¹ ኣኪ ውዋ ናኒ ዮ፤ ቁዋቅትሽባ ከኣይኔን እን ኑኑ ኣኔንኬ ኢየሱስ ክርስቶሱጝ። ² ከኦካ ሌሜንካ ማኝ ጁዋኑ እን የዋዬኬ ኦናኑጝ፣ ናንዳካ ዶክ እርርሲዬን ጊታይ ኣይ ልኩጝ ኤልቅምሽንቴባ ውር ጊታይ ኤርምኖጝ። ³ ኬካ ፓፃኖ ሹቃካ ኢየሱስ ክርስቶስ፣ ጌይባ ከኡዋው ጋሎ። ⁴ ውር እን ዋድምዬን ከፓፃንማሞጝ ናንዳካ ውር ታቺ እንካ ኤርጎ ዋዝንሲዬን ቁዋቅትሽባ ዬ ሻምሼኬን እሺ ኤምኑ ኦካ ዋድማ እንቃ። ⁵ ከእያይዻ ውር እን ሁሉኪ ኦካ ፓልሞጝ፣ ማር ሕግካ ፓልሞ ዻዬ ፓልምኔንያጝ ጌይኬን ጌጳሞ እንካ ባሺዮጝ። ⁶ ውርካ ሃሙ እን ኣይ ቁዋቃዻ ከጴንታ ጊታይ ኮሬ ጌዬን ካማቲዬ እንካ ሌሜኑጝ ሁሉኩሼባ። ⁷ ቶይ ሹቃ እን ኣን ሃሜይሼ እኑጝ፤ ታቺ እን ከኦኬ ፓይላ ኣዬንባ ኦካ ኦኬ ጶቅሲዬኔ። ⁸ እን ናሹጝኬ ኦካ ኣርሼኑጝ፣ ኣን ኣይኬ ኦካ ቢዛካ ዳዊትዻጝ ቃቢባ ኢየሱስ ክርስቶስ፤ ክያጃ ሹቃ ናኒዻ ሃኢዕጝ፤ ⁹ ናንዳካ ይንዻ ሌይ ሃምካ ቁሜ ከውርካ ሴሶጝ ሃኣኔን ጋሎ ጌዬን፤ ዬ ቁምኬን ክያጃካ ባሪዮ። ¹⁰ ዬ ባይሼን ኣኔንኬ ኢየሱስ ክርስቶሱጝ እንግንዻ ካጌዬኬ ጎቢንታ እንካ ቦን ጮሉጝ፣ ሃሺጚ ናንዳካ ጊታይ ጊድዬዬ ከኦኬ ፓይላ ዶንሺዬን ሃቁዋቅትሽባ። ¹¹ ክያጃ እን ሺጝ እያጙጝ ሃኬና ጌርምኔ፤ ሃኣርሻያ ከእሺያጝ፣ ፕር ከእሺ ሃቆባባ ከዻቆ። ¹² ሃቁዋቅትሻያጝ፣ ፕር ሃጌጳዽያባ ከእሺ። ሃቡድያያጝ፣ ፕር እሺዻ ቡዲ ኡዋባ፤ ¹³ ሃኣያ ሹቃዬ ሃማራ ጌይኔንያጝ እሺ ኣዬ ሹቃጝ ኡፓ፤ ቻሊኬን እሺ ኤምኑ ቡዲዬን። {ውርካ ዋድማ እን ባሪዮ ቦዎጝ ¹⁴ ናንዳካ ኦግታጝ ቃቢዬን ኦይ ኦይዴን፤ ካማርኬ ክያጃ ዜርምኔኔ ኣጅሺሽ እንግንባ ኦካ ማሪካ ባሪዮ፤ ይን ማር ኦኬ ኣኔኑጝ፣ እን ዋዬዻ ሃኬና ላሊዬ። ¹⁵ ከውርካ ዋድማ እን ማር ቦኩንዽዬኔ ከእያይ ሜይሺኔ ክያጃ ኣኩሉክ ከሊኩጝ፣ እን ኤምኑ ኦካ ማሪካ ባሪዮ ቦሼን ቁዋቅትሽባ። ¹⁶ ከሃሳዋካ ማም ጊታይ ማርካ ባሪዮ ጎቢሲዬኑጝ ካም ዹክ፤ ውር ጊታይ ኣኔን ከኦግታዩጝ ዹካትሼ ፓይባ ከኦካ ባሪዮ። ¹⁷ እርርሲኔን ጊዬይዻ ሻሚባ ከጊዬ ኮኑጝ ማር ባይሼኑጝ፤ ከኦካ ጫቃንካ ጊታጝዻ ሄሜኔዎሴ ጲሊጦሴ ጋኔባ፤ ¹⁸ ጊታጝ ሃጊታይ ዹካትሽ ከኦካ እን ኣይ ኣኩሉኬ ማቲካ ማም እያይ። እንግንዻ ሺጜን ናሹጌንካ ኣርሼን ኣያ ከኦካ ሌሜንካ ይጜ ሁቡባ እምነትካ ውር ክየም ክየም። ¹⁹ ካኣይባዬ፣ «ታቺ እን እባጃ ጊታይ ኣይ ኔኑጝ፤» ፕርዻ፣ ጊታይ ሺወን ሮጝካ ታቺ እን ፓይላ ካዹካትሽባ ከኦካ ኦኬ ጋራ» እን ሺጝ እያይ ኦይን ኣኔ ማኅተሜ ማር ይንግሺኔን [ቶኦካ] ባሪዮ ዾራ። ²⁰ ኦካ ቶኦ ታቺ ክየም ማር ኣንቲቲካ ወርቄዬኔ ቢሬኔ፣ ኣንቲቲካ ሻሪዮ ጁወ ኣኔባ፣ ከኦካ ጊታጝዳ ክየም ክየም ናንዳካ እን ጎቢዮጝ፣ ዶክዻ ኣይባ ናንዳካ ዋድማ ጊታይ ማሬ ጎቢዬን። ²¹ ኣኪ ውር ክየምጵንዻ ሻማ እሺ ኤምኑ ከኦካ ኦግታጝ ሃፑሪዬ ነፃያጝ እንካ ኣይካ ዋድማካ ጎቢንታጝ፣ እን ይሁሺኖጝ፣ እንካ ኣይካ ታቺ እንዻጝ፣ ማቲባ ኣንቲቲ እን ሻምሼ ዋድማ ሹቃጝ ፓይላ። ²² ከኦካ ኣርግማ ጋራካ ባርሻሜ ጌይ ሿዋት፤ ኬሸን ጫንቃልዻ ከውር ጫንቃላን ጊታይ ሺወን ታቺ እንዻጝ፣ ዻዬጆሌባ እምነት፣ ናሺማዬ ሆፎዬ። ²³ ከኦካ ዜርማ እን ማርካ ኣግዬኔ ማር ኦኬ ኣኔኔ ካም ዹክ፤ ናንዳካኦ ኦግታይ ካቦኩኔ ጓሬኑጝ የእባጅያ ²⁴ ውርካ ዋድማካ ታቺ እን ካጓርኖጝ ሁሉኩሼኬን፤ ሳጊዻ ናንዳካ ውር ፓይላ እን ኣይ ሹቃጝ፣ ናንዳካ እርርሲዬንዻ እን ኣይ ልኩጝ፣ ካኣዬ ውር ኬናካ ዶንሺ ኦኬዻጝ ሁሉኩሼባ፤ ²⁵ ካሄክሼ ሃምካ እን ኣይ ኣኩሉክ እባጄኑጝ፣ ከእያይ ባሪዮ ካኣዬ እንግን ኮምፓርሲዬ ይሁኔኑጝ ከቃቦ ሻሜን ጊታይ ጎሩጝ ከሹቃ ኣዬን ካኣዬ ኬናካ እያኒሹጝ ኣኔባ፤ ²⁶ ይንዻ ዋክሼባ ሃምካ ሹቦ ጊዬዩጝ፤ ካሹዋጵሽ ክያጃዬ እን ሻም እንግን ከውርካ ሮጉማካ ካህካ ዲያብሎሴ እን ጎሚ እንግኑጝ ሃኬ ዻቅባ እያግ።