4 بالإيمان قدّم هابيل لله أضحية أحسن من اللي قدمها قابيل، ولأنه مؤمن الله تقبل منه وشهد له انه صالح ،ورغم انه هابيل مات مقتول، لكن مكانه لحد الآن نأخذ العِبَرمن إيمانه.
5 بالإيمان أخذ الله أخنوخ لعنده حي، بدون ما يموت، واختفي من الأرض وماحد حصله لأنه الله أخذه لعنده.وقبل ما يُرفع شُهد لُه انه أرضي الله. 6 وبدون إيمان لايمكن إرضاء الله، لأنه اللي يتقرب لله لازم يؤمن انه الله موجود،وانه يجازي اللي يطلبونه.
7 بالإيمان نوح، لما حذره الله من الطوفان اللي بيجي، خاف رغم انه ما قاشفش طوفان من قبل،بني سفينة عشان ينقذ نفسه وعائلته، وبإيمانه هذا حكم على العالم، وحصل نصيبه من الصلاح اللي يجي بالإيمان.
8 بالإيمان إبراهيم، أطاع الله لما أمره، وخرج من وطنه وراح لبلاد ثاني وعده الله انه بتكون له، وخرج من بيته وماهوش داري فين يتوجّه. 9 وبالإيمان عاش إبراهيم اللي وعده الله فيبه مثل الغريب ببلاد غريبة.وكان يسكن بالخيام،مع إسحاق ويعقوب ،شركائه بنفس الوعد. 10 لأنه كان ينتظر للمدينة السماوية الأبدية اللي أساسها ثابت،اللي صنعه وبنيها هو الله.
11 بالإيمان سارة زوجة إبراهيم قدرة تحبل، وولدت ابن رغم انه كانت عقيم وتجاوزت سن الحمل.لأنها آمنت انه الله ، اللي وعده لابد ما يوفي بوعده. 12 ومن هذا الرجّال اللي كان يعتبر قده ميت، خُلق شعب كثير بعدد نجوم السماء،وعدد الرمال اللي بساحل البحر.
13 وكل هذوم ماتوا وهم مؤمنين، وما حصلوش الأشياء اللي وعدهم الله فيبه،لكن شافونيه من بعيد وفرحوا فيبه،واعترفوا انهم غرباء ضيوف بهذه الأرض. 14 فاللي يقولوا هذا الكلام،واضح انهم يشتوا وطن. 15 ولو كان يفكروا بالوطن اللي تركونُه، كان معهم فرصة يرجعوا له. 16 لكن هم كانوا مشتاقين لوطن أحسن،وطن بالسماء. عشان كذا الله مايستحيش انه يكون إلههم،فجهز لهم مدينة .
17 بالإيمان إبراهيم ، لما أختبره الله، قدّم ابنه الوحيد إسحاق أضحية. فاللي معه وعد من الله كان مستعد انه يذبح ابنه الوحيد. 18 رغم انه الله قال له :" ذريتك اللي بتحمل اسمك، كلها بتجي من إسحاق ." 19 فإبراهيم آمن بالله انه قادر أنه يحي إسحاق من الموت. ونقدر نقول على سبيل المثال انه ابراهيم رجع ابنه من الموت. 20 بالإيمان إسحاق دعي بالبركة بالمستقبل لأولاده يعقوب وعيسو. 21 بالإيمان يعقوب قبل مايموت ، دعي بالبركة لعيال يوسف الإثنين،وسجد لله وهو متوكي على العصا. 22 بالإيمان يوسف، قبل ما يموت تكلّم انه بني إسرائيل بيخرجوا من مصر،و أوصي انه يأخذوا عظامه معهم.
23 بالإيمان موسى،بعدما ولد أبوه وامه خبئُنوه ثلاثة شهور، لانه شافوا انه الولد وسيم، وما خافوش من أوامر الملك. 24 وبالإيمان موسى نفسه، لما كبر، رفض انه يدعوا له الناس ابن بنت فرعون. 25 واختار انه يتحمل الذل مع شعب الله، بدل التمتع بملذات الذنوب المؤقت. 26 واعتبر انه الهيانة اللي بيتحملها من شان المسيح، ثروة أعظم من كنوز مصر كله، لإنه كان ينظر للمكافأة الأبدية. 27 بالإيمان، موسى خرج من مصر وهو موش خائف من الملك، وكان شجاع لانه شاف الله اللي ماحد شافه. 28 بالإيمان احتفل بالفِصح،ورش الدم على الأبواب، عشان ملاك الموت ما يلمسش أي واحد بِكر من بني إسرائيل.
29 بالإيمان مشوا بني إسرائيل بالبحر الأحمر كأنه أرض يابس،لكن لما حاولوا المصريين يمشوا غرقوا.
30 بالإيمان أتهدمت أسوار مدينة أريحا،بعدما طافوا عليها بني اسرائيل سبع أيام. 31 راحاب الزانية لإنه عندها إيمان،ما ماتت مع الكفرة، لانه استقبلت الجاسوسين بسلام.
32 إيش ازيد اجيب من أمثلة؟ الوقت ما يكفينا عشان أتكلم على جدعون وباراق وشمشون ويفتاح ودواد وصموئيل والأنبياء، 33 اللي بالإيمان هزموا الممالك، وحكموا بالعدل وحصلوا اللي وعدهم الله فيبه،وبالإيمان قفلوا لُقوف الأسود، 34 وطفوا النار المشتعل،ونجوا من القتل بالسيف. وبالإيمان رجعوا أقوياء بعدما كانوا ضعاف، ورجعوا أبطال بالمعارك، وهزموا جيوش الغرباء،
35 وبعض نسوانهم رجّعين أشخاص كانوا ميتين وبعدين قاموا من الموت.وآخرين أتحملوا التعذيب والضرب لما ماتوا، ورفضوا النجاة، لانهم عارفين انه بيحصلوا حياة أفضل. 36 وغيرهم كثير تحملوا الإهانة والجلد، والقيود بالسلاسل والحبس. 37 وفي منهم تحاكموا وماتوا رجم بالحجار، أو نشر بالمنشار،أو ذبح بالسيف. وبعضهم تشردوا وهم لابسين جلود غنم وكسب ، فقراء مقهورين ومظلومين ، 38 ماكنش هذا العالم يستحقهم،فتاهوا بالصحاري والجبال، وعاشوا بالكهوف والحُفر.
39 كل هذوم الله راضي عنهم لإنهم مؤمنين،لكن ما حصلوش اللي وعدهم فيبه. 40 لأنه الله جهز لنا شيء أحسن ،من مصيرهم ،وما يشتيهم يكونوا كاملين إلا فيبنا.مصيرهم