6 ولما قدنا قريب من دمشق ، وكان الوقت قده ظهر ، فجأة ضاءوا حولي نور ساطع من السماء ، 7 فسقطت على الأرض ، وسمعت صوت يقلي: شاول ، شاول ، ليش تؤذينا؟ 8 فقلت له: من أنت يا سيد؟ فقال: أنا يسوع الناصري اللي أنت تضطهده . 9 والناس اللي معي شافوا النور، بس ما سمعوش صوت اللي يكلمنا . 10 فقلت له: إيش أعمل يا رب؟ فقلي: قم وادخل دمشق وهناك شتعرف اللي لازم عليك إنك تعمله.
11 وقادونا اصحابي بيدي لدمشق ، لأننا ما كنتش أشوف بسبب شدة النور. 12 وكان في دمشق رجّال تقي اسمه حنانيا ، يعمل بالشريعة ، ويحترمه كُل اليهود في دمشق . 13 فجاء لعندي ووقف وقلي: يا أخ شاول ، شوف . فرجع لي بصري نفس اللحظة وشفته قُدامي ، 14 وقلي: إله آبائنا اختارك عشان تعرف إيش يشتي ، وتشوف البار وتسمع كلام من فمه . 15 وتكون شاهد له قُدام الجميع باللي شفته وسمعته ، 16 والآن، أيش تنتظر؟ قُم وتعمد واتغتسل من ذنوبك ، وادعي باسم الرب .
17 وبعدين رجعت للقدس . ولما كنت أصلي بالهيكل غبت من الوعي ، 18 وشفت المسيح يقلي : اسرع اخرج من القدس الآن ، لأن أهل القدس ما يقبلوش شهادتك عليا . 19 وقلت له: يا رب ، هم يعرفوا أننا كنت أدور في بيوت العبادة بعد المؤمنين فيبك عشان أحبسهم وأضربهم . 20 وكنت موجود لما قتل شهيدك استِفانوس ، وكنت راضي على قتله ، وحارس لملابس اللي قتلوه. 21 فقلي: امشي ، شأرسلك بعيد لعند الأمم." 22 والناس كانوا يستمعوا لبولس لما وصل لذكر الأمم ، صيحوا لقائد الكتيبة: "ابعد هذا الرجّال من الأرض ! ما يستحقش الحياة!"
23 وبعدين جلسوا يصيحوا ويلوحوا بثيابهم ، وينفشوا التراب بالهواء . 24 والقائد أمر عساكره يدخلوا بولس للمعسكر ويجلدوه ويحققوا معه عشان يعرف ليش الناس صيحوا علوه . 25 ولما العساكر ربطوه عشان يجلدوه قال بولس للضابط الموجود: "هل القانون يسمح لكم تجلدوا مواطن روماني قبل محاكمته؟" 26 ولما سمع الضابط هذا الكلام ، راح لعند القائد وقله: "إيش كنا بانفعل من غلطة لو جلدنا هذا الرجّال؟ هذا الرجّال روماني الجنسية!" 27 وراح القائد لعند بولس وسأله: "أنت روماني الجنسية؟" فقله: "ايوه." 28 فقله القائد: "أنا دفعت مبلغ كبير من المال عشان أحصل الجنسية الرومانية." وقله بولس: "أنا ولدت فيبه."
29 وبنفس الوقت ابتعدوا العساكر اللي كانوا مكلفين يحققوا معه ، وخاف القائد لما عرف أنه روماني ، لأنه قد كان قيده بالسلاسل.
30 وباليوم الثاني كان يشتي القائد يعرف ماهي التهمة اللي اليهود قالوها على بولس ، ففك قيوده ، وأمر يجيبوه لعند رؤساء الكهنة وكُل المجلس اليهودي ، وجاب بولس وجلسه قُدامهم .