¹ من الشيخ يوحنا، إلى السيدة اللي الله اختاره وإلى أولاده اللي احبهم بالحق، وموش انا وحدي أحبهم، فكُل اللي يعرفوا الحق. ² لأنوه الحق ثابت فيبنا، وشيكون معانا للنهاية. ³ لتكون معاكم النعمة والرحمة والسلام من عند الله الآب والرب يسوع المسيح ابن الآب بالحق والمحبة.

⁴ فرحت كثير لما لقيت من أولادك يعيشوا بطريق الحق مثلما وصانا الآب. ⁵ والآن يا سيدتي معي طلب أطلبه منك يكون في بينتنا البين محبة، وهذه مش وصية جديدة اكتبه لكم، فالوصية هذه هله من أول. ⁶ فالمحبة اللي انا اقصده، نعيش حسب وصايا الله. وهذه هي نفس الوصية اللي سمعتمومي من أول: خلوا حياتكم محبة.

⁷ فالعالم اصبح فيبه مليان ناس خداعين وما يعترفوش بأنوه المسيح جاء للأرض بجسم بشر، فاللي يفعل هذا هو الخداع وعدو المسيح. ⁸ فخليكم منتبهين عشان ما يضيعش اللي تعتبتم فيبه، عشان تحصلوا أجركم كُله. ⁹ اي واحد يخرج عن تعاليم المسيح وما يتبعش وصاياه، فهو ما يتبعش الله. واللي يتبع تعاليم المسيح، فيكون له الاثنين الآب والابن. ¹⁰ ولو واحد جاء لكم بتعليم غير تعليم المسيح، ما تستقبلوش ببيتكم، وما تسلموش علوه. ¹¹ لأنوه اللي يسلم علوه، يكون مشارك له بالأعمال الشريرة.

¹² معي حاجات كثيرة اشتي اقلكم فيبها، بس ما شتيش اكتبه لكم بالقلم والورق. فانا اشتي ازوركم واشوفكم واكلمكم من وجهي لوجهكم، عشان فرحتنا تكتمل. ¹³ أولاد اختك اللي اختارها الله يسلموا عليك.