6 ¹ يسوع المسيح خرج من هناك ، ومشي لبلادة وتلاميذة يتبعونه. ² ولما اجاء يوم السبت ، بدأ يعلم ببيت العبادة وكثيرمن الناس لماسمعوه أستغربوا ، وقالوا : " من وين له هذا ؟ وايش هذه الحكمة اللي معه ، ومن وين حصل على أذي القوه عشان يعمل المعجزات ؟ ³ مش هذا هو النجار ابن مريم وأخو يعقوب ويوسي ويهوذا وسمعان ؟ مش أخواته هنا معنا ؟ " وماكانوش يشتوا يقبلوه. ⁴ بس يسوع قلهم : " النبي مافيش معه كرامة إلا ببلاده ، وبين أهلة وببيته . ⁵ وما قدرش يعمل هناك مُعجزات ، إلا عالج ناس أمراض قليلين لما حط يداته عليهم . 6 وكان مستغرب لأنهم ما آمنوش. ⁶ وما قدرش يعمل هناك مُعجزات ، إلا عالج ناس أمراض قليلين لما حط يداته عليهم . 6 وكان مستغرب لأنهم ما آمنوش. ⁷ وبعدين أستدعى الأثنى عشر التلميذ ، وبدأ يرسلهم أثنين أثنين ، وجاب لهم قدرة على الأرواح الشريرة . ⁸ ووصاهم وقال : " ولا تأخذوا اي حاجة معكم ، لا خبز ، ولا زاد ، ولا فلوس بجيبوبكم إلا عصا بس . ⁹ إنما ألبسوا حذاء، وكمان لا تلبسوش ثوب ثاني . " ¹⁰ وقلهم : " أي بيت تدخلوه ، إجلسوا داخله لما تسيبوا البلاد. ¹¹ وأي مكان أهله يرفضوا يقبلوكم ويسمعوا لكم ، أخرجوا منه وأنفضوا الغبار من فوق أرجلكم كشهادة عليهم ". ¹² فمشوا وكانوا يدعوا الناس عشان يتوبوا. ¹³ وطردوا شياطين كثير ، ودهنوا ناس امراض مليان بالزيت وعالجوهم . ¹⁴ وسمع الملك هيرودس على يسوع ، لانُه اسمه اشتهر بين الناس. وكان بعض الناس يقولوا علوه إنو يوحنا قاقام من بين الاموات ، لهذا يعمل مُعجزات. ¹⁵ بس في ناس ثانين قالوا : " هذا النبي إيليا . " وناس ثانين قالوا : " هذا نبي مثل الأنبياء الأولين . " ¹⁶ ولما سمع هيرودس قال : " هذا هو يوحنا اللي انا قطعت رأسه ، قاقم من الموت . "

¹⁷ لانو هيرودس نفسه كانا قارسل ومسك بيوحنا وقيده داخل السجن ، بسبب هيروديا زوجة أخوه فيلبس اللي اتزوجها هيرودس، ¹⁸ ويوحنا كان يجلس يكلمه : " ما يجوز لكش تتزوج زوجة أخوك . " ¹⁹ لهذا هيروديا زعلت من يوحنا ، وكان تشتي تقتله ، بس ما قدرتش. ²⁰ لانو هيرودس كان يخاف من يوحنا وعارف انه رجال صالح و تقي ، فكان يحموه ، ولما كان يسمعه كان يرتبك زيادة ، إلا أنه كان يحب يستمع له. ²¹ وبعدين أجت الفرصة أخيراً لهيروديا ، لما عمل هيرودس عشاء لعظمائه وضباطه وشيوخ الجليل ، عشان يحتفلوا بعيد ميلاده . ²² ودخلت بنت هيروديا وجلست ترقص ، فاعجبت هيرودس والضيوف حقه . فقال الملك للبنت : " أطلبي أي حاجة مني تشتيها ، وانا بجيبها لك ." ²³ وحلف لها : " اللي تشتيه أنا شاجيب لك حتى لو نص المملكة حقي ." ²⁴ فخرجت وسألت أمها : " أيش أطلب ؟ " قالت لها : " أطُلبي رأس يوحنا المعمدان ." ²⁵ فجريت البنت لعند الملك وهي تلهف ، وكلمته بالحاجة اللي تشتيها : " أشتي منك تعطيني رأس يوحنا المعمدان هذي الساعة بوسط صحن ". ²⁶ فزعل الملك كثير . بس لأنو حلف لها أمام الضيوف حقه ، ماكنش يشتي يرفض طلبها . ²⁷ فالملك أرسل سياف بيهذيك الساعة ، وأمره انُه يجيب رأس يوحنا . فمشي وقطع رأسه بداخل السجن ، ²⁸ وجاب الرأس بفوق صحن ، وجابه للبنت ، والبنت جابته لأمها. ²⁹ ولما تلاميذ يوحنا سمعوا الخبر ، مشوا وأخذوا وجثته ، ودفنوها بوسط قبر. ³⁰ وأتجمعوا الرُسل عند يسوع ، وكلموه بكل اللي عملوه وعلموه. ³¹ وكان بُه كثير من الناس يجيئوا ويروحوا لعند يسوع وتلاميذه ، وماخلوش لهم فرصه يأكلوا الأكل . فقال يسوع للتلاميذ : " تعالوا معي وحدكم لمكان ما فيبوش حد وأرتاحوا قليل ."

