¹ Kwayia nde legoto la engali angemeneagandele na bhami bhakabha mbumbaa zumi bho, pa bhava tala engabhu, bhagindele bhandongbane na mbonabhu. ² Mitano kati-kati engabhu bhalinde bhapepe, pe mitano na ndate. ³ Mitano pa bhava tala engabhu, bhaavi lekawu na bhu te; ⁴ kasi bha ndate bhavinde soe emoti na bhatala engabhu, lekawu a bhakopo. ⁵ Ge Molo kadende bhegala, bhu bhaazu bhe wotii naase pe bhalala. ⁶ Ankpoto ya biti, bhagamuaga: Mondani molo, geani mankpomeage! ⁷ Nakwayia bhambumbaa bhaazu bho bhazuzuando, bhabhongisiagando bhatala engabhu. ⁸ Bhapepe bho bhapaga na bha ndate: medhuliani lekawu lekedhe lengbanu , nakwa batala enbgasu adele alimia. ⁹ Bhandate bhosisia: te, kaale goto ebuate nakwa ngbasu pe nakwa engbanu; geani kasi bya bhateki, pe sombani nakwa engbanu. ¹⁰ N'edheli bhagi ete bhasombe lekawu, molo akilia;bho bhali bhanlambea bhayingia na angbale ya vele pe bhadhia empomu. ¹¹ Antinda penza, bho bhaada bhadoondo, pe bhapaga: Kumu, Kumu, ewulia empomu. ¹² Kasi osisia: Nale namopaga soolo, tamoyibi te. ¹³ Zuzuani ndo na kwate mayibi ata biti, ata saa te. ¹⁴ Aliande ndenge emoti na moto omoti mo, pa agea enoe, omaando bhato bhonge bha ensale, opa bhasoe bhenge. V 15 Ampa mambola talenta mitano, mooda ma mibhale, pe ma misato, moto na moto na nguyi enge, pe ageando. Pana bhogala-gala ¹⁶ agea enge,mazuinde talenta mitano, awengea yi,pe azua goto mitano agunalia. ¹⁷ Ndenge emoti, ma azuinde talenta ebhale adhaisa ebhale enzongo. ¹⁸ Mo an'zuinde pa emoti agendo akpoa lebadu a dhodho, pe asomisa falanga ya ekolo monge. ¹⁹ Bhabiti bhebua antindeyia, ekolo ma bhato bha ensale bho asiando, omaa ete bhampe mosolo monge. ²⁰ Mo azuinde bhatalenta mitanoadoondo, pe pa an'veleaga bhatalenta mitano agunalia, pe apaga: Kumu, olopinde bhatalenta mitano; monda,nazui mitano agunalia. ²¹ Enkolo monge ampagando: Kwa enza, moto ma ensale onza pe ma enmeleme omoti; oli na enmeleme omoti na tomate tekedhe, nopandele bhasoe ebua; yingia edhengeleage na mboo. ²² Mo avinde ebhale adoondo lokola, pe apaga: Kumu, olopi bhatalenta ebhale; monda, nazui ebhale yaada. ²³ Mboe ampaga: Kwa enza, ozi enza pe we ole moto ma ensale onza pe enmeleme omoti natomate tekedhe, nopandele ebua; yingia edhengeleage na mboo. ²⁴ Mo azuinde talenta pa emoti esesia lokola ebina nayi, pe apaga: Kumu, nayibito ete we moto mokpekpe, obhuna mbuwe ye kokuni te, pe otaaga ye kana we nde opepi; ²⁵ nali na bhoo, pe nagi nasomisa talenta engoo na a dhodho; monda, va tomate tengo. ²⁶ Mboe ansisia: We moto ma ensale one pe empopoe, oyibito ete me tekuni te, pe naaga ye tepeepi te; ²⁷ obhonginde ete ope falanga engame na bhto bho bhdhipisa, pe, o nasii, nave falanga engame na matabhisi. ²⁸ ongbulani talenta yo, pe ompani na madele na talenta zumi. ²⁹ Nakwate bhampandele na mo ali nayi, pe adendele na ebua, kasi mo kali nayi te bhangbulia ata ye ali yi. ³⁰ Pe moto ma ensale pamba, on'dhetani na en'dhidhi wa ensenge, asoe ye aliandele engamo na ye mino. ³¹ N'edheli Mi ma moto adoondele a lekumu lenge, na bha modokoogo bhaazu, epiandele a legbangba la lekumu lenge. ³² Mokili mobimmba bhayamandele a mbola enge . ogbaagandele bhemoti na bhaada, ge mokengeli ogbaaga bhakandolo na bhameme; ³³ pe obisandele bhakandolo na ebhalo tenge , pe bhameme na emeso tenge. ³⁴ antindeyia mogoto apagandele na bhobhaliandele ange ebhalo: Dooni, bhino mo bhamobhayi na Abame; vani engbanu legoto le bhamobhongisiagi toyea ebandeli ta mokili. ³⁵ Nakwate nali na nzaa, pe malepa eyeli, nawoyi enoto, pe malepa libha leno; nalinde en'didi, pe maleyamba, ³⁶ nalinde bhandumbu, pe maletubhisa; alinde alezegea, madoo malemonda; nayingi boloko, pe madunde bi engame. ³⁷ Bhato bhasemba bhansisiandele: Kumu, biti sina tomeninde na nzaa, pe topa eyeli; to oli na enoto,pe topa libhaleno? ³⁸ biti sina tommeninde en'didi ,pe toyamba; to bhandumbu, pe totubhisa? ³⁹ biti sina tomeninde na egoni, to a boloko, tadoo tomonda? ⁴⁰ Pe mogoto osisiandele: Nale namopaga soolo, biti yazu ge mazinde bhakwa bhayo na mo okedhe asoo bha bhadame, ali me nde malezinde. ⁴¹ antinda opagandele bho bha emeso tenge: Yweani beina naame, ngbaupa; geani na bhoogu bha seko bho bhabhongisaginde nakwa sumui na bhamodokoogo bhonge. ⁴² Nakwate nali na nzaa, pe mlepi eyeli te; nawoi enoto,pe malepi libha leno te; ⁴³ nalinde en'didi, pe maleyambi te, nalinde bhandumbu, pe maletubhisi te, alinde alezegea pe nayinginde boloko madu malemonde te. ⁴⁴ bhasisiandelelokola: Kumu, bitisina tomeninde na nza , to na enoto, to en'didi, to bhandumbu, to na egoni, to a boloko, pe toosalisi te? ⁴⁵ Osisiandele: Nale namopaga soolo, biti yaazu ge mazinde bhakwa yo na bho bhekeke bha, alinde me nde malezinde. ⁴⁶ Pe bhobhe bhageande na etumbu ta seko, kasi bhato bho semba a bhomoyi bha seko.