¹ يا احبابي، ما تصدقوش اللي يقول انوه يتكلم بالروح، فانتم اختبروا كلامه عشان تعرفوا انوه من الله. لانوه هذه الأيام قاكثروا الأنبياء الكذابين. ² وكذا تعرفوا روح الله: كُل نبي يعترف بانوه يسوع المسيح جاء للأرض بجسم إنسان فهو من عند الله. ³ وكُل روح ما يعترفش بالمسيح، فهو موش من عند الله. فهذا هو روح عدو المسيح اللي سمعتم فيبه انوه شيجي، وهذه الأيام هله بالعالم.

⁴ يا أولادي الغاليين، انتم هزمتم هاذوم لأنكم تطيعوا الله، ولانوه الروح القدس اللي فيبكم أقوى من إبليس الموجود بهذا العالم. ⁵ فهاذوم الأعداء من العالم هذه، وكلامهم يجي من العالم هذه، وأهل العالم يستمعوا لهم. ⁶ أما احنا نتبع الله، ويسمعنا اللي يعرف الله، واللي ما يعرفش الله ما يستمعش لنا، وكذا نقدر ان نفرق بين روح الحق وروح الضلال. ⁷ يا احبابي، لابد علينا نحب بينتنا البين، لانوه المحبة تجي من الله. وكُل اللي يحب يكون ابن لله ويعرف الله. ⁸ واللي ما يحبش، ما يعرفش الله، لانوه الله محبة. ⁹ والله قد وارنا محبته بأنوه رسل ابنه الوحيد للعالم عشان نحيي فيبه. ¹⁰ واحنا نشوف المحبة الصح، موش انحنا احببنا الله، فالله هو اللي احببنا، ورسل ابنه عشان يضحي فيبه للذنوب حقنا. ¹¹ يا احبابي مادام الله قا احببنا هذه المحبة القوية، فلابد علينا احنا كمان نتحابب بينتنا البين.

¹² ولا واحد شاف الله نهائياً، بس لو كنا نحب بينتنا البين، فالله شيحيي بداخلنا، ومحبته شتكتمل فيبنا. ¹³ واحنا نعرف انحنا نثبت بالله، والله يثبت فيبنا، لانوه جاب لنا من روحه. ¹⁴ واحنا شاهدين أنوه الآب قا رسل ابنه للعالم عشان ينقذنا، لانحنا شفنه.

¹⁵ واللي يعترف أنوه يسوع هو ابن الله، فالله يثبت فيبه، وهو يثبت بالله. ¹⁶ واحنا عارفين ومصدقين أنوه الله يحبنا. الله محبة، واللي يثبت بالمحبة، يثبت بالله، والله يثبت فيبه. ¹⁷ وكذا شتكون محبة الله قاهي كاملة بداخلنا، فننتظر يوم الحساب واحنا واثقين، لانحنا مثل المسيح بالمحبة واحنا بهذا العالم. ¹⁸ وما فيش خوف بالمحبة، فالمحبة المكتملة تبعد كُل خوف. لأنوه الخوف يجي من العقاب، واللي يخاف شتكون المحبة حقة ما تكتملش.

¹⁹ فاحنا نحب لأنوه الله حبنا من أول. ²⁰ واللي يقول أنوه يحب الله، ولاكن يكره اخوه، فهو كذاب. لأنوه اللي ما يحبش اخوه اللي يشوفوه، كيف يقدر يحب الله اللي مشافش. ²¹ والله قا وصانا وقلنا: "اللي يحب الله، فهو يحب اخوه كمان."