¹ ኣን ጳውሎስ፤ ሃኣያ ኦካ ማሪ ጉዩያጝ «ሃኣይ ሪጌ»፣ ዬ ሃኩይያ ከኦጉዩ ዹክያጝ «ሃኣይ ሾዩ»፤ ሃሺጜ እያይ ከሌሞ ኣዬንካ ክርስቶሴ ከጋጝ ኣዬኔ ሃይወንያ እየው። ² ከሹካጝ ሃኩኔ ሃሚን ጉዩጝ ካቆብቴ ከዴንታካ ዳሉጝ ውር ጊታይ ሻሚ እያይኔ ኮሙጝ ክያኒ ከሾያሞ ሃሳውኔን ሃቱሙያ፤ ዬ እየው ከሾያሞ ኬና ኣይ ሃይናቲ እያይ ካሃሳውኖጝ ከሻምቴ ኣኑጝ ሃይወንያ እየው። ³ ሃቆብቶጝ ኣይኒን ዳሉጝ ክያኑጝ፤ ካባልንቶጝ ማርኬ ኦካ ዳሉጜን። ⁴ ፕርዻ ሙራካ ፓር እንካ ባሊንቶጝ ማር ሙራካ ዳሉጜን፤ ካኣይባዬ እንካ ቻሊሺ ኡዋው ይግን ጎምሺሼኑጝ ሃእን ኣኔ ቁዋቅትካ። ⁵ ከኦካ ኦኬ እባጄንካ ባሪዮ እን ናሹጜኬ ጵራጵራጝ ዜርማዬ ቃቦ ጊታይካ ማሜ ፓይላ ሃላልያባ፤ ሹቦ ፓይላ ሃሻማባ ሹቃዬ ካዋይሺኔ ክርስቶሱጝ ሃኣሽክያባ። ⁶ ዋይሺኔን ጊዬይ ከሹካጝ ሙኒኖጝ ጊታይ ማር ዋይሺኔን ፓይላ ናንዳካ ቃጥዬን ሃሼክያ። ⁷ እን እየው የቶይቶጝ ሃኦይንካ ሹኑክጵን፤ ውር ክየምጵንዻ ከክርስቶስ ኣዬን ኔኒ ቃይያያጝ፤ እን እሺ ኣዬካ ክርስቶሱጝ ፓይላ ኡዋዻ ሃኣይቴካ ክርስቶሱጝ ካጶቅሲቶጝ፤ ሁሉኩሼባ። ⁸ ከጌጳሞ እጝ ታቺ እን ኣዬ ኡዋው ካቃይዬ ካሎኑጝ ሪግሺሽኬን ኣን፤ ሃቦቴ ጌጳሞጝ ሃካ እየው ጫንቃል ሻሜን ዬ ማርካ እየው ኮሲዬኔን። ⁹ ከሜርሜር ናኒ ኦይድ ከኦኮኑጝ ሃሪግሺሼ እየው ዋሺቴን። ¹⁰ ውር ክየም ክየም ሺጝ ሜርሜር ጊታጝ ሃዴጩጉዬ ቁዋቃዬ፤ ኣይባዬ ቶያ ሩዋ ኔኒያጝ ሃዻቹጉ፤ ሃሳዋ ኔኒዻ ሃኬና ቦውዬ ሺጝ እያይ። ¹¹ ውር ጊታይ ሺጜን እያይ እን ሃኣኒንቴ ዹኬ ሃሃሳውቴ ከሜርሜር ጉዋዩጝ ፓይላ ሃኣኒና ዲያው ሃሃሳውያ ጃያጝ ሃኣይቴ እያይ ካጊባጆጝ ኣኔባ። ¹² ከውራን ጊታይ ጎሺዬን ጋጝ ካኣጁጝቴ ኡዋውጝ ወይ ካዻይንሲቶጝ ከሪጌዻ፤ እንግን ሄክንሲ እንግን ኤታጋን ከጋጝ ዻይንሲኔን እንግን ኤታጌን ከጋጙጝ ማር ጊታኬናካ ጶቅሲዬን። ¹³ ዬ ኡዋው ሃቃይያኬን ከኦይን ሃኣንቴ ሳጊ፤ ካቃይቶጝ ሃኬ እን ባሪዮ ካሺሼ ኡዋዌ ኣይን ሌይ ሃሚን ጉዩጝ ሃኬ ዋድማ እን ጉዋዩ ሃሄክሺሽቶጝ። ¹⁴ ሃቦዋ ክያጃ ሹቃካ ክርስቶሴ ከሹካጝ ሃፓይንቴ ሃሚን ጉዩጝ፣ ከዋድማ እን ካሺሴ ኡዋው ሃካና ሳጊያኬን። ¹⁵ ፕርዻ ዶክ ከኦካ ዋድማ እጝ ዻቾጝ ከኦይን ኣኖጝ ሳጊ ከቃይዬን ከኦካ እን ካሺሼ ኡዋው ሃሳጊያኬን፤ ሳጊዻ እምነት ጉዩ ከእን ጌጳዽዬ ኩዮጝ ጊታይ ጉዩጝ ዋድማ እን ካሺሼ ኡዋው ካጌጳዽያ ካሞጝ ሃሻማባ ቃቦ። ¹⁶ ዬ ከክልልካ ውር እንቃ ሌምሼ ካማርኬ ዋድማ እን ጋሽክዮጝ ቃይዬኔ ፤ ከኦካ ፔን እን ኣኔን ከኦጉዩ ጋላጝ ክያጃ ሹቃ ክሊዬን ሃቻሊያባ። ¹⁷ ኣይባዬ፤ ካጝ ቃይዬን ካቃይኬ ታቺ እን» ¹⁸ ናንዳካኦ ታቺ እን ሃእንካ ጎሺዬ እሺ ኤምኑ ዬ፤