8 ¹ وخلاصة الكلام ،انه المسيح هو رئيس الكهنة، وجالس الآن بالسماء على يمين عرش الله العظيم، ² ويخدم بأقدس مكان،بخيمة العبادة الحقيقية اللي بناها الله نفسه،موش إنسان. ³ فوظيفة رئيس الكهنة انه يقدم لله الهدايا والذبائح، عشان كذا ضروري انه يكون مع رئيس الكهنة شيء يقدمه. ⁴ لو كان المسيح الآن بالأرض،كان ما بيكونش كاهن لانه في كهنة غيره يقدموا القرابين حسب التوراة. ⁵ والخدمة اللي يخدمونه بالأرض نسخة طبق الأصل للي بالسماء،عشان كذا الله نبه موسى قبل ما يبني خيمة العبادة بالأرض وقال له:" إنتبه! واعمل كل شيء مثل النموذج اللي وريته لك فوق الجبل ." ⁶ أما المسيح، وظيفته أحسن بكثير من وظيفة الكهنة،لإنه هوالوسيط اللي جاب لنا عهد جديد أحسن من العهد القديم،لانه العهد الجديد فيبه وعود أحسن.

⁷ فلو كان العهد القديم مافيبُش عيب،كنا ما شنحتاجش لعهد جديد يجي بدله. ⁸ لكن الله شافهم مذنبين وقال لهم :" هذا كلام الله ، شيجي وقت، أعمل فيبه عهد جديد مع بني إسرائيل ومع بني يهوذا . ⁹ موش مثل العهد الذي عملته مع آبائهم،لما مسكتو بيداتهم وخرجتوهم من مصر، لإنهم نقضوا العهد معي ، أهملتُهم.يقول الرب. ¹⁰ وهذا هو العهد اللي بعمله مع بني إسرائيل بعد هاذيك الأيام، يقول الرب: بخلي شريعتي بعقولهم، وشكتبها بداخل قلوبهم، وشاكون إله لهم، وهم بيكونوا شعبي. ¹¹ بعد كذا، ما لوش داعي انه الواحد يُعلّم قريبه ولا صاحبه ولا اخوه ويقول له : "إعرف الله" لانه كلهم بيعرفونا، من صغيرهم لكبيرهم. ¹² واغفر لهم ذنوبهم،ولا عاد بذكر لهم ذنب بعدين." ¹³ و لما يقول الله انه هذا عهد جديد، يعني انه العهد الأول رجع قديم. وكل شيء قديم وبالي، ينتهي بسرعة.