¹ እን ኣይ ኦካ ቆቤን ጉዋዩጝ ኮሲኔን ኦካ ዱንኩዬን እንካ ዳሉጝ፣ እን ማሬኬ ቡዋካ ውር ኣሽክዬን ኣይባዬ እን ኣይኬ ባሪዮጝ ሃኣንቴ ቶኦካ ቦን ጮል ፎላ ዾዮኩጝ ሃእባጃያ። ² ዬ ሌይ ሃሚን ሃፎሽካዽያ ኦካ ቆቤን እን ጉዋዩ ኣኔን ፎላ ዾዮክ ኬሜኔ [ሃጌያባ ሻዽሻዽ]፤ ³ ሃክሚናያ ከኣኩሉክያጝ ሃኣያ ቡንዱርቆዬ ሃጌይናኬን። ⁴ ሌይ ሃምካ ኣኒንቴ ኦካ ዱኩዬን ይኑጝ ዴጭሼ ኡዋወ [ሃዳርጊናባ]፤ ናንዳካኦ ሩዋ እን ጉዋዩ ኣይ ኣርሹጉጝ ካቁጄኬ ዻቆጝ ሃእንካ ክሚንቴ ኦካ ቆቤን እን ጉዋዩካ ፎላጝ ዬ ሃዎሻኬን እንካ ይቅንቶጝ። ⁵ ዬ እንካ ኣሽኪ ኦይኑጝ ሃባሪዮ፤ ናንዳካ ኦይን ሺጝካ ኩኔኑጝ ሻሚ መንፈስ ኦካ ጎሜኔ ኣይ ኡዋው ሃእሺ። ⁶ ዬ ሹ ጮል ሃቆባባ ከኤርምኔን፤ ሌይ ሃም ካቆብቴኬ ኣሩጙጝ ካዹካትሽቴ ከኦካ ታቺ እኔ ካጌይንቶጝ ሃእባጃያ፤ ⁷ ናንዳካኦ ሃቆብቶጝ ሃኬ እምነት ዬ ማርኬ ጌዬኔን። ⁸ ከእያይ ሃእድቴ ከኦካ ኣሩጝ ዋና ማቲዬ ከታቺ እን ቆቤኑጝ ሃኣይ ኣኩሉኬ ሃክያጅባ። ⁹ ዬ ካቆቢኬ ኣሩጙጝ ወይ ካጌይኬ ኦካ ኣሩጝ ዋናጝ ኦኬ ጉዋዩ ሃእሺ ዋዝንሲዬን። ¹⁰ ኡዋው ፓይላ ከክርስቶስ ሃፓይናባ ኦካ ሌሜንካ ካራምካ ኮምሼን፤ ውር ክየም ክየምዻ ከኣሩጝ ኦግታይ ኣሽክዮጝ ዋድማ ሹቃ ወይ ዋድማ ጋራ እን ጌይባ ኦይንካ ካሺሼ እሺ ልኩጝ። ¹¹ ኣኪ ታቺ እን ሪግሺኔን ኣዬ ኦውጝ ናንዳካጝ ሃእባጅቶጝ፣ እን ውር ሃሳዎጝ ካቦዎጝ ከሻሜን ሃዎሻባ፤ ኒን ኣዬን ጉዋዩ ከታጝካ ባሪዮጝ ሃኬና ዹዋልሺኔ፤ ፕርዻ ከመንፈስ ጉዩ ሃሺጝ ሃጃወ ሃሺሚባ ቃቦ። ¹² ሃሺጜ ይኑጝ ማርካ ኡዋው ኤታጋን ኦካ ማሪ ጉዩ እንቃ ጎሺዬኔኔ፣ ከቃይቴኬ ኡዋውጝ ሃሺጝካ እየው ባሊ ኣዬን፤ ይንዻ ሃናንዳካ ጊታይ ቃይዬንኬ እን ጌዬ ሹኑክ ዬ ናንዳካ ጊታይ ማርኬ እን ኣኔን ሻን ቱዎጝ ቃይዬኑጝ ከቻሊ ቃቦ ዋሼኔ ጊያ። ¹³ ሃኣያያ ከኦካ ሹቦ ሹኑክያጝ ሃሺጛ ናንዳካ ባሪዮዬ ጊያ፤ ሃኣያያ ውርካ ሹቡያጝ ሃናንዳካ እየው። ¹⁴ ናሺማካ ክርስቶስ ማቲሼያ ኡዋው ጊዲ፤ ናንዳካኦ ክየም እን ናንዳካጝ ኣርሺሼ ፓይላጝ ማቲያያ ጊታኬና ኣይ ኣኩሉክ፣ እን ናሹጝኬ እንዻ ፓይላ ኣርሻ። ¹⁵ ጊታይ ቆብኬ ዻቆዻ ሃናንዳካ እን ኣርሺሼ እንግኔ እን ናሹጝሼ እንግን ከኣርሼን ክያኒዬ ዬ ካርሲኬ ጋኔ ካማርሼ እንግን ኤታጋን ቆብሼኑጝ እሺ ኣርሻ ናንዳካ ፓይላ። ¹⁶ ዬ ካርሲኬ ጋኔ ሃሄክንሲያኬን ውር ክየምጵንዻ ከኦካ ሹኑክ፤ ከኦካ ሌሜንካ ይጝ ሃሄክንሲያያ ክርስቶስ ከዴንታጝ፤ ዬ ካርሲኬ ጋኔ ሃሻማኬን እያይ። ¹⁷ ዬ ውር ክየምጵንዻ ኣያ ከክርስቶስያጝ ሃሙኒኔን ሃሊ፤ ኦኬ ጌቾ እን ሳጊያ፤ እየዎ፣ ማቲያ ሃሊ። ¹⁸ ይን ፓይላ ሃኬ ባሪዮ፤ እሺ ከታካ ክርስቶስ ቃሺያ ኡዋው ከእሺ፤ ኣያ ኡዋው ዋድማካ ቃሽዻ፤ ¹⁹ ባሪዮ ቃሺዬ ዳሉጝ ከክርስቶሱጝ ካኒ ኮምሼኬን ውር ሴሶ ጊዬይ፤ ፕር ኣያ ኡዋውዻ ክያጃካ ቃሽ። ²⁰ ዬ ኡዋው ሃኣያ ውርካ ኤርጎካ ክርስቶስ፤ ባሪዮ ሻምባ ሺወን ከታጉዋዩ፤ ኡዋውዻ ሃሺጛ ቃሺሜንባ ከባሪዮዬ ሃይሁና እየውባ ከክርስቶስ። ²¹ ኡዋው ሃኣያኬ እሺዬ ካኣይቴ ጫንቃልካ ባሪዮጝ፣ ካማርቴ ሴሶ ኣኔኑጝ እሺ ባሪዮ ናንዳካ ኡዋው ኣሽክያ ሴሶ።