^{1 2} ಗಣು ಅಚ್ಹುಚಥೆ ಥೆಯೋಪಿಲ, ಹಮರಕನ ಜುಣನ ಅಯುಥೆ ಕಾಮ್ನ ಅಗಡಿಥಿ ದೊಳಥ್ಹಿ ದೆಖಿನ್ ಸುವರ್ಥ್ಹ ವಕ್ಯಮ್ನ ಬೋಳುಕರಸ್ಥ್ಹೆ ಹಮುನ ಮಲಮ್ಕರಯುಥೆ ಇಮ್ಮಸ್ ಯೋ ಕಮುನ ಪಿಚ್ಚರ್ನಿ ಗೋಣಿ ಲಿಕ್ಕನ ಖ್ಹರುಜನು ಪ್ರಯತ್ನ ಕರಿಯುಥಿಂ ³ ಮೇ ಪೆಧ್ಹಡ್ಡ್ ತಿ ಖ್ಹರುಸ್ ಪಶ್ಹಂತ್ರ ವಿಚರಂ ಕರಿಯೋಥಿಂ ಕರಣಂ ತುಖ್ಹರು ತುಮುನ ಬರೋಬರ್ತಿ ಲಿಕ್ಕನು ಅಚ್ಹುಕರಿನ್ ಮನಬಿ ಸೋಚಯು. ⁴ ತುಮುನ ಬೋಲಿರಕ್ಯಥೆ ವಿಷಯಮ್ಕರಿ ಖ್ಹಚ್ಚಕರಿನ್ ಅನೆಥಿ ತುಮೆ ಮಲಮ್ಕರಜೈ. ದೇವದುಥಂ ಸ್ನನಿಕವಾಲೋ ಯೋಹನ ಪೈದಹುವನು ಅಗಡಿ ತಿಲಿಸಯೋ ⁵ ಯುದಯಮ ರಜ್ಹ್ಹುಯುಥೆ ಹೆರೋದನ ಕಾಲಮ್ಮ ಅಬಿಯ ಝ್ಹುಗೋನ ಶೆರಿಯುಥೆ ಜಕರಿಯಕರಿನ್ ಯೆಕದ್ಮಿ ಗಲ್ದೋಥೋ. ಇನಿ ಬೈಕೋ ಆರೋನನ ಜಥ್ವಳಿತಿ. ಇನು ನಮ್ ಏಲಿಸಬೇತ್. ⁶ ಇವನೇ ಬೆಜನಿ ದೆವುನಿ ಖ್ಹರಿ ಅಗ್ನೆಮ್ನ ನೆಮನಿಸ್ತಮ್ಖ್ಹರು ಪಡಿಲಿನ್ ಥಪ್ಪೊಕೊಇನಿಥೆ ಚ್ಚಲಿಲಿನ್ ದೆವುನ ದೊಳಮ ನಿಥಿವಲುಥೊ. ⁷ ಕತ್ಹೋ ಏಲಿಸಬೇತ ವನ್ಜ್ಹ್ಹನಿಥಿ ಇನ ಲಡಕ ಥ್ಹಕೊಇನಿ; ಅಮ್ಕಯೇಥೆ ಇವನೇ ಬೆಹೆಜ್ಹ್ಹನ ಬೋಡ ಹುಇರಥ್ಹ . ⁸ ಅಮ್ಕತ್ಹೋ ಜಕರಿಯನ ಕನ್ನೇನು ಸರದಿ ಅಇತ್ಹೋ ಇವನೇ ದೆವುನಿ ಸಂನಿದಿಮ ಗುರುನಿ ಜಯ್ಹ್ವಳನಿ ಚ್ಚಳವನಿ ಭದ್ಮ ⁹ ಗುಡಿಮ ಜೈನ ದಿವುಖ್ಹಲ್ಗವನು ಗುರುನಿ ಪದ್ದತಿ ಪ್ರಕಾರ ಇನಿ ಜಾಗೋ ಆಯಿತು . ¹⁰ ದಿವೂ ಖ್ಹಲ್ಗವನು