2 ¹ وباليوم الثالث ، كان في عرس في قانا بناحية الجليل ، وكانت هناك أم يسوع . ² وكان المسيح معه دعوه للعرس مع تلاميذه . ³ والخمركمل بالعرس ،فقالت أم يسوع له : "ما فيش عندهم خمر." ⁴ وقله يسوع: " يا ماه ، ليش تشتينا أتدخل ؟وقتي عاده لسه ما جاش!" ⁵ فقالت امه للخدام : "اعملوا كُل اللي يقلكم." ⁶ وكان في هناك ست جرار حجر ، يعملوا فيبهن اليهود ماء للتطهير ، تستوعي كل وحده منهن من ثمانين لمائة وعشرين لتر. ⁷ فقال يسوع للخدام : "ملأو الجرار ماء." فملأوهن لما فاضت. ⁸ وبعدين قلهم: "والآن اغرفوا منها وجيبوا لرئيس الوليمة." فعملوا مثلما قلهم. ⁹ ولما طِعم رئيس الوليمة الماء اللي رجع خمر ، بس هو ما كنش يعرف من فين اجاء الخمر ، بس الخدام اللي جابوه كانوا عارفين . ¹⁰ فدعي للعريس وقله: "الناس كُلهم يجيبوا الخمرالجيد أول شيء ، وبعد ما تسكر الضيوف يجيبوا لهم الخمر اللي هو أقل جودة . أما أنت فبقيت الخمر الجيد الى الآن!" ¹¹ هذه أول معجزة عملها يسوع في قانا بناحية الجليل ، واظهر لهم مجده ، والتلاميذ آمنوا بُه. ¹² ورجع بعدين مشي لكفرناحوم هو وأمه وإخوانه وتلاميذه ، وسكنواهِناك لأيام قليلة . ¹³ واقترب عيد الفصح ، طلع يسوع للقدس . ¹⁴ حصل في الهيكل بياعين البقروالغنم والحمام ، وناس ثانين غيرهم جالسين يصرفوا العملات . ¹⁵ فصلح سوط من الحبال ، وطردهم كُلهم من داخل الهيكل مع الغنم والبقر حقهم . وبعثر بفلوس الصرافين وقلب الطاولات حقهم . ¹⁶ وكلم اللي يبيعوا الحمام: "شلوا هذا من هنا ، لاتخلوش بيت أبي سوق." ¹⁷ فتذكروا التلاميذ اللي هو مكتوب بالكتاب: "غيرتي على بيتك تأكلني." ¹⁸ فقال لهُ قادة اليهود: "سوي لنا معجزة عشان تثبت لنا إنو من حقك تعمل كل هذا ." ¹⁹ جوب عليهم يسوع : هدموا هذا الهيكل ، وأنا ابنيه بثلاث أيام." ²⁰ وقالوا له اليهود: "المعبد هذا ابتني بسته واربعين سنة ، وأنت كيف شتبنوه بثلاث أيام؟" ²¹ بس هو كان يقصد الى هيكل جسده . ²² فلما قام من الموت ، التلاميذ اتذكروا كلامه ، وآمنوا بالكتاب والكلام اللي قاله يسوع .

²³ ولما هو بالقدس بعيد الفصح، آمنوا فيبه ناس كثير لما شافوا المعجزات اللي يسويها. ²⁴ بس هو مأتمنهموش على نفسه ، لأنه كان يعرفهم كُلهم ، ²⁵ ومش محتاج لواحد يعلمه بالناس ، لأنه عارف اللي بقلوب الناس .