C12
1
ጥቅም ኬና ካጌዬኬ ቃይኔን ማር ኒን ኣኔኑጝ፤ ቃይኔን ዎሺሻያጝ ከታቺ እን ሃኩይባ ሃምካ ሹካ ሃቦወዬ ዹዋልሺኔኔ።
2
ከሌሜንካ ቦን ታጵ ኦይዲ ሌይ ሃምካ ፎላ እንካ ማክንሳጝ እን ከክርስቶስ ሃእባጅያ ውር ክየም፤ እን ዎቼ ካኣይባ ከኣሩጝ ወይ ከኣሩጝ ሹኑክዻ ሃእባጅኬን ዬ ባሪዮ እባጃ።
3
ውሩጝ ካኣዬኬ ኣሩጝ ወይ ካኣዬኬ ኣሩጝ ሹኑኩጝ ኣን ሃእባጅኬን፤ ዬ ባሪዮ እባጃ።
4
እሺዻ ቦሼ ሃምካ ገነቱጝ፤ ከኦይንዻ ካማሬኬ ታካ ውር ዹዋልሺኔን ቻሊዬን፤ ውርዻ ካሃሳዎጝ እን ማሬ ናሺዬኑጝ ሃዋይያ ኦኬ።
5
ናንዳካ ውር እን ሃሺጜ እያይ ሃቃይባ፤ ዬ ናንዳካ እን ኤምኑ ከኦካ ዻቾ ናኒ እንቃ ሃቃይኬን።
6
ኣይኒን ቃይዬን ካዎሹጝ ከሞኚ ኮመን ናኒ ኣኔኬን፤ ናንዳካኦ እን ሃሃሳዎጝ ሃኣኩሉክ። ኣይባዬ ውር ክየምጵንዻ ናንዳካ ኣን እንካ ጌዬዬ ከኦካ እን ዋዬዻ ሳጊ ካማር ኣን ሄክንሲዬኔ ከኦካ ቃይዬን ሃዺያኒባ።
7
እን ናሹጝኬ ዹዋልሺኔን ታቹጝ ካማር ሃሳወኔ፤ እንካ ፓር ቶኩኔንካ ኣሩጝ ናኑጝ፤ እሺዻ ካጋሊንሺ ኣኑጝ ጋያ ኣን ውርካ ኤርጎካ እጁጝ።
8
ዳቡጝ ካቡሌኬ ኦናኑጝ፤ ሃይወንያ ታቺ እን ክያጝ ጂያን፤
9
ዬ እሺ ሺጝ፤ ኣይኔን ናኒ ሃልኪ ከእን፤ ቁዋቅት ናኒ ካኣዬ ካሎኑጝ ሃኬ ሹካ ዻቾዬ ዋይሼ ኣን እያይ። ዬ ቁውዋቅትካ ክርስቶስ ካኣኒኔ ኦናኑጝ፤ ሳጊ እን ዋዝንሲ ኣኑጝ ሃቃይባ ከዻቾ ናኒ።
10
ናንዳካ ክርስቶስ ከዻቾ፣ ከይሪኔን፣ ከጋሎ፣ ከዋክኔኔ ከጫንቅኔኔ ዋዝንሲ ኣኑጝ ሃናንዳካ እዕጝ፤ ሃዻቺያጝ ከሹ እን ሃቁዋቃዬ። {ጫንቅኔን እንካ ጳውሎስ ኣኔ ናንዳካ ውርካ ቆሮንቶሱጝ}
11
ከቃይዬን ናኒ ሃማቲያ ሞኚ፤ ናንዳካ እንዻ ሹዋጵሼ ኣን ሃእየው፤ ናንዳካ ኣን ማኝ ማቲዬን ካሁሉኩሾጝ ሃእየው። ፕርዻ ኣን ካማሬ ከኦኬ ክየምጵንዻ ኮምሼኑጝ፤ ከኦካ ጊታይ ሺጜ ሐዋርያት ታታቹጝ ሃካና ቶኪኬን ከኦኬ ክየምጵንዻ።
12
ዹዋልሺኔን ካሐዋርያት ጊታይካ ኣኩሉኩጝ ሻማ ከኦካ ጫቃን ጉዩ፤ እንግንዻ ከዶንሺዬ ሌምዬን ዹዋልሺኔን፤ ሃኦኬ ጊታይካ ጎሺሺዬ ሹቃኔ።
