¹ ከዶንሺቴ ዴምጳሞ ናኒ ጩዋማ ጊታጙጝ ሃሻምባ፤ ከኣኩሉክዻ የኣኣኒና ዶንሺዬን። ² ከሹቃ ኣዬንካ ባሪዮ ሃሹቃትሼባ እየው፣ እየው ከዻጵ ጫንቃል ናንዳካ ክርስቶስ ቦሼን ሃኮርክሼያ እየው ጁሙ ክየም። ³ ኣይባዬ ቻች ከጃካማ ከእያይ ጊያምሺሼ ሄዋኑጝ ኬሸን ጉዩዻ ጊያሜኔ ናንዳካ እን የኣኒንቴ ከክርስቶስ ሹቃቲዬ ጫንቃል ኣዬኔ ከማርቴ ቦቴን ሃቃጋዽባ። ⁴ ናንዳካኦ ውር ክየም ኩን ኦጉዩዬ ከኦካ ኢየሱስ እን ሃክሊቴ እየው ክሊያ እየው ከኢየሱስ እንቃያጝ፤ ወይ ከኦካ መንፈስ እን የቦቴ የቦዋያ መንፈስ ኬና ኣይ ዋናያጝ ወይ ከኦካ ክያጃ ሹቃ እን የቦቴ የቦዋያ ክያጃ ሹቃ ዋናያጝ፤ ክያጃ እን የሳጊያባ ከሹይ ቆቤን እያጝ። ⁵ ዬ ኣን ከኦካ ጊታይ ሺጜ ሐዋርያት ታታቻን ክየምጵንዻ ሚኒሼንኬን ኣን ከኦኮኑጝ ሃቶኩዮጝ። ⁶ ሃሳዋ እባጄንዻ ማርኒን ኦናኒ ኣኔኑጝ፤ ዬ ሃኣኔ ኦኬ እባጄን፤ ይንዻ ከኦካ ጉዋር ፓይላ ሃሻምሼባ እየው ጃ። ⁷ እየው ከኣይቴ ዼጉጝ ሃሻሚ ኣን ኤምኑ ይርኬ ክያጃ ሹቃካ ባሪዮ ኦካ ካሺዬን ኣኔኬኔ ናንዳካ እየው ክሊዬን ካኮም ኣን ከውርካ ሴሶይ? ⁸ ሃሺጚ ናንዳካ እየው ዋድምሺኔኔ ከኦካ ቶኦካ ይሁኔን እንቃ ከኬልሾ ቦወን ሃዎቺያ እንግን። ⁹ ሃኣይባ ከእየውዻዬ ኦኬ ክየምጵንዻ ከሹካጝ ዎሺሼ ኣኑጝ፤ ጪኒጌን ጊታይ ጉዋዩ ፓዬንኬ መቄዲንያጝ እን ዎሺሽ ኣኑጝ ናንዳካጝ ጋዬ ኣኑጝ ናንዳካ ውር ክየምጵንዻ ሃማቲኬን ካዼቴን። ከኦጉዩ ከኦካ ዼቴን ክየምጵንዻ ካማሬ ኣኔን ሃእባጅሼያ፤ ቢያ ሌሜንዻ ሃእባጅሼባ። ¹⁰ ኣኩሉክ ክርስቶስ ሌይ ሃምካ ኣኒኔ ኦናኒ ቱዎጙጝ፤ ከኦካ ጎብሼንካ ኣካይያጝ [ትምክሕት] እን ናኑጝ ውር ክየምጵንዻ ቻሊኬን ቢቴን። ¹¹ ሃሺጜ እን ሃናንዳካኦ? ሃናንዳካጝ ሃማሬ እየው ናሺዬንኪ? ሃናሺዬ እየው ባሪዮ እባጃ። ¹² ከኡዋው ልኪ ማቲዬን ውር ጊታይ ቃይዬን ከዋድማ ጉዩዬ ካሊዬን ሹዋን ክያጃ ኣዬን ጋን ኦግታይ ሃኣሽክዮጝ ቢያ ከሌሜንዻ ሃኣሽክባ። ¹³ ውር ጊታይ ኣይኬ እያይ ሃጊታይ ውቢ እንግን ኤታጋን ኬካ ሐዋርያትካ ክርስቶስ ሙኒኑጝ፣ ሃሐዋርያት ጊታይካ ሾሮዬ ውርካ ዋድማ ጊታይ ቱዋኔኔ ጆሊዬ። ¹⁴ ይን ማር ክያጃ ኬናካ ጎሺሺዬን፤ ናንዳካኦ እጁጝ እሺ ኤምኑ ውርካ ኤርጎካ ኦሜሌል ሙኒሼን ሁባ እሺ ኤምኑ። ¹⁵ ኣኪ ውርካ ዋድማ ኔኒ፤ ውርካ ዋድማካ ጫንቃላን ሙኒኔን ሁቡኒን እንግን ኤታጋኑጝ ማር ኬናካ ዻዹጝኔዬን፤ ቱንሲ ጊዬይ ኣይባ ከዋድማ ጊዬይ። {ጳውሎስ ቃይባ ከጋሎ እን ሄክሽ እሹጝ} ¹⁶ ፕር እንቃ ሃሺጚባ ይዕጝ፤ ውር ክየምጵንዻ ካማር ኣን ከሞኚ ኮመን፤ እየውዻ የኣያ ኬናካ ኮም ኣን እያይንያጝ ኣንዻ ካቃይኬ ጩዋማጝ ቦው ኣን ከሞኚ። ¹⁷ ይጝ ሃኣዬኬ ሻን ጋዛዬ ሃሃሳዎጝ ሃኬ ሞኚ ዬ ማርኬ ክያጃካ ታቺ እኔን። ¹⁸ ውር ጁዋኑ ናንዳካጝ ቃይዬኬ ኦካ ዳሉጝ ፕር ኣንዻ ሃቃይባ። ¹⁹ እየውዻ ናንዳካጝ የኣይቴ ኣጁጉጝ የዶንሺቴባ ሞኛን ከዋዛ፤ ²⁰ ውር ክየምጵንዻ ናሹጜ ሻማ እየው ካህሲያጝ ጋሊንሺያ እየውያጝ የሺጛ ናንዳካ ኦኬዬ የፓያያጝ ማኒሼያ እየውያጝ ወይ ዻሻ ማሪ ጉዩያጝ የዶንሺያባ። ²¹ ዬ ኡዋው ናንዳካ እን ካሎን ሃኣይቴ ዻቹጉጝ ሃሃሳውባ ከቦኩንዾ፤ ውር ክየምንዻ ከሾያሞ ከኦካጝ ቃይዮጝ ፓይላ ኣንዻ ካሾይዽዬዬ ካቻሊዬ ቃይዬኑጝ ሃሃሳውባ ከውር ሞኚ። ²² እንግን ጋይ ውርካ ዕብራውያኒ? ኣንዻ፣ ጋይ ውርካ እስራኤላውያኒ? ኣንዻ፣ ጋይ ብዛካ ኣብርሃሚ? ኣንዻ። ²³ ጋይ ውርካ ዋድማካ ክርስቶሲ? ኣንዻ፣ ካሃሳውኬ ውር ኬና ጮዩዬ ሃሳጊባ እንግን፤ ፕርዻ ሃዻቺያ ሹ ጁዋኑ ከዋድማ፣ ሃቁሜንያ ሹ ጁዋኑ፣ ሙራና ሹ ጁዋኑ፣ ሃሄክሽያ ጁዋኑ ኦካ ኣርሼን። ²⁴ ውርካ አይሁድ ናንዳካ ሙሬን ክየም እን ሺዺ ሙራ ኣን ክያጝ ቾን። ²⁵ ሃሙሬንያ ክያጝ ጂያን ከቁራ፤ ሃባኬንያ ከባይ ክያጝ ክየም፤ ኦኬ ጋራ ሄክሻ ኣን ጋጊ ክያኒ ክያጝ ጂያን፤ ሃኡጙያ ምክር ክየሜ ሹሼ ኛፓስ ክያኒ፤ ²⁶ ሹ ጁዋኑ ሃላላቅሜንያ ከጃሌን፤ ፕርዻ ከቋቄንካ ሙዋ ኦኬ ጋራ፣ ናንዳካ ውር ጓርጓን ኦኬ ጋራ፣ ናንዳካ ውር ጊታይ ናኒዳ ኦኬ ጋራ፣ ናንዳካ ዛርሲ ኦኬ ጋራ፣ ናንዳካ ከተማ ኦኬ ጋራ፣ ናንዳካ ልት ኦኬ ጋራ፣ ናንዳካ ኛፓስ ኦኬ ጋራ ፕርዻ ናንዳካ ጪኒጌን ጊታይ ናኒካ ዋዛጝ ሃኣይያ ኬና ኣይካ ኦኬ ጋራ። ²⁷ [ሃኣሽክያ ዋድማ ቁዋቃ]፤ ሃዻቺያ ጁዋኑ፤ ሃካይሲያ ሩዋቱክ ሹ ጁዋኑ፤ ካሽ ቃዋ ኣን፤ ኮርጉ ቃዋ ኣን፤ ሃካና ጌይኬን ዳዓኖ ሹ ጁዋኑዬ ሃኡፒያ፤ ከጪራቲዬ ቡንዱርቆ ኣዬኔ ሃቁሩሜንያ። ²⁸ ሃካና ኮምኬን ኦኬ እንቃዬ፤ ሹ ጮል ጃሌ ጆል ክያጝ ናኒ ክያኑጝ ሃክያጃካ ቶኦካ ይሁኔን ፓይላ። ²⁹ ሃኒን ኣይ ዻቹጉጝ? ኣንዻካ ሃካና ዻቺኬኒ ከእንግን ከጋጝ? እንካ ካቲሚንቴኬ ሴሶ ሃኒን? ኣንዻካ ሃካና ማኒሽኬኒ? ³⁰ ሃኣኔያ ቃያያጝ፤ ሃቃይባ ከኦግታይ ዹዋልሼን ዻቼን ናኑጝ። ³¹ እን ጎሺዬ ቦን ጮሉጝ ሹኔካ ኢየሱስ ታቺ እን ኣምላክ ካማሬ ሾሮሺኔኑጝ እባጃ። ³² ሃኣኔንባ ደማስቆዬ ከውር ታቺ እን ኣኔን ከኦካ ቢቲ እን ኣርስጦስዮስ ዱቡጝ ዎሽ ኣን ጎምሼኔ ኣኔን ውርካ ደማስቆ ከተማ ባክሼን። ³³ ኣይባዬ ጎብሽ ኣን ከዻርካ ፑልታካ ካርሚዬ ሃዻቅያ ከኦካ ቡዋ ኔኒ።