¹ وشفتو الخروف وهو يفُك أول ختم من الأختام السبعة،وسمعتو واحد من الحيوانات الأربعة يصيح بصوت مثل الرعد:" تعال !" ² فشفتو قدامي حصان أبيض، واللي راكب فوقه معه قوس، وفوق راسه تاج،وخرج منتصر وعشان ينتصر.

³ وبعدين فتح الختم الثاني، سمعتو الحيوان الثاني يقول:" تعال !" ⁴ فخرج حصان أحمر،واللي راكبه فوقه معه سيف كبير، وله القدرة إنو ينزع السلام من الأرض ويخلي الناس يتقاتلوا بينهم البين.

⁵ ولما فكّ الختم الثالث سمعتو الحيوان الثالث يقول :" تعال !" فشفتو قدامي حصان أسود، واللي راكب فوقه بيده ميزان. ⁶ وسمعتو صوت من بين الحيوانات الأربعة يقول:" ثمن بُر بدينار،وثلاث أثمان شعير بدينار،أما الزيت والخمر لا تلمسهم."

⁷ وبعدين فكّ الختم الرابع ،سمعتوصوت الحيوان الرابع يقول :" تعال !" ⁸ فشفتو قدامي حصان لونه أخضر باهت، واللي راكب فوقه اسمه "الموت" ويمشي بعده حصان ثاني اسم اللي راكب فوقه "الهاوية"، ومعهم سلطة يقتلوا ربع سكان الأرض بالسيف والجوع والوباء والحيوانات المتوحشة.

⁹ وبعدين فكّ الختم الخامس، شفتو مذبح تحته أرواح اللي قُتلوا من شان كلمة الله، والشهادة اللي شهدوها، ¹⁰ وكانوا يصيحوا بصوت قوي:" يا رب يا سيد يا قدوس يا حق ، متى بتعاقب أهل الأرض على اللي عملوه فيبنا؟ متى شتنتقم منهم لدمائنا؟" ¹¹ فحصل كل واحد منهم ثوب أبيض، وقال لهم يصبروا قليل لما يكتمل عدد أصحابهم العبيد واخوانهم اللي بيقتلوا مثلهم.

¹² وبالرؤيا، لما فكّ الختم السادس، تزلزلت الأرض بعنف، والشمس رجعت سوداء كأنه خِرقة من شعر،ورجع القمر أحمر مثل الدم، ¹³ وسقطت نجوم السماء للأرض مثلما يتساقط التين اللي موش ناضج من الشجرة، لما تهزها ريح قوي. ¹⁴ والسماء أتلفه مثلما لفافة الورق، واتزحزحت الجبال والجُزر كله من مكانها.

¹⁵ وملوك الأرض ،والعظماء،والقادة والأغنياءوالزعماء، والأقوياء والعبيد والأحرار، كلهم تخبئوا بالكهوف وبين الحجار اللي بالجبال، ¹⁶ وقالوا للجبال والحجار:" إسقطي فوقنا، وخبينحنا من وجه الجالس فوق العرش ومن غضب الخروف !" ¹⁷ لإنو يوم غضبه العظيم جاء، ومنو يقدر يوقف قدامه؟