¹ ولما فتح حمل الفداء الختم السابع رجع هدواء بالسماء لمدة نص ساعة. ² وشفت السبعة الملائكة موقفين قدام الله، وقد جابوا لهم سبعة أبواق.

³ وجاء ملاك ثاني ومعه مبخرة ذهب ووقف عند المذبح، وجابوا له بخور كثير عشان يقدمه مع دعاء الصالحين على مذبح الذهب اللي قدام العرش. ⁴ فطلع دخان البخور من يد الملاك ومعه دعاء الصالحين إلى محضر الله. ⁵ وبعدا شل الملاك المبخرة وملئه من النار اللي على المذبح، ورميبه للأرض، فوقع رعود وأصوات وبروق وزلزال. ⁶ وتجهزوا السبعة الملائكة اللي معاهم الأبواق، عشان ينفخوا فيبها.

⁷ ولما نفخ الملاك الأول ببوقه، خرج برد ونار مخلوطين بدم فسقطوا لفوق الأرض، فحرق ثلث الأرض وثلث الشجر وكُل الحشيش المخضر.

⁸ ولما نفخ الملاك الثاني ببوقه، فخرج من البحر نفس جبل كبير مولع بنار، ورجع ثلث البحر دم، ⁹ ومات ثلث المخلوقات الحية اللي بالبحر، وثلث السفن اتحطمن.

¹⁰ وبعدا نفخ الملاك الثالث ببوقه، ففلت من السماء نجم كبير نفس شعلة النار، ونزل لفوق ثلث الأنهار ومنابع الماء. ¹¹ والنجم هذا اسمه "العلقم" ورجع ثلث الماء مُر نفس العلقم، وماتوا ناس كثير لأنوهم شربوا من الماء المُر.

¹² وبعدا نفخ الملاك الرابع ببوقه، فوقعت ضربه لثلث الشمس وثلث القمر وثلث النجوم، فثلث ضوئهن طفي، وكمان النهار طفي ثلث ضوئه، وكمان الليل.

¹³ وشفت بالرؤيان نسر يطير بوسط السماء وسمعته يصيح بصوت قوي: "يا ويلكم، يا ويلكم، يا ويلكم يا سكان الأرض من اللي شيقع بكم لما الملائكة الثلاثة الباقيين ينفخوا بابواقهم!"