13
ከእን ሃማርሼ እየው ናሬን ማቲዬን እንቃ፤ ከኦካ ቶኦካ ይሁኔን ዶክ ሃቶኪኬ ኦ? ሴሶጝ ናኒ ዋይሺቴባ ኣን ካሺዺባ።
14
ሃሼክዬ ሃሚን ጉዩ ኩኔኑጝ ይና ክያጝ እንካ ማክንሳጝ ሃኩንያጝ ከኦኬ ክየምጵንዻ ሃማቲሼኬን እየው ናሬን፤ ኣን ሃዎሺ እየው ዬ ከኦጉዩ ሃዎሽኬን ኦኬ ክየምጵንዻዬ፤ ፕርዻ ሹቡጋን ፑኡሺሼባ ሃንታ ጊዬይ ቢሬ ዬ ሃንታን ፑኡሺሼኬን ሹቡጋን።
15
ዬ ኣን ናንዳካ እየው ኦይን ናኒዻ ኣኖጝ ፓይላ ከሩዋ ናኒዻ ሃኣዬንያጝ ሃባሺ፤ ኣኪ ኣን ሃናሺዬ እየው ሃኬና ኣይ እያይንያጝ፤ እየው የናሺቴ ኣኑጝ ሃጩዋማይ?
16
እን ኣዩጝ ኣዬ ሃካና ማቲሼኬን እየው ናሬን፤ ኣይባዬ ኦይድ ከኦኮኑጝ ሃቶልዬ እየው ከጃካማዬ ኦኬ ዋና ሙኒሼኔ ካኒ ሺዽኬን/
17
ኣይባዬ ከእያይካ ውር ጊታይ ሃይዕሲሼ ሃሚን ጉዩጝ ኣይን ከክየምንዻ ሃቱዋንያይ እየው?
18
ቲቶ ካኩዋዌ ሃሚን ጉዩጝ ሃይወንያ፤ ጪኒጌን ጉዋዩዻ ሃይዕሲያ ከእሺ። ቲቶ ቱዋናይ እየው? ሃካና ዋካ ጃልኬኒ ከእሺ መንፈስ ክየም፡ ዴንታ ጉዋዩዻካ ካኒ ኣይኬኒ ክየም?
19
ሌይ ጋን ከኦካ ማሪ ጉዩ የዋሻ ከኦኮኑጝ ሃዳሪንቴ ኡዋው ኤታጋኔ ሃቆብቶጝኪ? ሃኣያኬ ክርስቶሴ ሃሃሳውናባ ኦካ ማሪካ ባሪዮ፤ ፕርዻ ውርካ ናሺዺ ናኒዮ፤ ይን ፓይላ ሃኣሽክቶጝ ሃካ እየው ጫንቃል ሻሜን።
20
ከሹካጝ ሃኩኔ ሃሚን ጉዩጝ፤ ኣን ከእያይ ሃዎሾጝ ኣይ እያይኔ ሃቻሊባ እየው ጌዬን ወይ እየው ከእያይ የዎሽቶ ኣኑጝ ሃኣይዬ ከጌይቴ ኣኑጝ የቻሊያባ ሃሺጚ እያይኔ ሃሪግሼንባ፤ ካ ከኦካ ጫቃን ጉዩ ጓሬን፤ ቦውንታ፤ ማኒት፤ [ኣዳማኝነት]፤ ሮጝ ካይሲዬን፤ [ሐሜት፤ [እብርቴ] ኦኬ ጋራዬ ኣኔባ ሃሺጚ እያይኔ ሃቃጋዽባ።
21
ሃኩንያ እንቃያጝ ኣምላክ ናኒ ከኦካ ማሪ ጉዩ ካሻሜ ኣን ይርኩጝ ካኣይባ ህሃሺጝ እያይኔ ሃሪግሼንባ፤ ይንዻ ውር ጁዋኑ ከኦካ ሌሜንካ ይጝ ናንዳካ ሴሶ እን ጋሽክዬዬ ናንዳካ ኦኬ ጋራ ጊታይ ሙኔዬ ኩጳሞዬ [መዳራቴ] ማር ይሁኔን ሁሉኬኔ ሺዺዬ ሃኬ እያይ ማሬ ዻዹጝኔን።