ಸಮಯಮ್ಮ ಆದ್ಮಿ ಗುಮ್ಬ್ ಖ್ಹರು ಭ್ಹದರ್ ಉಬಿರೈನ್ ದೆವುನ ಪ್ರಥಾನೆ ಕರ್ಥನಿ. ¹¹ ದೆವುನು ದೂತ ಚ್ಚುರಿನ ಖ್ಹವಥ್ನಿ ಬಜ್ಹ್ಹು ವುಬ್ರೋಥೆಥರ ಇನ ದೆಖ್ಹಯೋ . ¹² ಜಕರಿಯನ ಇನ ದೆಖ್ಹಿನ್ ಕಪಿನ್ ಡರಿಗಯೋ. ¹³ ಕತ್ಹೋ ಯೋ ದುಥ ಇನ ಜಕರಿಯ ದರ್ನಕೋ ತಾರಿ ವಿಜ್ಞಾಪನ ದೆವುನ ಚ್ಚಿಮಿಯೋ ; ತಾರಿ ಬೈಕೊಹುಇರಿಥೆ ಏಲಿಸಬೇತ್ ತುಣ ಏಕ್ ಚ್ಚಿಯ್ಯೋ ಝ್ಹನಿದಿಷೆ . ¹⁴ ತು ಇನ ಯೋಹಾನ್ ಕರಿನ್ ನಮ್ಮೆಳುನು ತುಣ ಖುಸೀ ಆನಂದಂ ಹುಸೆ ಬುಜ್ಹ್ಹು ಯೋ ಪೈದಹುಯೋಯ್ಹೆ ಟೆಕೆ ಘ್ಹನು ಆದ್ಮಿ ಖ್ಹುಸಿಪದದಿಯು . ¹⁵ ಯೋ ದೆವುನಿ ನಜ್ಹ್ಹರ್ಮ ಮೊಟುಪುರುಷ ಹುಇರಶೆ ದ್ರಕ್ಸಿನು ರಕ್ಹ್ಹ್ ಕೆಯೋಬಿ ನಿಶನು ; ಪೈದಹುಥೆ ಥದೆಶ್ ದೆವುನಿ ಅತಂ ಭಾರೈರಷೆ . ¹⁶ ಇಸ್ರಯೇಲ್ಮ್ಮ ಖ್ಹರವುನ ಇವುಣ ದೆವುಹುಇರೊಥೆ ದೇವೂ ಭ್ಹನಿ ಫರವುಷೆ. ಯೋ ಇನ ಖ್ಹಂನೆ ಜೈನ ಎಲಿಯನ ಗುನಶಕ್ತ್ಹ್ಹಿಥಿ ಕುಡಿಭ್ಹರೈನ್ ¹⁷ ಭಾನು ದಿಲ್ನ್ನ ಲಡಕಮಣಿ ವಿದವರಲ್ನ್ನ ನಿಥಿವನ್ಥ್ಹನ ಬುದ್ದಿನಿ ಭ್ಹನಿ ಫ್ಹರೈನ್, ದೆವುನತೆಕೆ ಅದ್ಮಿನ ಬರೋಬರ್ಕರ್ಷೆ ಕರಿನ್ ಬೊಲಿ. ¹⁸ ಜಕರಿಯ ಯೋ ದೇವದುಥನ - ಅನಾ ಮೇ ಕಿಮ್ ಮಲಮ್ಕರು ? ಮೇ ಭ್ಹುಡೂ; ಮಾರಿ ಬೈಕೋ ಬುಡಿಹುಇಗಿ ಕರಿನ್ ಬೋಲಿಯೋತೆಕೆ ¹⁹ ಯೋ ದೇವದುಥ - ಮೇ ದೆವುನಿ ಸನ್ನಿದಿಮ ವುಬಿರುಸ್ಥೆ ಗಾಬ್ರಿಯೆಲ ; ತುನಬಿ ವಥೆಬೋಲಿ ಅ ಅಚ್ಚಿವಥೆನ ತುಣ ಮಲಮ್ಕರವನ ಮನ ಬೋಲಿಮೊಕ್ಲಿಯು. ²⁰ ಅ ಮಾರಿ ವಥೆ ತೋಡಿ ಸಮಯಮ್ಮ ಬರೋಬರ್ವುಷೆ; ತದೆ ತು ಇನ ನಮ್ಬಿಯೊಕೊಇನಿಥೆ ಯೋಖ್ಹರು ವುಷೆಥೆ ದಂಥೆಬಿ ವಥೆ ಬೊಲಿಯೊಕೊಇನಿಥೆ ಮುಕ್ಕು ಹುಇಜಷೆ ಕರಿನ್ ಇನ ವುಥ್ಹರಂ ದಿದು . ²¹ ಯೆತ್ರಸ್ನಮೈ ಆದ್ಮಿ ಜಕ್ರಯನ ಜಾಪಿರೈನ್ ಯೋ ಮಂದಿರಮ್ನ ಮೈ ಲೆತ್ಕರ್ಥರೈ ಅಶ್ರಯಂ ಪಡಿನ್. ²² ಯೋ ಭ್ಹದರ್ ಅವುಥಲಿನ್ ಇವನ ಜೋಡ್ಮ ಶಥ್ಬಿ ಬೋಲಿಯು ರಾಯು ಯೋ - ಅನಾ ಮಂದಿರಮ್ಮ ಶಥ್ಬಿ ಅಚ್ಚಿ ಖ್ಹೊನಿಯು ಕರಿನ್ ಮಲಮ್ಕರಿಯು. ಜಕರಿಯ ಇವನ ಕ್ರಸೈವಳು ಕರಿನ್ ಮುಕ್ಕುಸ್ ತೂ. ²³ ಯೋ ಗಲ್ದೋನಿ ಟೋಲ್ವಳು ಸೇವೇನು ದಂಖ್ಹರು ಪಿತಿಜ್ಹ್ಹಥಲಿ ಜಕರಿಯ ಇನ ಗರ್ಕನ ಗಯು. ²⁴ ಯೋ ದನ್ಹುಯುತದೆ ಇನಿ ಬೈಕೊಹುಇರಿಥೆ ಯೆಲಿಸಬೇಥ ಗರ್ಬಿಣಿ ಹುಇನ್ ಮಚ್ಹ್ ಮೈನ ಗರ್ಮಾಸ್ ಲಪಿರಿಥ್ಹಿ. ²⁵ ದೇವೂ ಅ ಕಾಲಮ್ಮ ಮನ ಆಜ್ಞೆ ದೀನ್ ಮನ ಅ ರಿಥಿಖ್ಹು ಮನ ಅದ್ಮಿಮ ಮನಚಥೆ ಅವಮನಮ್ನ ಪರಿಹರಮ್ಕರಿಯೊಕುಇನ ಕರಿನ್ ಬೋಲಿಯು. ದೇವದುಥ ಯೇಸುನ ಪೈದಹುವನು ಅಗಡಿ ಮಲಮ್ಕರಯುಥೆ ²⁶ ಚ್ಹೊಮಮೈನಾಮ ದೇವೂ ಗಬ್ರಿಯೇಲಕರಿನ್ ಇನಿ ದೇವದುಥನ ಗಲಿಲಯ ಥಬರ್ಕಾಮ ನಜರೆಥ್ಕರಿನ್ ಗಮ್ಮ ಏಕ್ ಕವಾರಿ ಚ್ಹೊಗ್ರಿಕನ ಮೊಕಿಲಿಯು; ²⁷ ಯೋ ಕವರಿಕನು ನಮ್ ಮರಿಯಲ್ ; ಯೋ ದವಿದನ ಗರ್ವಳನ ಯೋಸೆಪಕರಿನ್ ಅದ್ಮಿನ ಮಂಡವಣಿ ಖ್ಹಗೈನಕಿರಕಿತು. ²⁸ ಯೋ ದೂತ ಇನಕನ ಅಇನ್ ` ದೆವುನು ದಯಾ ಹೊಂದಿರಕಿಥೆ , ತುನ ಅಚ್ಹುಹುವಾದ ;ದೇವೂ ತಾರಿ ಜೋಡ್ಮ ಚ್ಹ , ಕರಿನ್ ಬೋಲಿಯು. ²⁹ ಯೋ ಇನಿ ವಥೆನ ಗಬ್ರೈಗು-ಆಶನಿ ಅಶ್ರೀವದಂ ಕರಿನ್ ಸೋಸ್ಥಲಿನ್ ³⁰ ಯೋ ದೇವದುಥ ಇನ - ಮರಿಯಳ, ದರ್ನಕೋ ; ತುನ ದೆವುನಿ ದಯೆ ಮಳಿ . ³¹ ಅದೆಕ್, ತು ಗರ್ಬಿಣಿ ಹುಇನ್ ಏಕ್ ಚೋಗ್ರನ ಪೈದಕರೀಶ್ ; ಇನ ಯೇಸುಕರಿನ್ ನಮ್ಮೆಲ್ನು ³² ಯೋ ಮೋಟು ಅದ್ಮಿಹುಇನ್ ಪರಮಾತ್ಮನು ಚೋಗ್ರು ಬೋಲೈಲ್ಷೆ; ಅತ್ರೆಸ್ ಕಯೇಥೆ ದೇವೂ ಹುಇರೋಥೆ ದೆವು ಇನ ಪರಂಬರಿನ ದವಿದನ ಸಿಂಹಸನಂನ ಇನ ದಿಶೆ. ³³ ಯೋ ಯಕೊಬನ ವಂಶಮ್ವಲನ ಗಾನ ಕಲಾಂ ಚ್ಚಳವುಷೆ; ಇನಿ ರಾಜ್ಯಮ್ನ ಅಂತ್ಯಂ ಕೊಇನಿ ಕರಿನ್ ಬೋಲಿಯು . ³⁴ ತದೆ ಮರಿಯಲ್ ಯೋ ದೇವದುಥನ - ಅ ಕಿಮುಷೆ? ಮೇ ಉಜುಬಿ ಕವರನ ದೆಖ್ಹಿಹುಇ ಕಾಯೇನ ಕರಿನ್ ಬೋಳ್ತ್ಹನಿ ದೇವದುಥನು - ³⁵ ತಾರ ಉಪ್ಪಾರ್ ಪವಿತ್ಹ್ರಥ್ಮ ಅವುಸೆ; ಪರಮಾತ್ಮನಿ ಶಕ್ಥ್ಹಿ ನು ಚ್ಚಲೋ ಥರ ಉಪ್ಪಾರ್ ಪಡ್ಷೆ; ತದೆ ಪೈದವುಸೆಥೆ ಯೋ ಪವಿತ್ರ ಲಡುಕು ದೆವುನು ಲಡುಕುಬೋಲೈಲ್ಷೆ. ³⁶ ಉಜು ತಾರಿ ಬಂದುಗುಲ್ ಏಲಿಸಬೇತ್ ಛಕೊಇನಿನ, ಯೊಬಿ ಬುಡಿಯಹುಇಗಿತೋಬಿ ಗರ್ಬಿನಿಹುಇ; ಇನಿ ಗರ್ಬಮ್ಮ ಪರ್ಖ್ಹೋ ಲಡುಕು ಚ್ಹ; ವಂಜ್ಹ್ಹನಿಹುಇರಿಥಿಥೆ ಇನ ಹಂಖೆ ಚ್ಹೋಮೈನಹುಇರಸ್. ³⁷ ದೆವುಥ್ಹಿ ಹುವ್ವಕೊಇನಿಥೆ ಖೆಹುಬಿ ಕೊಇನಿ ಉಜು ದೆವುಥಿ ಅವಸ್ಥೆ ವಥ್ಖ್ಹರುಬಿ ಜ್ಹುಟಿಕಯೇಕರಿನ್ಬೋಲಿಯೋ. ³⁸ ತದೆ ಮರಿಯಲ್ ದೇಕ್ ,ಮೇ ದೆವುನಿ ದಾಸಿ ; ತಾರಿ ವಥೆಥಿಸ್ ಮನಹುವ್ವದ ಕರಿನ್ ಬೊಲಿ. ಇನ ಉಪ್ಪಾರ್ ಯೋ ದೇವದುಥ ಇನಕಂತು ಚ್ಚಲಿಗಯು. ಯೇಸುನಿ ಅಯಹುಇರಿಸ್ಥೆ ಮರಿಯಲ್ ಯೋಹಾನ್ನಿ ಅಯನ ಬೆತಿಹುಯುಥೆ, ಉಜು ದೆವುನ ಖ್ಹುಸಿಪಡಿಸಯುಥೆ. ³⁹ ಯೋ ಕಾಲಮ್ಮ ಮರಿಯಲ್ ಉಟಿನ್ ಅವಸರಮ್ಥ್ಹಿ ಪನಿನಿದೆಖ್ಹ್ಮ ಚ್ಚಲಿಜೈನ್ ಯೆಹುದಮ ಎಕ್ ಗಮ್ಮ ಜೈನ ⁴⁰ ಜಕರಿಯನ ಗರ್ಕನ ಸೇರಿನ್ ಯೆಲಿಸಬೇಥ್ನ ಮಾಲಿ. ⁴¹ ಯೆಲಿಸಬೇಥ ಮರಿಯಲ್ನಿ ಖ್ಹಲಂ ದೆಖ್ಹಿನ್ ಖ್ಹಂಜುಸ್ಕರಕತ್ಹೋ ಇನಿ ಗರ್ಬಮ್ಮ ಚೂಕ್ರು ಥದೆಸ್ ಖ್ಹೆಲಿಯು. ⁴² ಬುಜೋ ಯೆಲಿಸಬೇಥ ಪವಿಥ್ರಥ್ಮ ಹೊಂದಿಲಿನ್ ಮೋಟಿಚಿಕ್ರನ್ತಿ ಚಿಕ್ರಿನ್ - ತು ಬೈಕಾಮ ಅಸಿರ್ವದಂ ಹೊಂದಿಲ್ದಿ, ಬುಜೋ ಥರಮ ಪೈದಹುಷೆಥೆ ಲಡುಕು ಅಶಿರ್ವದಂ ಹೊಂದಿಹುಯು. ⁴³ ಮಾರಿ ದೆವುನಿ ಅಯಬಿ ಮರಕನ ಅವನಿ ಬಗ್ಯಂ ಮನ ಕಿಜ್ಗತು ಮಲ್ಷೆ? ⁴⁴ ದೇಕ್, ತಾರಿ ಖ್ಹಲಂ ಮನ ಕನ್ನ ಪಡಿಯು ಥದೆಸ್ ಲಡುಕು ಗರ್ಬಮ್ಮ ಉಲ್ಲಸಮ್ತಿ ಪರಿಯು. ⁴⁵ ದೇವೂ ತುಣ ಬೋಲಿಯುಥೆ ವಥೆಖ್ಹರು ಬರೋಬರ್ಹುಷೆ ಕರಿನ್ ಬೋಲಿಯು. ಅನಾ ನಂಬೀಥೆ ತು ದಂಲ್ಯಲ್. ⁴⁶ ತದೆ ಮರಿಯಮ್ಮ ಬೋಲಿಶಥ್ಕತ್ಹೋ - ಮಾರೋ ಜನ್ ದೆವುನ ಚಿಕ್ರುಕರಸ್, ⁴⁷ ಮರು ಆತ್ಮ ಮಾರೋ ರಕ್ಷಹುಯೋಥೆ ದೆವುನ ವಿಷಯಮ್ಮ ಉಲ್ಲಸಂಪದುಕರಸ್. ⁴⁸ ಯೋ ಇನಿ ದಸಿನಿ ಗರಿಬ್ನು ಸಿಥಿದೆಖಿನ್ ಉಪ್ಪಾರ್ ದೆಖ್ಹುಕರಸ್. ದೇಕ್, ಅಗಡಿತು ಮೂಡಿಕಿಯಮೂಡಿಕಿಯ ಮನ ದಾನ್ಯ ಕರಿನ್ ಬೋಲಿಲಿಷೆ. ⁴⁹ ಶಕ್ಥಿವಲೋ ಹುಇರೋಸ್ಥೆ ಮನ ಮೋಟು ಉಪಕರಂ ಕರಿಯೋ ; ಯೋ ನಮ್ ಪರಿಶುದ್ದ ಹುಇರುಸ್ . ⁵⁰ ಇನಾಮ ಬಯಂ ಬಕ್ಥ್ಹಿರವಲನ ಉಪ್ಪರ್ ಇನಿ ದಯೆ ಮುಡಿಕ್ಯಮುಡಿಕ್ಯತೋಡಿ ರಶ್ಹೆ. ⁵¹ ಯೋ ಇನಿ ದಿಲ್ನಿ ವಿಚರಂ ಅಹಂಕರಂ ಕರವಲನ ಚದರಿಸ್ಸವುಷೆ. ⁵² ಪಂಡಿಥವಳು ಸಿಂಹಸನಮ್ತಿ ಯ್ಹೆತ್ ದಖೆಲಿನ್ ಗರಿಬ್ವಲನ ಉಪ್ಪರ್ಲಿಸಿಥಿಮ ಲಿನಯೋ. ⁵³ ಬುಕ್ಯೋರವಲನ ಕನಖ್ಹು ತ್ರುಪ್ಥಿಪಡಿಸಇನ್ ಷವುಕರ್ಣ ಖಲಿಹಥೆಖ್ಹು ಬೋಲಿಮೊಕಿಲಿಯೋ. ⁵⁴ ಯೋ ಹಮ್ನ ಜಗ್ವಲನ ಬೋಲಿಯಥೆ ಬರೋಬಾರ್ ⁵⁵ ಅಬ್ರಹಮ್ನಬಿ ಇನ ವಂಶಮ್ವಳನಬಿ ಕದೆಬಿ ದೆಯೇ ವಥಲ್ನುಕರಿನ್ ಖ್ಹಯಲ್ಕರಿನ್ ಇನಿ ಸೇವೆಕರವಲೋ ಹುಇರೋಥೆ ಇಸ್ರಯೇಲ್ನ ಹತ್ದಾರಿಯು. ⁵⁶ ಬೊಲಿ. ಮರಿಯಳ್ ಕಂಷೆಕಂ ಥಿನ್ ಮೈನ ಯೆಲಿಸಬೇಥ್ನ ಜೋಡ್ಮ ರಹಿನ್ ಇನ ಗರ್ಕನ ಪಸ್ಹುಗೈ. ಸ್ನಾನಿಕ ಯೋಹನ ಪೈದಹುಇಯೋಥೆ ನಾಮಕರಣ. ಇನೋ ಬಾ ದೆವುನ ಗಣಪದಿಸಯು. ⁵⁷ ಯೆಲಿಸಬೇಥ ದನ್ಭಾರೈನ್ ಚ್ಹುಗ್ರು ಪೈದಹುಯು. ⁵⁸ ಯೋ ಬೈಕೋ ಅಜೂ ಬಾಜೂನು ಬಂದು ಬಂದುಗಲ್ ಇನ ಉಪ್ಪಾರ್ ದೇವೂ ಇನಿ ದೆಯೇ ವಿಷೆಶಮ್ಥ್ಹಿ ವಥಲಿಯೋಕರಿನ್ ಖ್ಹಂಜಿನ್ ಇನ ಜೋಡ್ಮ ಖುಸಿಪಡಿಯು. ⁵⁹ ಅಟ್ಮನು