6 ¹ يا أولاد، واجب عليكم إن تطيعوا آباءكم وامهاتكم،لان هذا هو الصح. ² "اكرم ابوك وامك"هذه أول وصية مرتبط بوعد ، والوعد هو: ³ عشان تتوفق بحياتك، ويطول عمرك بالأرض."

⁴ وانتم يا آباء،لا تُزعلوا أولادكم، وربوهم بالأدب والتعليم اللي من الربّ. ⁵ واجب على العبيد انهم يطيعوا اسيادهم من البشرباحترام وخوف، واخدموهم بإخلاص من قلوبكم ،كأنكم تخدموا المسيح. ⁶ ولا تعملوا هذا بس لما يكونوا اسيادكم يراقبونكم، عشان يرضوأ عنكم، إنما كعبيد المسيح اللي يعملوا إرادة الله من كل قلوبهم. ⁷ إخدمونهم بفرح كأنكم تخدموا الربّ موش الناس. ⁸ واتذكروا انه الرب شجازي كل واحد منكم على الخير الذي يعمله، سواء كان عبد أو حر. ⁹ وانتم يا سادة ،عاملوا عبيدكم بنفس الطريقة، ولا تهددوهم، واتذكروا انكم انتم وهم كلكم فوقكم سيد واحد بالسماء، ما يُجاملش احد. ¹⁰ اخر شيء، خليكم أقوياء بالربّ وبقوته العظيمة. ¹¹ إلبسوا السلاح الكامل الذي من الله،عشان تقدروا توقفوا ضد خطط إبليس. ¹² حربنا ماهيش مع بشر، حربنا ضد حكام هذا العالم المظلم وقادته وأسياده، ضد إبليس بالعالم السماوي. ¹³ عشان كذا إحملوا السلاح الكامل الذي من الله، من شان تقدروا تقاوموا لما يجي يوم الشر، ولما تنتهي المعركة تكونوا ثابتين. ¹⁴ إصمدوا، إلبسوا الحقّ مثلما الحزام وسط الحقو، والصلاح مثل الدرع الذي يحمي الصدر. ¹⁵ والبسوا الحماس حذاء فوق أرجلكم، من شان تنشروا إنجيل السلام. ¹⁶ وفوق هذا كله، إحملوا الإيمان تُرس، لانه فيبه تقدروا تطفوا السهام الملتهب اللي يرميكم فيبه إبليس. ¹⁷ والبسوا النجاة خوذة فوق الرأس، اتسلّحوا بكلام الله مثل سيف يجيبه لكم الروح. ¹⁸ صلّوا بكل وقت بالروح بكل أنواع الصلاة والدعاء،إسهروا وواظبوا على هذا،وادعوا الله دائماً لكل المؤمنين. ¹⁹ ومن شاني أنا كمان، عشان يعطينا الله كلام لما أتكلم بلساني وأبشر الناس بقوة بسر الإنجيل. ²⁰ أنا هنا سفير للإنجيل، رغم اننا مقيد بسلسة من شانه.صلوا عشان أقدرأبلغه بشجاعة. ²¹ بيكلمكم تِيخِيكُس بكل أخباري وحالتي،لإنه اشتيكم تطمنوا عليّا،فهو أخ محبوب وخادم أمين للربّ. ²² و رسلتُه لعندكم عشان يكلمكم على حالتنا ويشجعكم.

²³ السلام والمحبة مع الإيمان من الله الآب والرب يسوع المسيح، لكل الإخوة.

²⁴ النعمة مع كل اللي يحبوا ربنا يسوع المسيح محبة ما تنتهيش أبداً.