12 ¹ عشان كِذا يا إخوة، بما إنُه الله رئيف فيبنا ، رجاءً تُخلوا انفسكم أُضحية حيّ مُقدس مقبول عنده،فهذه هي عبادتكم الروحية. ² لا تُقلـدوا أهل الدنيا،لكن غيروا انفسكم وجددوا افكاركم،عشان تعرفوا إرادة الله ،إيش هو صالح ،وايش هو مقبول ،وايش هو كامل. ³ بفضل الله عليَّا، أوصي كل واحد منكم : لا تحسب نفسك إنك كبير،لكن خليك عاقل بتقدير نفسك،بحدود نصيبك من الإيمان اللي جابه الله لك. ⁴ الجسم الواحد فيبُه أعضاء كثير،لكن كل عضو له عمل محدد، ⁵ برضو نِحنا كذا أعضاء كثير،لكن جسد واحد بالمسيح ،وكل عضو مُرتبط بباقي الأعضاء. ⁶ كُل واحد مِننا عِندُه موهبة مختلفة حسب النعمة اللي جابها الله لكل واحد مِننا، اللي عنده موهبة التنبؤ، يتنبأ بالموافق للعقيدة، ⁷ واللي عنده موهبة الخِدمة،يُفرِّغ نفسه للخدمة،واللي عنده موهبة التعليم يُعلِّم ، ⁸ واللي عنده موهبة الدعوة يدعي،واللي عنده موهبة العطاء لازم يكون كريم،واللي عنده موهبة القيادة ،لازم يقود بإجتهاد، واللي عنده موهبة إنُه يظهر الرحمة ، يرحم بفرح. ⁹ المحبة لازم تكون بإخلاص وبلا نفاق،إبعدوا من الشر واتمسكوا بالخير. ¹⁰ حِبُّوا بعضكم البعض محبة إخوة،وكل واحد يكرم الثاني أكثر من نفسه. ¹¹ لا تكونوش كسِلين وخليكم نشيطين ،واخدموا الرب بحماس. ¹² إفرحوا بالرجاء،واصبروا وقت الضيق، وحافظوا على الصلاة. ¹³ ساعدوا اخوانكم المؤمنين بحاجاتهم،وضيّفوا الناس الغرباء.

¹⁴ إدعوا الله إنُه يبارك اللي يظلمكم،إطلبوا لهم البركة من الله ولا تلعنونهم. ¹⁵ إفرحوا مع الفرحين،وابكوا مع اللي يبكوا. ¹⁶ خليكم متفقين وعِيشُوا مع بعض،لا تتكبروا، كونوا متوضعين ،وصاحبوا الناس المساكين،ولا تحسبوا انفسكم أذكياء احسن من الآخرين.

¹⁷ لا تردوا على احد الشر بِشرّ،لكن إعملوا الخيرقُدام كل الناس. ¹⁸ حاولوا قدر الإمكان إنُه تعيشوا بسلام مع كل الناس. ¹⁹ يا إخواني لا تنتقموش لإنفسكم،وخلوا العقاب لله،لإنُه مكتوب :" يقول الرب :انا أنتقم، وأنا اللي بيجازي" ²⁰ لكن :"لو جويع عدوك أكِّلُه،وإذا عِطِش إسقوه،لإنُه بعملك هذا تطرح جمر نار فوق رأسه" ²¹ لا تُخلي الشرّ يهزمك ، لكن إهزم الشرّ بالخير.