³² فركبوا القارب وحدهم ، ومشوا لمكان ما فيبوش حد. ³³ بس في كثير شافوهم ماشيين ، وعرفوا لوين بيمشوا ،فأسرعوا من كل البلاد يمشوا على أرجلهم وسبقوهم لهذا المكان. ³⁴ فلما نزل يسوع من القارب ، شاف ناس كثير ، فرحمهم لانهم كانوا مثل الغنم اللي مالهاش راعي ، وجلس يعلمهم حاجات كثيرة.

³⁵ والوقت اتأخر ، وأجاءوا تلاميذه وقالوا : " هذا مكان مافيبوش حد ، والوقت قاتأخر. ³⁶ خلي الناس يمشوا للمزارع والقرى القريبة ، ويشتروا لهم حاجة يأكلوها ." ³⁷ فجاوبهم : " جيبوا لهم أنتم عشان ياكلوا ، قالوا له : " نروح نشتري خبز بمبلغ يساوي مُرتب ثمانية اشهر ، ونعطيهم عشان يأكلوا ؟ " ³⁸ فسألهم :" كم عندكم خبز ؟ روحوا أتاكدوا . " ولما عرفوا ،قالوا له : " خمس حبات خبز ، وثنتين سمك ." ³⁹ فأمرهم أنهم يخلوا الناس كلهم تجلس ، على شكل مجموعات مجموعات ، فوق العشب الأخضر. ⁴⁰ فخلوهم يجلسوا بمجموعات من ميه ومن خمسين. ⁴¹ وشل الخمس الحبات الخبز والسمكتين ، وشاف لفوق جهة السماء ، وشكر الله ، وبعدين قسم الخبز ، وجاب للتلاميذ يعطوها لهم ،وقسم السمكتين كمان للجميع. ⁴² وأكلوا كلهم لما شبعوا. وكان اللي أكلوا حوالي خمسة ألف شخص . ⁴³ وبعدين رفعوا باقي الخبز وباقي السمك ملأنة اثنى عشر سلة. ⁴⁴ وكان اللي أكلوا حوالي خمسة ألف شخص . ⁴⁵ وبعدين بساعته ، ألزم تلاميذه يركبوا القارب ويسبقوه لعند بيت صيدا ، علشان يخلي الناس تروح. ⁴⁶ وبعد ما ودعهم ، راح للجبل علشان يصلي . ⁴⁷ ولما الليل أجاء ، كان القارب بوسط البحيرة ، أما يسوع كان على البر وحده. ⁴⁸ فشافهم تعبانين من التجديف ، لأنو الريح كانت عكسهم . وقبل الفجر أجاء لهم يمشي فوق الماء ، وقا كان شيتجاوزهم . ⁴⁹ فلما شافوه يمشي فوق الماء، أتوقعونه شبح فصاحوا. ⁵⁰ لأنهم كلهم شافوه وخافوا ، بس هو كلمهم بيهذيك الساعة وقال : " إطمنوا ، انا هو ، لا تخافوش . " ⁵¹ وطلع لهم لفوق القارب ، والريح سكتت . فاستغربوا كثير، ⁵² لأنهم مافهموش ولا شيء من معجزة الخبز ، لأنو قلوبهم كانت قاسية . ⁵³ ولما عبروا البحيرة وصولوا لعند ساحل جنيسارت ، وربطوا القارب هناك.

⁵⁴ وأول ما نزلوا من فوق القارب ، الناس عرفوا بيهذيك الساعة انُه يسوع. ⁵⁵ فأسرعوا من كل أنحاء المنطقة ، وجلسوا يحملوا لعنده الناس الامراض على الفراش لكل مكان يسمعوا أنه فيبه. ⁵⁶ وأين ما يدخل ،إلى القرى أو المدن أو المزارع ، حطوا الناس الامراض بالساحات العامة مترجيين منه أنه يلمسونه حتى لو بالطرف حق ثوبه ، فكان اللي يلمسه يتعـــــالج .