርያ ናሺማ ኣኔንያጝ ሃማም እያይ። ³ እን ናኒ ኣኖጝ ፓይላ ሃኣያ ኩፓንያጝ፣ ሩዋ ናኒ ካጉድቦጝ ሻምሼያ ጉውያጝ፣ ዬ ናሺማ ማራ ኣኔንያጝ ክየምጵንዻ ጠቅምሼኬን ኣን። ⁴ ናሺማ ሃካ ዶንሺኔን፣ ፕርዻ ሃሌሞ። ቃይዬኬን፣ ጌርምኔኬን፣ ማቲዬኬን ውርካ ጵራጵራ። ⁵ ኣሽኪኬን ኦይን ማር ልኪ ኣዬኑጝ፣ ማር ኬናካ ሻም ውር ናሺዺካ እሺ ኤምኑዬን፣ ማኒሺሽኬን፣ ኮምኬን ሴሶ። ⁶ ናሺማ ሃኬ ኣኩሉክ ዬ ከሴሶ ኣይኬን ባሺ። ⁷ ናሺማ ሹ ጮል ዶንሺባ፣ ሹ ጮል ኣምኒባ፣ ሹ ጮል ሻምባ ቃቦ ሹቃ፣ ሹ ጮል ቁዋቅትሼ ዾርባ። ⁸ ናሺማ ክየምጵንዻ ቡድኬን፣ ኣይባዬ ኣይን ሃሳዋ ሃሳወኑጝ ጌርሺኔባ፤ ኣይን ልሳን ሃሳወኑጝ ሺዺባ፣ ኣይን ኦኬ እባጄኑጝ ጌርሺኔባ። ⁹ ናንዳካኦ እን ሃእባጅቶጝ ሃኬ ካሺዬን፤ ሃሳዋ ሃሳወንዻ ሃኬ ካሺዬን። ¹⁰ ኣይባዬ እን ኣይ ካሎን ኩናያጝ፣ እን ካሺዮጝ ጌርሺኔባ። ¹¹ ሃኣዬ ሃንታጝ ሃሃሳወንኬ ሃንታ፤ ሃቃቢኬ ሃንታዻ፤ ሃጶቅስያጆልኬ ሃንታዻ። ዬ ሃጌጵሾጝ ጩዋ ክያጃካ ናሳሞ ሃኦይዲያ። ¹² ጋን እን ሃቶዮጝ ከእያይ ቶዬ ሼዳያ ክያኑጝ ሃኬ [ድንጊዝጊዝ]፤ ዬ ከሹዋን ጊታይ ሃቶያ ከታካ ሌሜን። ጋን ሃእባጆጝ ሃኬ ካሺዬን፣ ከሹዋን ጊታይ ኣይን ኣን ኤምኑጝ ፓይላ ፓይላ ጊታይ ሃእባጆጝ ሃእባጅያ። ¹³ ኣኪ፤ እምነት፣ ቃቦ፣ ናሺማ፣ ኦኬ ጅያናን ጊታጝ ቁዋቅትሼ ቆባ፤ ከኦካ ጊታይዻ እን ሳጊ ሃናሺማ።