ದನ್ಮ ಇವನೇ ಯೋ ಚ್ಹುಗ್ರನ ನಾಮಕರಣ ಕರನತೆಕೆ ಅಇನ್ ಇನಕಾಜೆ ಜಕರಿಯ ಕರಿನ್ ಬನುನಮ್ ಮೇಲ್ನುಕರಿನ್ ತ್ಹು . ⁶⁰ ಯೋ ವಿಷಯಮ್ಮ ಯೆಲಿಸಬೇಥ <<ಯೋ ನಕೋ,ಯೋಹನಕರಿನ್ ನಮ್ ಮೇಲ್ನು>>ಬೊಲಿನ್ ⁶¹ ಇವನೇ <<ತರು ಬಂದುಗಲ್ಬಂದುಗಲ್ಮ ಅ ನಮ್ವಲೋ ಯೆಕ್ಬಿಕೊಇನಿ ಕಾಯೇನ>> ಅಮ್ಕರಿನ್ ಇನ ಬೊಲಿನ್. ⁶² ಅನಾ ಕೇಹು ನಮ್ಮೆಲ್ನುಕರಿನ್ ಕರಸ್ ಕರಿನ್ ಜಕರಿಯನ ಸೈಗಿಕರಿಯು. ⁶³ ಯೋ ಏಕ್ ಚಕ್ಕನ ಮಂಗವು -<<ಇನು ನಮ್ ಯೋಹಾನ>> ಕರಿನ್ ಲಿಕ್ಕಿಯು. ಇನಕಾಜೆ ಖ್ಹರುಜನು ಅಶ್ರಯಂ ಪಡಿಯು. ⁶⁴ ಥದೆಸ್ ಇನ ಮೊಡು ಆಯು, ಜೀಬ್ ಕಾದಿಲಿ, ಯೋ ವಥೆಬೋಲನು ಶಕ್ಥ್ಹಿಬರೈನ್ ದೆವುನ ಖ್ಹಳಕರಿಯು. ⁶⁵ ಇನ ಖ್ಹಂಜಿಯುಥೆ ಅಗೆಪಿಚ್ಹೆಲಿಯುಖ್ಹರು ಡರಳಗಿಯು ; ಬುಜ್ಹು ಅ ಖ್ಹರಿ ಸಂಗಥಿನ ಕಜೆ ಯುದಯವಳು ಪನಿನದೆಖ್ಹ್ ಖ್ಹರು ವಥೆಬೋಳುಕರ್ತುತು . ⁶⁶ ಖ್ಹಂಜಿಯುಥೆ ಖ್ಹರು -<<ಆಹಾ, ಅ ಚ್ಹುಗ್ರು ಕಿಮ್ನುವುಷೆ?>>ಕರಿನ್ ಯೋ ಸಂಗಥಿನ ದಿಲ್ಮರಕಿಲಿನ್ ಬುಜ್ಹ್ಹು ದೆವುನ ಡರ್ನು ಹಾತ್ ಇನ ವುಪ್ಪರ್ ತು. ⁶⁷ ಅಮ್ಕಯೇಥೆ ಯೋ ಚ್ಹುಗ್ರನ ಬಹುಇರೋಥೆ ಜಕರಿಯನ ಪವಿಥ್ರಥ್ಮ್ ನಿತಿ ಬರೈನ್ ಪ್ರವದನಕರನ ಚಲಿಯುಥೆ ಶಥ್ಕತ್ಹೋ. ^{68 69 70} - ಎಸ್ರಯೇಲ್ ಅದ್ಮಿನ ದೆವುಹುಇರೊಥೆ ದೇವೂನ ಸ್ತೋತ್ರ ; ಯೋ ಅಗಡಿತುಥೆ ಇನ ಪರಿಶುದ್ದ ಪ್ರವದಿನ ಮೊಢನಿ ಯೋ ಬೋಲಿಯುಥೆಸ್ ಇನಿ ಅದ್ಮಿನ ಮಲಿನ್ ಇವನ ಚ್ಹೊದೈನ್ಮೆಲಿಯು; ಇನ ಸೆವಕಹುಇರೊಥೆ ದವಿದನ ಗರ್ವಳನಮೈ ಅಪನಕಜೆ ಏಕ್ ರಕ್ಷಣಾ ದೇವಲೋ ವಿರ ವುಟಿಯೋ. ^{71 72 73} ಯೋ ಅಪನೋ ಪರಮ್ಬರಿನ ದಯೇ ವಥಳವಲೋ ಅಪನೋ ಪರಂಬರಿ ಅಬ್ರಹಾಮ ಖ್ಹೊಂಗಥ್ಲಿನ್ ದಿಧೋಥೆ ಇನಿ ಪರಿಶುದ್ದ ಖ್ಹೊಂಗಥ್ ಖ್ಹಯಲ್ಕರಿನ್ ರಹಿನ್ ವೈರಿಥಿ ಹಮುನ ದ್ವೆಶಮ್ಕರಸ್ಥೆ ಖ್ಹರವುನ ಹತ್ಹೆಥೆ ಹಮುನ ಭಾಚೈನ್ ಬಚ್ಚಡಿಯೋ. ^{74 75} ಅಮ್ ಹಮೆ ಹಮುನ ದುಷ್ಮಂನ್ನು ಹತ್ಹ್ಮತು ಬಿಡುಗಡೆ ಹುಇನ್ ದರ್ಕೊಇನಿಥೆ ರೈನ್ ಹಮ್ನ್ನ ಜೀವನು ದಂಖ್ಹರು ಪಶನ್ನದಿಲ್ಖ್ಹು ನಿಥಿಖ್ಹು ಇನಿ ಸನ್ನಿದಿಮ ಸೇವೆಕರನ ಹಮುನ ಅನುಕುಳಮ್ಕರಿಯೋ. ⁷⁶ ಲಡಕ, ತುತೋಬಿ ಪರಮಾತ್ಮನ ಪ್ರವದಿಹುಇರೀಶ್. ತು ದೆವುನ ಖಮ್ನೆ ಜೈನ ಇನಿ ವಾಟ್ನ ಬರೋಬರ್ಕರಿನ್ ⁷⁷ - ⁷⁸ ಹಮರೋ ದೇವೂ ಗನೋಗನೋ ಕರುಣೆತ್ಹಿ ದೇವಲೋ ಪಪಂನ ಕ್ಷೆಮೆ ಕರಿನ್ ರಕ್ಷನನಿ ತಿಳುವಳಿಕೆ ಇನ ಪ್ರಜೆನ ವಥಲಿ ದೆನುಕರಿನ್ ರನು. ಯೋ ಕರುನಥ್ಹಿ ಹಮುನ ಉಪ್ಪರ್ತಿ ವನುಹುವನು ಇಮ್ಮಸ್ ಯೋ ⁷⁹ ರತ್ಹ್ಮಬಿ ಮರನಿಸಮಯಮ್ಮಬಿ ವಸಕರುಕರಸ್ಥೆ ಹಮುನ ವುಜಲು ದೀನ್ ಹಮ್ನ ಗೊಡನ ಸಮದನಮ್ನು ಮರಗಮ್ಮ ಮಲಿನ್ ಚಲ್ಷೆ >>ಬೋಲಿಯೋ. ⁸⁰ ಯೋ ಲಡಕು ಮೋಟು ಹುಇನ್ ಅತ್ಹ್ಮಮ ಬಲಹೊಂದಿಯೋ. ಉಜೂ ಇಸ್ರಯೇಲ್ ಅದ್ಮಿನ ಇನ ವಥಲಿಲೆನುಕರಿನ್ ದಂಖ್ಹರುಬಿ ಝ್ಹದಿನ ಜನ್ಗಲ್ಮ ತೂ .