2 لكم الكثير من النعمة والسلام بمعرفة الله وربنا يسوع المسيح. 3 فالله بقدرته الإلهية، جاب لنا كُل اللي نحتاج له بهذه الحياة وتقوى الله، فهو عرفنا بالمسيح اللي دعي لنا بمجده وفضله. 4 وبمجد وفضل المسيح جاب الله لنا بركات عظيمة وغالية اللي قاكان وعدنا فيبه، عشان يكون معانا نصيب بالطبيعية الإلهية، وعشان نتجنب الفساد الموجود بالعالم اللي تجيبه الشهوة.
5 فعشان هذا، اعملوا كُل طاقتكم عشان تزيدوا لإيمانكم صلاح، وإلى صلاحكم معرفة، 6 وللمعرفة العفة، وللعفة صبر، وللصبر تقوى، 7 وللتقوى مودة أخوية، وللمودة الأخوية محبة. 8 لو الحاجات الحلوة هذه هله بداخلكم وتزداد بكثرة فيبكم، شتخليكم نشيطين وناجحين، وشتخليكم تعرفوا ربنا يسوع المسيح أكثر. 9 واللي ما فيبش هذه الحاجات الحلوة، فهو بصره قصير وأعمي روحياُ، وقا نسي انوه الله طهره من الذنوب حقه الأوله.
10 عشان هذا يا إخواني، خليكم مجتهدين كثير، عشان تثبتوا فعلياً أنوه الله قا دعي لكم واختاركم صح. ولو أنتم تعملوا كذا ما شتسقطوش نهائياً. 11 وشتحصلوا ترحيب قوي لما تدخلوا للملكوت الأبدي لربنا ومنقذنا يسوع المسيح. 12 عشان هذا شأكون اذكركم كُل وقت بهذه الحاجات، مع انوكم عارفين فيبهن وثابتين بالحق اللي قبلتموموه. 13 فانا أشوف أنوه لابد عليا انبهكم ما دام عادنا عايش بهذه الحياة. 14 فانا عارف اننا شأمشي من هذه الحياة بالوقت القريب، نفس ما سبق وقلي ربنا يسوع المسيح. 15 وعشان هذا انا اعمل كُل طاقتي فاذكركم بهذه الحاجات، عشان تذكروهن كُل وقت بعد ما أموت.
16 واحنا لما قلنا لكم عن قوة ربنا يسوع المسيح وانوه شيرجع، ما تبعناش خرافات كذب، فاحنا شفنا مجده بعيوننا. 17 فهو قد حصل من الله الآب مجد وكرامة، لما كلمه العلي العظيم بصوته وقله: "هذا هو ابني الحبيب اللي شيفرحني كُل فرح." 18 وقد سمعنا الصوت جاء من السماء لما احنا وهو كنا فوق الجبل المقدس.
19 وهذا يأكد لنا أكثر أنوه اللي قاله الأنبياء صحيح. فلوسمحتم انتبهوا للي قالوه، فهو مثل لمبه مضيئه بمكان غدره، لوقت ما يطلع النهار ويظهر نجم الصبح بقلوبكم. 20 ولا بد تعرفوا قبل كُل حاجة، أنوه ما فيش نبؤة بالكتاب جاءت من تفسير نبي من رأسه. 21 لانوه ما فيش نبؤة جاءت بطلب الإنسان، فالنبوءات كُلهن جاءن من رجال الله الصالحين والروح القدس هو اللي خليهم يتكلموا بكلام الله.