9 ومن يوم سمعنا الخبر هذا عليكم، ما وقفناش الصلاة عشانكم، ونسأل الله يعرفكم بكُل اللي يشتيه، ويجيب لكم كُل حكمة وفهم روحي. 10 عشان تمشوا الطريق اللي تليق بالرب وترضوه بكُل حاجة، وتثمروا بكُل عمل صالح، وتنموا بمعرفة الله. 11 ونسأل الله يقويكم بكُل قوة حسب قدرة مجده، عشان تصبروا وتتحملوا كُل حاجة بفرح. 12 واشكروا الآب اللي خليكم مؤهلين لتحصلوا على مكان مع الصالحين اللي يعيشوا في مملكة النور. 13 هو اللي انقذنا من ممكلة الظلام ونقلنا لمملكة ابنه المحبوب. 14 اللي ضحي بنفسه عشاننا وغفر الذنوب حقنا. 15 المسيح هو صورة الله اللي ما أحد يشوفه، وهو البكر على كُل اللي خُلق. 16 في المسيح الله خلق كُل اللي بالسماء والأرض: اللي يشأف واللي ما يشأفش، سواء كانوا ملوك وسادة وحُكام وقادة. كُل حاجة بالكون خُلق بواسطته وعشانه. 17 فالمسيح هله قبل كُل حاجة، وبالمسيح كُل حاجة بالكون تدوم. 18 وهو راس الجسد، اللي هي الكنيسة، وهو البداية والأول اللي قام من بين الأموات عشان يكون هو المتحكم بكُل حاجة. 19 فالله شاء أنوه يحل بكُل كماله بالمسيح. 20 وبالمسيح الله شيصالح كُل الكون مع نفسه، وشيصالح كُل شيء بالأرض والسماء. وبدم المسيح حصل السلام لما ضحي بنفسه على الصليب.
21 وأنتم من أول كُنتم منفصلين عن الله، وكُنتم أعداء لله بأفكاركم وأعمالكم الشريرة. 22 فصالحكم الله بموت المسيح بجسده البشري على الصليب، عشان يجيء بكم لعند الله صالحين وطاهرين وبدون عيب. 23 إذا جلستم ثابتين بالإيمان، وما تتخلوش عن الأمل اللي سمعتموه بالإنجيل، اللي أعلن فيبه لكُل الخلائق اللي تحت السماء، واللي انا بُولس اصبحت خادم له. 24 والآن انا فرحان بالتعب اللي الأقيها عشانكم، لأني بالتعب هذا بجسمي أكمل اللي نقص من تعب المسيح عشان جسده اللي هو الكنيسة، 25 اللي انا خادم لها، والله كلفنا أعلن رسالته كاملة عشان منفعتكم. 26 وهذا الرساله هي السر اللي كان ما حدش يعرفه طوال القرون والعصور الماضية بس الله كشفه الآن لشعبه الصالح. 27 اللي يشتي الله يعرفهم هذا السر العظيم اللي عنده للشعوب، وهو أن المسيح حي فيبكم، وهو أملكم بالنجاة. 28 فعلينا نبشر الناس كُلهم بالمسيح وننصحهم ونعلمهم بكُل حكمة، عشان نسلم الكُل لعند الله كاملين بواسطة المسيح. 29 وعشان هذا انا اتعب وأكافح متوكل على قوة المسيح اللي تعمل فيبي بقوة.