2 ¹ وانت ياللي تحكم على الناس الثانيين وبنفس الوقت تعمل أعمالهم ،أنت بلا عذر، مهما كنت. لانك لما تحكم عليهم، تحكم على نفسك كمان. ² وإحنا نعرف انُه الله يعاقب بالعدل اللي يعملوا هذي الأعمال . ³ فأيش تتوقع ياللي تحكم على الناس الثانيين وتعمل أعمالهم، تتوقع انك شتهرب من عقاب الله ؟ ⁴ او انك تتساهل بلطفه العظيم وصبره وأحتماله ؟ ماتعرفش انُه القصد من لطف الله هوانُه يوديك للتوبة ؟

⁵ بس أنت عنيد وقلبك قاسي ، فانت تخزن لنفسك غضب ليوم الغضب، يوم يعلن الله غضبه وعقابه العادل. ⁶ لانُه الله شيجازي كل واحد على حسب عمله. ⁷ فترجع الحياة الابدية للي يسعوا للمجد والكرامة والخلود مجتهدين على العمل الصالح، ⁸ ويكون الغضب والسخط ، للمتزاعلين اللي يرفضوا الطاعة للحق بس هم يتنازلوا للإثم. ⁹ والويل والعذاب لكل من يعمل الشر، لليهود وكمان للناس اللي هم مش يهود . ¹⁰ والجلال والكرامة والسلام لكل من يعمل الخير، لليهود وكمان للناس اللي هم مش يهود. ¹¹ لإنو الله مايجاملش احد .

¹² فالناس اللي ماعندهمش توارة موسى ويخطئوا، يُهلكوا حتى بدونها. والناس اللي عندهم توارة موسى ويخطئوا ، يُحكم عليهم بموجبها . ¹³ فمش من يتسمع لتلاوة التوراة هو يعتبر إنسان صالح عند الله . إنما اللي يطيع التوراة كلها . ¹⁴ فالناس اللي هم مش يهود وماعندهمش توارة موسى ، وعملوا بالفطرة اللي تأمر به الشريعة ، يكونوا شريعة لانفسهم ، مع ان الشريعة مش لهم . ¹⁵ وهذا يبين إنو ما تأمر بُه الشريعة موجودة بقلوبهم . وتشهد بيهذا ضمائرهم وأفكارهم بداخلهم ، تكلمهم متى عملوا الخطأ ومتى عملوا الصح . ¹⁶ وكل هذا يؤخذ بالإعتبار يوم يحاكم الله اسرار الناس عن طريق المسيح يسوع . فالإنجيل اللي أداعي بُه يقرر هذا . ¹⁷ والآن، انت تسمي نفسك يهودي وتتوكل على التوراة ، وتفتخربالله . ¹⁸ أنت تعرف التوراة ، ولهذا تفهم مشيئة الله وتعرف الفرق بين الحق والباطل . ¹⁹ وأنت تتوقع أنك قائد للعميان ، ونور للي هم بالظلمي ، ²⁰ ومؤدب للأغبياء، ومعلم للي هم مش متعلمين، وأنت وصلت لقمة المعرفة والحق لإنو عندك التوراة . ²¹ لحظة ، أنت ياللي تعلم الناس الثانيين ، ليش ماتعلم نفسك؟ أنت تصّيح وتقول : " لا تسرقوش "، فهل يصلح انك تسرق ؟ ²² أنت تقول : " لاتزنوش " ، فهل يصلح أنك تزني؟ انت تكره الأصنام ، فهل يصلح انك تنهب بيت الله ؟ ²³ أنت تتفاخربالتوراة ، فهل يصلح أنك تهين الله بأنك تعصي التوراة ؟ ²⁴ لان الكتاب يقول : " بسببكم انتم يا يهود ،الأجانب يكفروا بأسم الله . "

²⁵ فإذا كنت تعمل بأوامر التوراة ، شيكون لختانك قيمة. بس اذا كنت تخالف التوراة ، فالختان حقك مالوش قيمة . ²⁶ ومن جهة ثانية ، إذا كان في واحد مش مختون يعمل بفرائض الله ، مش يعتبره الله كإنو مختون ؟ ²⁷ فالناس اللي مش مختونيين يعملوا بفرائض التوراة يحكموا عليكم أنتم اليهود اللي تخالفوا التوراة بالرغم إنوا مكتوبة عندكم وأنتم مختونيين . ²⁸ لإنو اليهودي الحقيقي مش يهود بالمظهر. والختان الصح مش هو بس علامة بخارج الجسم ، ²⁹ انما اليهودي الحقيقي هو اليهودي بالقلب ، الختان الصح هو ختان القلب ، اللي هو الختان الروحي مش الحرفي . وهذا الإنسان قد ربما مايمدحوش الناس ، بس الله يمدحُهُ.