4 ¹ أنا المحبوس من شان الرب،أوصيكم انه تعيشوا مثلما طلب الله منكم. ² خليكم دائماً متواضعين،لطيفين، صبورين، كل واحد يتحمل الثاني بكل محبة. ³ الروح خليكم واحد، لا تبخلوش بأي جهد وحافظوا على هذه الوحدة اللي يعملها الروح القدس بالسلام اللي يربطكم. ⁴ لإنه مافيش غير جسم واحد وروح واحد، مثلما دعيكم الله عشان تشتركوا كلكم بأمل واحد. ⁵ و ربكم واحد، والإيمان واحد ، ومعمودية واحدة، ⁶ الله واحد ، وهو أب لكل الناس ، ورب كل الناس ، ويستخدم الكل، وهو بالكل. ⁷ وكل واحد مننا له نصيب من النعمة مثلما قسم له المسيح. ⁸ مثلما يقول الوحي:" لما طلع للسماء ، أخذ معه أسرى كثير،وجاب للناس هدايا ." ⁹ وقصده انه " طلع" يعني هذا انه أول شيء نزل للمناطق الأرضية السفلى. ¹⁰ فالمسيح الذي نزل،هو نفسه الذي طلع فوق كل السماوات عشان يمتليء كل شيء بحضوره. ¹¹ وهو نفسه خلي بعض المؤمنين يكونوا رُسل، وبعضهم أنبياء ،وبعضهم مبشرين، وبعضهم رُعاة ومعلمين، ¹² عشان يجهز المؤمنين للخدمة وبناء كنيسة المسيح، ¹³ حتى نتوحد كلنا بالإيمان ومعرفة ابن الله، ونكون بالغين،ونوصل لشبه المسيح الكامل. ¹⁴ عشان ما نكون بعدين أطفال،تسحبنحنا الأمواج،وتشلنحنا الريح لهِنا وهِناك، أقصد بهذا التعليم اللي يجي من ناس خبثاء ونصابين، ويحاولوا انهم يضلوا الناس. ¹⁵ ونتكلم بالحق بمحبة، ونكون مثل المسيح بكل شيء ،فالمسيح هو الرأس ¹⁶ والجسم معتمد عليه، والاعضاء كله متصل مع بعضها البعض،وكل عضو يقوم بوظيفته المخصص له، وينمو الجسم كله ويبني نفسه بالمحبة. ¹⁷ أوصيكم بهذا باسم المسيح: لا تعيشوا بعد الآن مثلما يعيشوا اللي موش مؤمنين فيبه، بأفكارهم العقيمة، ¹⁸ وعقولهم مُظلمة،وبعيدين من حياة الله بسبب الجهل اللي فيبهم وقساوة قلوبهم، ¹⁹ وما عندهم أي إحساس ، وسلموا انفسهم للخلاعة عشان يعملوا كل الفواحش بلا خجل. ²⁰ لكن انتم تعلمتم من المسيح أمور تختلف على هذه. ²¹ أنتم سمعتم رسالته،وتعلمتم منه التعليم الموافق للحق اللي بيسوع ، ²² انه تتخلصوا من الطبيعة القديمة اللي كانت بالماضي تمشي حياتكم،وتقودكم للهلاك بالشهوات الخداعة، ²³ وتجددوا قلوبكم وعقولكم. ²⁴ وتلبسوا الطبيعة الجديدة، اللي خلقها الله حسب صفاته عشان تكونوا صالحين ومخصصين لله بالحق.

²⁵ لا تكذبوا أبداً، وعلى كل واحد أن يكون صادق مع الآخرين،لانه كلنا أعضاء بجسد واحد. ²⁶ إزعلوا لكن لا تُخلوش زعلكم يجركم للخطية، لا تخلوا الشمس تغيب وانتم مكانكم زعلانين، ²⁷ لا تجيبوا لإبليس فرصة بينكم. ²⁸ الذي كان سارق من قبل، لازم يبطل السرقة،ويشوف له عمل شريف ويتعب ويشتغل بيده ويصرف على نفسه ويساعد المحتاجين. ²⁹ لا تتكلموا بكلام بذيء من لقوفكم، إتكلموا بكل ما هو صالح يشجع الآخرين ومناسب لحاجتهم، ويكون بركة وفائدة للسامعين. ³⁰ لا تُزعّلوا روح الله القدوس، لأنه الله ختمكم فيبه كضمان مِنُه انه في يوم بيجي يفديكم فيبه. ³¹ إتخلصوا من كل حقد وانتقام وغضب وصياح وسب وكل شرّ. ³² خليكم لُطفاء وشفوقين بينكم البين، وسامحوا مثلما سامحكم الله لما آمنتم بالمسيح.