13 فعرفوا اليهود اللي هم بتسالونيكي إنو بولس يبشر بكلمة الله في بيرية، فراحوا هناك عشان يحرضوا علوه فيثيروا الشعب. 14 فالإخوة أسرعوا وأرسلوا بولس لساحل البحر. وبقي سيلا وتيموثاوس في بيرية، 15 والرجال اللي مشوا مع بولس، وصلوه لعند أثينا وبعدين رجعوا ومعاهم وصية من بولس عشان يلحقوه سيلا وتيموثاوس بأسرع وقت ممكن. 16 ولما كان بولس ينتظرهم بأثينا، أتضايق زيادة لما شاف المدينة مليانة بالأصنام. 17 فجلس يتناقش بالمجمع اليهودي مع اليهود وغيرهم من الناس اللي يتعبدوا بالمجمع، واللي يحصلهم كل يوم بسوق المدينة. 18 فحصل خلاف بينه وبين جماعة من الفلاسفة الأبيقوريين والرواقيين. فمنهم قالوا: "أيش يشتي يقول هذا كثير الهدرة؟" وقالوا بعضهم: "شكله يتكلم عن آلهة غريبة."هم قالوا هذا لإنو بولس كان يبشر بيسوع المسيح والقيامة من الموت. 19 فشلوه وراحوا به لعند مجلس أريوباغوس وقالوا له: "نشتي نعرف أيش هذا المذهب الجديد اللي تتكلم علوه. 20 انت جالس تتكلم على مسامعنا بأفكار غريبة، فإحنا نشتي نعرف المعنى حقها." 21 وكان أهل أثينا، والأجانب اللي هم مُقيمين هناك، يجزعوا وقتهم بالتكلم على الافكار الجديدة والأستماع لها.
22 فوقف بولس بمجلس أريوباغوس وقال: "يا أهل أثينا، انا اشوف أنكم متدينين بكل حاجة. 23 لاننا كنتو أتمشي بالمدينة حقكم وأشوف للمعابد حقكم حصلتو معبد مكتوب علوه: لعبادة الإله المجهول. فهذا الإله اللي تعبدونه وأنتم ما تعرفوش، أنا ذلحين أبشركم فيبه. 24 هو الله خالق الكون وكل اللي فيه، هو رب السماء والأرض، وما يسكنش بمعابد يبنوها الناس. 25 فهو ما يحتاجش لخدمة الناس لإنو ما يحتاجش لأي حاجه. هو نفسه يجيب لكل الناس الحياة والنفس وكل حاجه. 26 وقاخلق كل شعوب البشر من رجال واحد، عشان يسكنوا كل الأرض، وحدد لهم الآوقات والأماكن اللي يعيشوا فيبها. 27 عشان يبحثوا عن الله لعلى يتقربوا لعنده فيهتدوا له! فهو مش بعيد على اي واحد مننا، 28 لإنو بُه نحيا ونتحرك ونوجُد. ومثلما قال واحد من الشعراء حقكم: إحنا كمان من ذريته! 29 وطالما إحنا من ذريه الله، لازم إنو ما نشوف للألوهية مثل صنم يصلحه الإنسان بفنه ومهارته من ذهب او فضة او حجر. 30 الله بالماضي أتجاهل هذا الجهل، أما ذلحين هو يأمركل الناس بكل مكان إنوهم يتوبوا. 31 لإنو حدد يوم يحاسب العالم بالعدل عن طريق الرجال اللي ختاره. وأثبت لجميع الناس على إنو اختاره بأنه أقامه من الموت".
32 فلما سمعوا عن القيامة من الموت، جلسوا بعضهم يتمسخروا، وبعضهم قالوا: "نشتي نسمعك مرة ثانية تتكلم على هذا الموضوع." 33 وبعدين خرج بولس من المجلس.
34 بس بعض الرجال رجعوا معه وآمنوا، ومنهم ديونيسيوس وهو عضو في مجلس أريوس باغوس، ومرة اسمها داماريس، وناس ثانيين غيرهم.