141
وبأيقونية دخل بولس وبرنابا لوسط المعبد اليهودي كعادتهم ، وجلسوا يتكلموا لما آمن تجمع كبير من اليهود واليونانيين .
2
بس اليهود اللي ما أمنوش ، اثاروا الناس اللي هم مش يهود على الإخوة وأفسدوا عقولهم .
3
إلا أنو بولس وبرنابا جلسوا هناك فترة طويلة يتكلموا بجراءة على نعمة المسيح . وكان يؤيد رسالتهم بأنه جاب لهم القوة عشان يعملوا بالمعجزات والعجايب .
4
وأهل المدينة أنقسموا. فبعض الناس أيدوا اليهود والناس الثانين أيدوا الأثنين الرُسل .
5
وكان في هناك مؤامرة بين الناس اللي هم مش يهود والناس اليهود مع القادة حقهم عشان يهجموا على الرُسل ويرجموهم بالحجار.
6
فأحس بولس وبرنابا بيهذا ، فهربوا لأثنتين مُدن بليقونية وهي لسترة ودربة ولمناطق مجاورة .
7
وهناك دعوا بالُبشرى كمان.
8
وكان يجلس بلسترة رجال معاق بأثنتين الأرجل ، كان مُعاق من لما ولد، وما مامشيش ابداً .
9
وكان يتسمع لبولس لما كان يتكلم .. فشاف بولس لعنده ، وشاف انو عنده إيمان عشان يحصل على الشفاء،
10
فقله بصوت عالي : " قم وقف على ارجلك . " فقفز الرجال ومشي.
11
فلما الناس شافوا أيش عمله بولس ، صاحوا بلغة ليقونية وقالوا : " الآلهة تشكلت بصورة بشر وأجاءت لبيننا ."
12
فسموا على برنابا اسم زفس وبولس هرمس ، لأنه كان يُدير الكلام .
13
وكان عند المدخل حق المدينة معبد للإله زفس ، فجاب كاهنه عجول وتيجان من الزهور لعند بوابة المدينة ، وأراد هو والشعب أنهم يقدموا ضحايا لهم .
14
فلما سمعوا الأثنين الرُسل برنابا وبولس بيهذا ، قطعوا الثياب حقهم وجروا لعند الجمهور.
15
وهم يصيحوا : " يا ناس ، ليش تعملوا كذا ؟ إحنا مجرد بشر مثلكم ، وإحنا نبلغكم بالبشرى عشان ترجعوا من هذه الأمور اللي مالهاش داعي الى الإله الحي اللي صنع السماء والأرض والبحر وكل اللي فيها .
16
وقا ترك الأمم بالعصور اللي قاذهبين يمشوا بطرقهم ،
17
مع انه ما سيبهومش بدون شاهد يدلهم علوه . فهو عاده ينعم عليكم بالخير ، ويجيب لكم المطر من السماء ، والمحاصيل بوقتها ، ويشبعكم بالأكل ، ويملأ قلوبكم بالفرح . "
18
وعلى الرغم من هذا الكلام ، قدروا بصعوبة أنهم يمنعوا الناس من تقديم الضحايا لهم.
19
وبعدين أجاءوا بعض اليهود من انطاكية وإيقونية ، وأقنعوا الشعب ، فرجموا بولس وسحبوه خارج المدينة وتوقعوا انُه مات .
20
بس التلاميذ ألتفوا علوه فقان ودخل المدينة . وبعدين يوم ثاني سافر هو وبرنابا إلى دربة .
21
وجلسوا الأثنين الرُسل ينادوا بالبشرى في دربة ، فكان كثير منهم تلاميذ للرب . وبعدين رجعوا لسترة ،ومن هناك لأيقونية ، وبعدين أخر شيء لأنطاكية .
22
وبيهذي الأماكن كلها كانوا يشددوا التلاميذ ويشجعوهم أنهم يثبتوا بالإيمان . وقالوا : " لازم انه نتوجع زيادة عشان ندخل مملكة الله . "
23
وبولس وبرنابا اختاروا شيوخ لكل جماعة ، وبعدين صلوا بأصوام وسلموا على الجميع وديعة بين يدي الرب اللي آمنوا به .
24
وبعدين سافروا من منطقة بيسيدية ، ووصلوا إلى بمفيلية.
25
وبشروا بكلمة الله في برجة ، وبعدين سافروا إلى أتالية .
26
ومن هناك عادوا بالبحر الى مدينة أنطاكية ، من اين في مؤمنين قا سلموهم إلى نعمة الله عشان يعملوا بالعمل اللي عملونه.
27
ولما وصلوا إلى انطاكية ، جمعوا المؤمنين مع بعض وكلموهم بكل اللي عمله ربنا عن طريقهم ، وكيف انُه فتح باب الإيمان للشعوب الثانيين .
28
وجلسوا هناك مع التلاميذ مدة طويلة .