¹ وبعدين سمعت صوت قوي جاي من الهيكل يقول للملائكة: "روحوا واسكبوا ذلحين فوق الأرض قلاصات غضب الله السبعة."

² فراح الملاك الأول وسكب قلصه فوق الأرض، فخرج من الأرض قروح خبيثة توجع على الناس اللي عليهم علامة الوحش واللي سجدوا للتمثال حقه.

³ وبعدين سكب الملاك الثاني قلصه فوق البحر، فرجع البحر دم نفس دم الميت، وكل المخلوقات الحية اللي بالبحر ماتن.

⁴ وبعدين سكب الملاك الثالث قلصه فوق الأنهار وعيون الماء، فرجعت كلها دم. ⁵ وسمعت ملاك الماء يقول: "حكمك عادل يا إلهنا القدوس الكائن واللي كان، ⁶ فالناس قا سفكوا دم الصالحين والأنبياء، أنت جبت لهم دم يشربوا وهذا جزاءهم." ⁷ وسمعت ملاك المذبح يقول: "نعم، يا رب يا إلهنا القدير، حكمك عدل وحق."

⁸ وبعدين سكب الملاك الرابع قلصه فوق الشمس، فأعطيت أنوه تحرق الناس بحرارتها. ⁹ فالناس احترقوا من الحرارة القوية، بس ما تابوش لتمجيد الله، زادوا لعنوا اسم الله المتحكم بهذه المصائب.

¹⁰ وبعدين سكب الملاك الخامس قلصه فوق عرش الوحش، فرجعت ممكلة الوحش ظلام دامس، فالناس جدموا لساسينهم من الوجع. ¹¹ ولعنوا رب السماء من وجعهم وقروحهم وما تابوش عن اللي يعملوه.

¹² وبعدين سكب الملاك السادس قلصه بنهر الفرات الكبير، فجفف الماء حقه ورجع طريق للملوك الجائين من الشرق. ¹³ وبعدين شفت ثلاثة أرواح نجسة شكله نفس الضفادع، خارجة من فم التنين، ومن فم الوحش، ومن فم النبي الكذاب. ¹⁴ والأرواح هذه هي أرواح شيطانية تقدر تصلح معجزات، وتروح لعند ملوك العالم كله وتجمعهم عشان الحرب بهذيك اليوم العظيم، يوم الله اللي يقدر على كل حاجة.

¹⁵ "كما أنا جاي نفس جية السارق، هنيت للي شيكون منتظرنا، سهران وحارس للثياب حقه، حتى ما يمشيش عريان والناس تشوف العوره حقه."

¹⁶ والأرواح الشيطانية جمعت كل ملوك العالم بمكان اسمه بالعبرية "هرمجدون".

¹⁷ وسكب الملاك السابع قلصه بالهواء، وجاء صوت قوي من العرش اللي بالهيكل يقول: "كل شيء قا حصل" ¹⁸ ووقع رعود وبروق وأصوات وزلزال قوي ولا قا وقع بالأرض هذه من يوم خلق الإنسان بالأرض، لإنو كان قوي زيادة. ¹⁹ والمدينة اتقسمت ثلاثة أقسام، ومدن الأمم ادمرن، والله ما نسيش بابل العظيمة، فسقيها قلص مليانة خمر غضبه وغيظة. ²⁰ والجُزر كلهن اختفت، والجبال اختفت، ²¹ وسقط من السماء لفوق الناس برد كبير، كل بردة وزنه بحدود خمسين كيلو جرام، والناس لعنوا الله بسبب البرد، لإنو المصيبة كانت كبيرة.