10 ¹ "أقلكم الصدق ، اللي ما يدخلش زريبة الكِباش من بابها ، فيجي من مكان ثاني ، هو سارق ولص . ² أما اللي يدخل من الباب فهو راعي الكباش، ³ والبواب يفتح له ، والكباش تسمع صوته ، ويدعي لكل واحد من الكباش باسمه ويقودها لخارج الزريبة . ⁴ ولما خرجهن كُلهن ، يمشي قُدامها وهي تتبعه ، لأنه تعرف صوته . ⁵ وهي ما تتبعش انسان غريب ، تهرب منه ، لأنها ما تعرفش صوت الانسان الغريب ." ⁶ ضرب لهم يسوع هذا المثل ، لكن ما فهموش إيش يقصُد .

⁷ فقلهم يسوع: "أقولكم الصدق : أنا هو الباب . ⁸ كُل اللي جاءوا قبلي كانوا سرق ولصوص ، بس الكباش ما سمعتش لهم . ⁹ أنا هو الباب . من دخل من عندي ينجي ، ويدخل ويخرج ويحصل مرعى . ¹⁰ السارق يجي عشان يسرق ويذبح ويُخرب . أما أنا جيت عشان تكن لكم حياة ، وحياة تمام .

¹¹ أنا راعي صالح ، والراعي الصالح يضحي بحياته عشان غنمه . ¹² والشاقي مش نفس الراعي صاحب الغنم . لو شأف الشاقي الذئب جاي لعنده ، يسيب الغنم ويهرب ، ويخطف الذئب الغنم ويأكلهن . ¹³ ويهرب لإنو شاقي وما تهمش الغنم . ¹⁴ أما أنا راعي صالح ، واعرف الغنم حقي ، والغنم حقي تعرفنا ، ¹⁵ مثلما ابي يعرفنا وأنا أعرفه . وأضحي بحياتي عشأن غنمي . ¹⁶ ومعي غنم ثانيات مش هن من هذه الزريبة ، ولابد أجمعهن لعندي جنب الأولات ، فيسمعن صوتي ، ويكون في هناك قطيع واحد وراعي واحد . ¹⁷ ابي يحبنا لأننا أضحي بحياتي عشان أرجعها . ¹⁸ ما فيش احد ياخذ حياتي مني ، لكن أنا أضحي بحياتي برضائي ، وعندي القدرة أضحي بحياتي ، وعندي القدرة أرجع حياتي مرة ثانية .هذه الوصية وصانا فيبه أبي."

¹⁹ وحصل خلاف بين اليهود بسبب هذا الكلام. ²⁰ فالكثير منهم قالوا: "فيبه شيطان ، وإنه مجنون . وليش تستمعوا لُه؟" ²¹ وفي منهم قالوا: "الكلام هذا مش من واحد فيبه شيطان . هل يقدر الشيطان يفتح عيون العُميان؟" ²² وجاء عيد التجديد بالقدس ،وكان هذيك الأيام شتاء، ²³ ويسوع كان يتمشي بقاعة سليمان بالهيكل . ²⁴ وتجمعوا الناس علوه وقالوا له: "لمتى شتجلس محيرنا؟ لو أنت المسيح صدق، قول لنا بصراحة." ²⁵ فجاوبهم يسوع: "أنا قلت لكم ، بس أنتم ما صدقتوناش ، والأعمال اللي اعملها بِاسم أبي هي تشهد لي . ²⁶ وأنتم ما صدقتوناش ، لإنكم ما أنتمش من الغنم حقي . ²⁷ غنمي تسمع صوتي ، وأنا أعرفها وهي تتبعنا . ²⁸ وأنا أجيب لها حياة أبدية ، فما تهلكش نهائياً ، ولا أحد ياخذها من يدي . ²⁹ أبي اللي جابها لي هو أقوى من الكُل ، وما أحد يقدر يشل حاجة من يد أبي . ³⁰ أنا وأبي واحد." ³¹ ومرة ثانية ، اليهود شلوا حجار عشان يرجموه . ³² فقلهم يسوع: " وريتكم أعمال صالحة كثير من عند أبي ، بسبب إيش من عمل منها شترجمونا ؟" ³³ جاوبونُه اليهود: "إحنا ما شنرجمك عشان عمل صالح عملتُه ، بس عشان كفرك ، فأنت إنسان وتخلي نفسك الله !" ³⁴ فقلهم يسوع: " موش مكتوب بكتابكم: أنا قلت إِنكم آلهة ؟ ³⁵ فالتوراة تدعي للي جاءت لهم كلمة الله آلهة ، والكتاب دائماً صحيح . ³⁶ فاللي اختاره الله ورسله للعالم تقولوا له كافر،عشان أنا قلت: أنا ابن الله؟ ³⁷ لو أنا ما أعملش أعمال أبي لا تصدقونا. ³⁸ بس لو أنا أعملها ، صدقوا هذا الأعمال لو ما صدقتموناش أنا ، ووقتها شتعرفوا وشتتأكدوا أن أبي فيا وأنا في أبي." ³⁹ فحاولوا مرة ثانية إنو يمسكونوه، بس هرب من بين أيداهم .

⁴⁰ ومشي للجهة المقابلة لنهر الأردن، للمكان اللي كان يوحنا المعمدان يعمد فيبه من قبل، وجلس هناك . ⁴¹ وجاءوا لعنده ناس كثير، وكانوا يقولوا: "يوحنا ولا عمل معجزة ، بس كُل اللي قاله عن هذا الرجّال طلع صحيح!" ⁴² وآمنوا فيبه ناس كثير هناك .