¹ وبعدين شفت خروف الفداء واقف فوق جبل صهيون، ومعه مية وأربعة وأربعين ألف شخص مكتوب على جبهتهم اسمه واسم أبوه. ² وبعدين سمعت صوت من السماء يشبه صوت شلال ماء كثير ومثل صوت الرعد القوي. والصوت اللي سمعته نفس صوت اللي يعزفوا موسيقى على قيثاراتهم. ³ وكانوا يغنوا أغنية جديدة قدام العرش وقدام الأربع الكائنات الحية والشيوخ. ولا واحد قدر يتعلم هذه الأغنية ماعدا المية وأربعة وأربعين ألف اللي قا فداؤهم من العالم. ⁴ فهاذوم ما نجسوش أنفسهم مع النسوان، فهم طاهرين. ويتبعوا خروف الفداء أي مكان يروحوا به، وقا حصل فداؤهم من بين الناس عشان يكونوا بكر لله ولخروف الفداء. ⁵ وما كذبوش بأفواههم، ولا فيبهم عيب. ⁶ وبعدين شفت ملاك ثاني يطير بوسط السماء ومعه بشارة أبدية يبشر فيبها كل اللي يعيشوا على الأرض، من كل أمة وقبيلة ولغة وشعب. ⁷ ويقول بصوت قوي: "اتقوا الله وسبحوه، قا جاء يوم الحساب، اعبدوا اللي خلق السماء والأرض والبحر وعيون الماء."

⁸ وبعدين تبعه ملاك ثاني يقول: "سقطت، سقطت بابل العظمى اللي سقت كُل الأمم من خمر فسقها اللي تجيب الغضب."

⁹ وبعدين تبعهم ملاك ثالث ويصيح بصوت قوي: "كل اللي عبدوا الوحش وتمثاله واخذوا علامة فوق أيديهم أو جبهتهم، ¹⁰ لابد لهم بيشربوا من خمر غضب الله الموش مخففة المسكوبة بقلص غضب الله، وشيقاسوا عذاب النار والكبريت قدام الملائكة الطاهرين وقدام خروف الفداء. ¹¹ ودخان عذابهم شيتصاعد لأبد الآبدين. وما فيش راحة بالنهار والليل للي عبدوا الوحش وسجدوا للتمثال حقه وقبلوا علامة اسمه. ¹² وهنا يُبان صبر الصالحين اللي يعملوا بوصايا الله ويؤمنوا بيسوع."

¹³ وبعدين سمعت صوت من السماء يقول: "اكتب: هنيت للميتين اللي يموتوا من ذلحين وهم مؤمنين بالمسيح، والروح يقول: نعم، فيرتاحوا من تعبهم، لأنو الأعمال حقهم تتبعهم." ¹⁴ وبعدين شفت سحابة بيضاء جالس فوقها واحد يشبه ابن الإنسان، فوق رأسه تاج ذهب وبيده شريم حاد. ¹⁵ وخرج ملاك ثاني من الهيكل ويصيح بصوت قوي: "جيب شريمك واصرب. قا جاء وقت الصراب، ومحصول الأرض قا نضج." ¹⁶ والجالس فوق السحابة رمي بشريمه للأرض فصربت الأرض.

¹⁷ وبعدين خرج ملاك ثاني من الهيكل اللي بالسماء، وكان معه شريم حاد. ¹⁸ وبعدين خرج من المذبح ملاك ثاني له قدرة على النار، وصيح بصوت قوي للي معه الشريم الحاد وقله: "جيب شريمك الحاد، واقطف عناقيد العنب من شجرة العنب، فالعنب قا نضج." ¹⁹ فرمي الملاك بشريمه لفوق الأرض وقطف العناقيد العنب وطرحها بمعصرة غضب الله العظمى ²⁰ خارج المدينة ودعست المعصرة بالأرجل لما خرج الدم من المعصرة حتى ارتفع لعند رؤوس الخيل، ولمسافة بحدود مئتين ميل.