¹ ከኦጝ ጩዋ ጪኒጌን ናኒ ዮ፤ ዋዝንዽባ ከታቺ እን። ሃዋሻ ቶኩሼያ እየው እን እንቃያጝ ዻቺሽኬን ኣን፤ ጠቅምሼባ እየው። ² ኣጅቴባ ከኦካ ክያኒ ጊታይ፤ ከኦካ ውር ጊታይ ኣሽክዬን ኦኬ ጋራዬ ቃወን ኣሩጝካ ውሬ ቶይባ እየው ኤታጋን። ³ ኡዋው ሃኣያ ጊታይ ቆሬኬ ኣኩሉኬ ይሁሼንኬ መንፈስካ ባሪዮጝ፣ ጊታይ ቃይዬንኬ ኢየሱስ ክርስቶስ፣ ሃኣያ ጊታይ ማርኬ ኣሩጝዳ ኤርምኔኑጝ። ⁴ ዎሺሻያጝ ኣንዻ ሃኣኔ ኦይን ካቃይዬኬ ኣሩጙጝ። ውርካጝ ቃይዬን ከኣሩጙጝ ዋሺኔን ከኦኮኑጝ ኦኬ ኣኖጝ፣ ኣን ሃሳጊባ፤ ⁵ እን ቆሬኬ ሹ እንካ ሎንካይሳጝ፤ ከኦካ ቢዛካ እስራኤል፣ ኣዬ እን ጅሼኬ ኦካ ውርካ ብንያሙጝ፣ ከውርካ ዕብራውያንዻ ሃኣይ ዕብራዊ፤ ቲታ ናንዳካ ሕግያጝ፣ ሃኣይ ውርካ ፈሪሳዊ፤ ⁶ ኣያ ናንዳካ ቦውንታያጝ፣ ሃኣይ ውር ኬና ዋኬ ጆሌ ውርካ ቶኦካ ይሁኔን፤ ኣይኒን ከጫንቃል ጌዬን እንካ ዻዬ ሕጉጝ፣ ሃኣይ ውርካ ማር ዻባሞ ኣኔን። ⁷ ኣይባዬ ኦግታባ ኣንሼን ኣን ጠቅምሼን ፓይላ ጋን ሃሺጝ ናንዳካ ክርስቶሴ ሃኮምሼያ ከእያይ ጆግዮጝ። ⁸ ከኦካ ይንዻ ሳጊ እን ሃሺጜ ናንዳካ እሺዬ ሃኦይድሼ ኦኬ ፓይላጝ፣ ሃሄክንሲኬ ታቺ ኣዬንካ ኢየሱስ ክርስቶስ ታቺ እን ማር ውርካ ሄክንሲዬን ኣዬንያጝ፣ ሃኮሚባ ኦኬ ፓይላ ከኦኬ ጆጊ፤ ሃሺጚ ናንዳካ እሺዬ ሃካይሲያ ኦኬ ፓይላ፤ ሃጌዬ ክርስቶሱጝ ሃኮምያ ኦኬ ፓይላ ከኦኮኑጝ ጆግዮጝ፤ ⁹ ከሕግ ዻዬን ማር እን ሃኣኔ ጫንቃል ጌዬን ናኒዬኔ፣ ከክርስቶስ ኣምኒዬን ይንዻ እን ኩንኬ ሃምካ ባሪዮጝ፣ ጫንቃል እን ኣይኬ እምነቱጝ ካጌይኬ ታይ ኔኒዬ ጊያ። ¹⁰ ሃእባጄ ክርስቶሴ ቁዋቅትካ ናሹጜን ኔኒዬ፣ ካኣዬኬ ኣሩጝ ናኒዬ ከኣርሼንዻ ካሙኒኔ እሹጝ ሃኣርግንዽባ፤ ¹¹ ከኣርሼንዻ ካሄክሼ ናሹጜኑጝ ሃፎሽካዽባ። {ቤርቢዬ ሃም ኣይ ማራ ሄክሼን} ¹² ሃጌይያ ይን ፓይላ ወይ ሃማቲያ ካሎን ማር እያይኔን፤ ኣይባዬ ኢየሱስ ክርስቶስ ሻሜ ኣን ኔኑጝ እጝ፣ ኣንዻ ሃዎሽባ እንካ ሻሜ ናኑጝ። ¹³ ጪኒጌን ናኒ ዮ፤ ኣን ካኒ ሃካና ሻምኬን ኣን ኤምኑ ከኦኮኑጝ ጎሜዬ ሃካና ኮምኬን፤ ኣይባዬ ሃሻሚባ ኦኬ ክየም፤ ሃጌርሺኔ እን ኣኔን ሁር ናኒ ክያኒዬ ሃቲትሼባ ቡዋ ናኒ ኦካ እን ኣኔን ታካ ሌሜን ናኑጝ። ¹⁴ ባሪዮ ከኢየሱስ ክርስቶስ ናንዳካጝ ሺውሼ ኣን ዾዮኩጝ [ኦይንካ ሼሽክኔን] ቦወን ሃቤርቢባ ሃም ኣይ ማራ ሄክሼን። ¹⁵ ኣኪ ኡዋው ጊታይ ኣኔ ቃቦ ሹቃጝ ኡዋው ፓይላ ሃኣንቴባ ኦኬ ከይጝ ቶዬን፤ ከኦኬ ክየም ክየም ከኣንቴ ቃቦ ኬና ኣይ ዋናዋናጝ ባሪዮ ዹዋልሼባ እየው እሺዻ። ¹⁶ ኣይባዻዬ ካዋካ ጆልባ ኦይን ሃሄክሽቶጝ። ¹⁷ ጪኒጌን ናኒ ዮ፤ ከሹቃ ኣዬን ናኒ ዻዬን ኣይባ ከውር ዶክ፤ ከሄክንሶ እን ኡዋው ሃኣይቴ እየውጝ ጶቅሲባ ጊታይ ቆቢዻ። ¹⁸ ናንዳካኦ ከሌሜንካ ይጝ ከእያይ ሃሜይሼ እየው ሌዩጝ፤ ፕር ካንዻ፤ ሃሜይሼባ እየው እን ከጪራው፤ ጁዋናን ማቲ ጋልካ ጻጵኔንካ ክርስቶሴ ሙኔንባ። ¹⁹ ቱንሲ ጊዬይ ሃካዮ፤ ክያጝ ጊዬይ ሃኣምላክ ጊዬይ፤ ጎቢንታ ጊዬይ ሃኬ ዻባሞ ጊዬይ፤ ሻን ጊዬይ ኣኔንኬ ኦካ ዳሉጝ። ²⁰ ዬ ኡዋው ፔን ጉዋዩ ሃፎላ ዾዮክ፤ ዻዓሾ እን ኩንኬ ሃሚንዻ፣ ሃካሊያባ ኢየሱስ ክርስቶስ ታቺ እን ከፎሽካዽኔን፤ ²¹ እሺ ከቁዋቅት እን ኔኒ ኡዋሩጙሼ ኦኬ ፓይላ ኦኔኑጝ፣ ጎቢንታ ካሙኒኔ ኣሩጙጝ ሁባ ኣሩጝ እን ጉዋዩ ቦውዮጝ።