4 واما اللي يفعل الذنب، فهو يخالف شريعة الله. فالذنب هو مخالفة الشريعة. 5 وانتم عارفين انوه المسيح جاء عشان يتحمل ذنوبنا، مع انوه المسيح ولا فيبه ذنب. 6 واي واحد يتبع المسيح. ما يذنبش. واللي يذنب، فهم ما شافوش المسيح ولا عرفوه.
7 يا أولادي الغاليين، ما تخلوش واحد يزيد علوكم، فاللي يعمل الصلاح فهو صالح، مثلما المسيح صالح. 8 واللي يفعل الذنب، فهو يتبع إبليس، لانوه إبليس مذنب من أول. وقا جاء ابن الله للدنيا عشان يوقف اعمال إبليس. 9 أولاد الله ما يفعلوش ذنب، لأنوه طبيعة الله قاهي ثابتة فيبهم، وما يقدروش يفعلوا الذنوب لانوهم أولاد الله. 10 وكذا نقدر نفرق بين أولاد الله وأولاد إبليس: فاللي ما يعملش الصلاح فهو موش من أولاد الله، وكمان اللي ما يحبش اخوه. 11 وهذه هي الوصية اللي سمعمتوهي من أول: خليكم متحابين بينكم البين. 12 وما تكونش مثل قابيل اللي قتل اخوه لانوه كان يتبع إبليس. وليش قتله؟ لانوه الأعمال حقه كانت شريرة وأعمال اخوه كانت تمام. 13 يا اخواني ، ما تتعجبوش لو كان أهل الدنيا يكرهوكم. 14 احنا عارفين انحنا انتقلنا من الموت للحياة، لانحنا نحب اخواننا. واللي ما يحبش اخوانه، فهو جالس ميت. 15 واللي يكره اخوه فهو قاتل. وانتم عارفين انوه القاتل ما فيش معه حياة ابدية.
16 وكذا نعرف المحبة الصح: نفس المسيح ضحي بنفسه عشاننا. فاحنا لا بد علينا نضحي بانفسنا عشان اخواننا. 17 لو كان واحد حالته المادية تمام، ويشوف اخوه محتاح، وما يرحمش، فكيف شتكون محبة الله هله بقلبه.
18 يا أولادي الغاليين، لا بد تكون المحبة الصح بالأفعال، موش بالكلام واللسان. 19 وكذا نعرف انحنا نمشي بطريق الحق، وتكون قلوبنا مرتاحة قدام الله. 20 وحتى لو كانت قلوبنا تلومنا على حاجة، فالله اكبر من قلوبنا ويعرف كُل حاجة.
21 يا احبابي، لو القلوب حقنا ما تلومناش، فاحنا نقدر نقرب من الله بثقة. 22 والله يجيب لنا كُل اللي نشتي، لانحنا نطيع اللي وصانا فيبه، ونعمل الأعمال اللي ترضوه. 23 ووصيته انحنا نؤمن بابنه يسوع المسيح، ونكون متحابين بينتنا البين. 24 ولما نطيع وصايا الله، فاحنا نكون نثبت فيبه وهو يثبت فيبنا. واحنا نعرف انوه الله ثابت فيبنا بالروح القدس اللي جابه الله لنا.