¹ ሌሜንካ ባሪዮ ፕርዻ ከእን ኣይ እያይኔ ከኣርሼን እን ኣይካ ኮምሼኑጝ ከኦካ ሌሜንካ ኢየሱስ ክርስቶስ፣ ከዹዋልሺንኔኔ መንግሥት ኔኒ ቃቢዬን ሃክያጃባ ኤልቅሞጝ፤ ² ሜይሺንቴባ ክያጃ፤ ዋዳ ኔኒ ኣይኒን ኣግኒን ማርኒን ኣግዬኑጝ ኣይባ ሼክሚ፤ ከኦኬ ዶንሺዬን ታቺዬ እርርሲዬኔ ሻምባ ሹቃ፤ ጎሪባ፤ ቁዋቅሺሽባ። ³ ናንዳካኦ ውር እርሮ እን ኣይ ኣኩሉኩጝ ሹ እንካ ማሬ ናሺዬኑጝ ኩንባ፤ ከኦካ ይን ሳጊ ናንዳካ እን ኣይካ ኣርግማ ጊዬዩጝ፣ ናንቡ እን ጊዬይካ ቋቁጩጝ እን ዎሼ ዋዬኑጝ ካሜይሼ እንግኑጝ ፑኡሺባ ውር ጁዋኑካ እርርሲኔን። ⁴ ከኦካ እን ኣይ ኣኩሉክ ዋዬን ዋሽባ ናቡ ጊዬይ። ዋክሼባ ሃምካ ሃሳዋ ጊታይካ ማምዻ። ⁵ ዬ እን ከኦካ ኦኬ ፓይላ ኣይባ ኬናካ ሻም ፓል፤ ዶንሺባ ጋሎ፤ ሻምባ ሃሳዋካ ውር እን ክያጄን ክያጃ ሹቃጝ፤ ሹዋጵሽባ ዋድማ ኑኑ። ⁶ ኣን ከቁርባንካ ማቴንካ ጋላ ቦሼያ ኣን ሃምካ እርኖጝ፤ ሹ እን ሃኩዬ ኣንጵኑጝ ሄክሻ ኣን። ⁷ ሃኒሼንያ ኒሺኔን ሹቃ፤ ሃሹዋጵያ ሩሼን፤ ሃቶይያ ቶኦካ ይሁኔን። ⁸ ታካ ሌሜን ጋይሼያ ኣን ኣክሊልካ ጫንቃል ጫንቃል እንዻ ታቺ እን ኣይካ ኮምሼኑጝ ኣይ ኣንባ ከሹ ኢዕጝ፤ ፕርዻ ማር ናንዳካ ኣንጵኔኔ፣ ሃናንዳካ ጊታይ ፎሽካዽዬን ዹዋልሺኔን ኔኒዻ ፓይላ። {ሃሳዋካ ጳውሎስ} ⁹ ዮጝ ናኒ ይሪካ ኩኔን ሻም እን የቻሊዮጝ ፓይላ፤ ¹⁰ ዴማስ ናሺ ኦካ ፔኑጜ፣ ኦይድ ኣኔ ኩይሼያ እያጝካ ተሰሎንቆጝ። ቄርቂስ ኩይሼ እያጝካ ገላትያጝ፣ ቲቶ ኩይሼያ እያግካ ድልማጥያጝ፤ ¹¹ እን ኣኔን ከኣኑጝ ሃሉቃስጵን። ማርቆስ ናንዳካጝ ካኬልሺዬ ኣን ከኦካ ዋድማ ናኑጝ እያኒሼ ኩዋወባ ከእን። ¹² ሃይዕሲሼያ ቲኪቆስ እያጝካ ኤፌሶን። ¹³ የኩንያጝ ከኦካ ጢሮኣዳ በርኖስ እን ሃኦቼ ኣክርጳጝ፣ ወርቀት እን ኣይ ቁርጱጝ ሳጊዻ ቦሼ ኣንባ ወርቀት እንካ ዾልቱጝ። ¹⁴ v 14 እስክንድሮስ እንካ ኣንጥረኛጝ ሄክሺሼያ ኣን ኦኬ ጋራ ጁዋኑ፤ ዬ ታቺ እን ኣይባ እሺ ኣንካ ቡዋ ኔኑጝ። ¹⁵ ኖክያ ካሎን ሜርሜር ጉዋዩዻዬ፣ እንዻ ኣጅሼባ ከእሺ። ¹⁶ ከኦይን ካሲሲዬ ኣኑጝ ሃሻሚ ኦካ ዳርኔን ናኒ እንካ ሌሜንያጝ ውር ክየምጵንዳ ካኒ ኩንኬን ኣን ኬልሺዬን፤ ኣይባዬ እንግን ፓይላ ጎይድ ፓይላዬ ፓያ። ይንዻ ካማር እንግን ኮምሼን። ¹⁷ ኣይባዬ ሜርሜር እን ኬታይ ናኑጝ ካሜይሼንኬ ቋቄኔ ኣሕዛብ ፓይላ ካዋዮጝ ታቺ እን ዾር ኦካ ቋጩር ናኒዬ ቁዋቅትሻ ኣን፤ ዻዓሺያ ኣን ከኦካ ራጴንካ ሞሆዻ። ¹⁸ ታቺ እን ዻዓሺ ኣንባ ከኦካ ኦኬ ጋራ ፓይላ፤ ሄክሺሼ ኣንባ ከሹቃ ሃምካ መንግሥትካ ፎላዻጝ፤ ናንዳካ እሺ ጎቢንታ ካኣይባ ከቦንኬ ቦን፤ ኣሜን። {ጌሶ እንካ ቱንሱጝ] ¹⁹ ናንዳካ ጵርስቅላዬ ናንዳካ ኣቂላዬ፣ ናንዳካ ውርካ ጶሮካ ሄኔሲፎሩምዻ ቦቴ ኣንባ ሆፎ። ²⁰ ኤርስጦስ ሺዽያ ቆሮንቶስ፤ ጥሮፊሞስዻ ናንዳካጝ ዴምኖጝ ሃኦቼያ ሚሊጢን። ²¹ ከኦካ ሌሜንካ ሃጋይ ጊታጝ ቦኩኔን ሻምባ እን የቻሊዮጝ። ኤውግሎሴ ጱዴሴ ፕርዻ ሊኖስ፣ ቅላውዲዬ ጪኒጋኔ ፓይላ ቦዋ እን ሆፎ። ²² ታቺ እን ካኣይባ ከመንፈስ ኑኑ። ኣይኔን ካኣይባ ከእየው።