¹ Hin nayadi ya allo nin pama-inawa boy nagumpisa ha unang allo nin linggo, hi Maria Magdalena boy miha et ya Maria ay nilako la nin hinlik ya lebengan. ² Etpanan ya atsi, main nin makhaw ya layon, ta inumaypa ubat ha langit ya anghel nin Panginoon, nilumateng boy intulid ya bato nikno ya na babo nin bato. ³ Ya kalupa na ay kapadihas nin kimat boy ya duloh na ay emen napatso ya yelo. ⁴ Kinidihan hila ha limo ya ampi pamantay ya ngali lan ikamatsi. ⁵ Kinatutol nin anghel ya bawbabayi boy hinabi kol-la ya, "Paan kaw malimo, ta tanda koya an tsikapin moyo hi Apo Hesus ya inpako ha kudos. ⁶ Ayen yay na bayde, no-ag nibangon ya kapadeho nin hinabi na mita kaw baydi hilkin moyo ya lugal nin kinamatyan nin Panginoon. ⁷ Parahin muyo ta habyen moyo ha taw tagahunol na, 'Ya hiya ay nibangon ubat ha lebengan nangamatsi manlingi kaw, hiya ay muna kumoyo ha Galilea. Ta baydo ay mahilek moyoy manlingi kaw.' Manlingi kaw, nahabi koyna kumuyo." ⁸ Nag-apudah nag-alih ya baw babaye ha pinami-ilbingan ya main nin limo boy malhay ya kahiglawan boy nipamwayo taen habyen la na taw-tagahunol. ⁹ Et panin hinambal hila ni Apo Hesus ya ampaghabi, "Ambatiin ka taw" boy dinumani ya baw babaye, tinalan laya bitsina boy nanduko hila kona. ¹⁰ Hin nayadi hila nin nanduko. Paan kaw malimo, mita kaw ta habyen moyo ha paw patel ko ya maglako hila ha Galilea. Ta baydo ay mahilik lako." ¹¹ Hapaeg habang ya baw babaye ay papalako, ya kanayon ya ampipamantay ay maglako ha malhay ya banwa ta habyen ha pinakamatag-ay ya padi ya kaganawan nin nangyadi. ¹² Napitsi-tsipon ya paw padi kalamo paw-pantuawen biha pinahahabyan la ya nangyadi baydo, Nam-ih hila nin malhay ya alaga ya kwalta ha kaw kawal ¹³ biha hinabi la kol-la, "Habyen moyu ha kaatag, 'Naglako ya kahunol ni Apo Hesus hin yabi la ya bangkay ha kapel-han naan ang kabilew.' ¹⁴ Nu nakalateng ha gobernador ya habaytsi ya balita, ay aghila nin malimo ta hilaynay ba-ala." ¹⁵ Kabay kinwa nin kaw kawal ya kwalta boy hinunol nu hino ya in-utuh kol-la ay habytsi ya balita ay napada nin nibanwag ha haw Judio angga hapaeg. ¹⁶ Pedu ya labing-miha ya taw tagahunol ay naglako ha Galilea, ha bakil ya intudo ni Apo Hesus kol-la. ¹⁷ Hin hiya nahilek la, sinamba la ya pedu nag-alangan ya kaatag. ¹⁸ Nilako hila ni Hesus biha naghabi ya kol-la boy hinabe, "Ing-gwa kungko ya kaganawan nin kapangyarihan ha langit boy ha luta. ¹⁹ An-ihugo kataw nin dyagen moyu nin taw tagahunol ya kaganawan nin bansa. Bautismuhan moyo hila ha ngalan nin Bapa Nakapanyag, Anak, biha Espirito Santo. ²⁰ Tuduan moyo hila nin humunol ha kaganawan nin inturo ko kumuyo. Boy pakaling-en moyo, hiko ay pirmin kalamo moyo angga ha kahuyutan nin mundo."