¹ Kabili Lesa aishile kulanda aya mashiwi yonse ati: ² ''Ninebo Yaweh Lesa wenu, uwamifumishe mu calo ca Egypto, mung'anda ya busha. ³ Wila kuba na tulesa tumbi pa cinso candi. ⁴ Wilakuipangila iyfakubasa nangu icimpashanya conse icaba mu mulu pa mulu, nangu icaba mwisamba lya calo, nangu icaba panshi ya menshi. ⁵ Wilakufukama kuli fyena nangu ukufishinshimuna, pantu nebo ne Yaweh Lesa wenu nine Lesa wakalumwa. Uuletela abana ukukandwa pa mulandu wakubifya kwaba wishibo, paba nkulo ya kulenga butatu ne nkulo ya kulenga bune ishakuli abo bampata. ⁶ Lelo ndalanga icitemwiko kuli icitapwa kubamakana abo bantemwa no kusunga ifipope fyandi. ⁷ Wilakulumbula ishina lyakwa Yaweh Lesa obe, apatali nangu kamo, pantu Yaweh takalekepofye uyo onse uulumbula ishina lyakwe apafye. ⁸ Ulekwibukisha ubushiku bwe sabata, ku kubusunga ubwamushilo. ⁹ Ulekubomba no kucita imilimo yobe yonse munshiku mutanda. Lelo ¹⁰ ubushiku bwakulenga cine lubali lisabata lyakwa Yaweh. Pali ubu bushiku tekuti ububombemo umulimo onse, webo nangu abana bobe abaume, nangu abana bobe abanakashi, nangu fitekwa fyobe, nangu mweni uuli mu myenshi yenu. ¹¹ Pantu munshiku mutanda Yaweh alipangile imyulu ne calo, na bemba, na fonse ifyaba muli fyena, el alitushishe pa bushiku bwa kulenga cine lubali. Eco Yaweh aishile kupala ubushiku bwe sabata no kubucita ubwa mushilo. ¹² Ulekucindika wiso na noko, pakuti ukekale inshiku ishingi mu calo ico Yaweh Lesa akokupela. ¹³ Wilakwipaya. ¹⁴ Wilakucita bucende. ¹⁵ Wilakwibila uuli onse. ¹⁶ Wilakupela ubunte bwabufi pa mwina mupalamano obe. ¹⁷ Wilakukumbwa ng'anda ya mwina mupalamano obe; wilakukumbwa umukashi wa munobe, umubomfi wakwe umwaume, umubomfi wakwe umwanakashi, ing'ombe yakwe, panda wakwe, nangu conse ico icili ca mwina mupalamano obe.'' ¹⁸ Abantu bonse babwene ukupaata ne myele ya nkuba, no kumfwa iciunda ce penga, elo babwene no lupili lukofutumuna icushi. Ulo ba cimwene, balikututuma ku mwenso elo no kutalama ukutali. ¹⁹ Baishile kulanda kuli Mose ati, ''ulekulanda kuli fwebo na ifwebo twakulaumfwa; lelo wilekuleka Lesa alekulanda kuli fwebo, pantu kuti twafwa.'' ²⁰ Mose aishile kulanda ku bantu ati, ''Mwitina, pantu Lesa eshile kukumyesha pakuti akatina kakuli Lesa kabe muli mwebo, kabili pakuti tekuti mubembuke.'' ²¹ Eco abantu batalemefye apatali, elo Mose ailekupalamina kwikumbi lyakufitulukila umwali Lesa. ²² Yaweh aishile kulanda kuli Mose ati, ''Ifi efyo ubebe abena israeli: Mwebo mwebene muli bwene ifyo naisakulanda na mwebo ukufuma ku mulu. ²³ Mwilakuipangila tulesa ukupashanya kuli nebo, tulesa twa silfere nangula tulesa twa golide. ²⁴ Mufwile mwampangila ubulambo bwe loba, elo mukepailepo amalambo yenu aya cabupe cakoca, icabupe cakwa mpana, impaannga elo ne mbushi shenu elo ne ng'ombe shenu. Muncende monse umo nalenga ishina lyandi ukucindikilwamo, nkesa kuli mwebo no kwisa kumipaala. ²⁵ Nga mwankulila ubulambo bwa mabwe, tekuti mukulile na mabwe ayakubaswa, pantu ngamwabomfya icakubashilako kuli cena, ninshi ubulambo bukakowela. ²⁶ Kabili pakuya ku bulambo bwandi tekuti munine pa matabo, pakuti pa bwamba bwenu pe boneka.'''