Para o director do coro. Masquil para os fillos de Coré ¹ Ó Deus!, cos nosos ouvidos ouvimos, os nosos pais contáronnos as obras que fixeches nos seus días, en tempos antigos. ² Ti, coa túa man botaches fora as nacións e a eles plantáchelos; aflixiches os pobos e a eles fichéchelos medrar. ³ Pois non tomaron nen posuíron a terra pola súa espada nin os salvou o seu brazo, senón a túa destra e o teu brazo, e a luz da túa presenza porque te agradaches neles. ⁴ Ti es o meu rei, ó Deus!; manda vitorias a Xacob! ⁵ Contigo rexeitaremos os nosos adversarios; no teu nome pisaremos os que se nos opoñen ⁶ Porque eu non confiarei no meu arco nin a miña espada me salvará; ⁷ pois ti salváchesnos dos nosos adversarios e confundiches os que nos aborrecen. ⁸ Gloriámonos no Señor todo o día e por sempre, louvaremos o teu nome. ⁹ Porén ti rexeitáchesnos e confundíchesnos, e non saes cos nosos exércitos. ¹⁰ Fasnos recuar ante o noso adversario e os que nos odian tomáronos como despoxos. ¹¹ Entrégasnos como ovellas para ser devorados e espalláchesnos entre as nacións. ¹² Vendes o teu pobo a baixo prezo e non te enriqueciches co seu prezo ¹³ Fixéchesnos o oprobio dos nosos veciños, escarnio e burla dos que nos rodean. ¹⁴ Ti posnos por proverbio entre as nacións, os pobos abanean a cabeza sobre nós. ¹⁵ Cada día a miña deshonra está sobre min, e a vergoña cobre a miña face, ¹⁶ pola voz de quen me afrenta e deshonra, pola presenza do inimigo e do vengativo. ¹⁷ Todo isto nos aconteceu sen te ter esquecido, sen faltarmos ao teu pacto, ¹⁸ Non se volveu atrás o noso corazón, nin se apartou dos teus vieiros, ¹⁹ para que nos quebrantaras no lugar da aflición, e nos cubriras coa sombra da morte. ²⁰ Se nos esquecéramos do nome do noso Deus, ou erguéramos as mans a un deus alleo, ²¹ non se decataría o Señor diso? Pois el coñece os segredos do corazón. ²² Pero pola túa causa mátannos a cotío, considérasenos como ovellas para matar. ²³ Esperta! Por que dormes Señor? Érguete, non nos rexeites para sempre.

²⁴ Por que agachas a túa face e te esqueces da nosa aflición e da nosa opresión? ²⁵ Por que a nosa alma se fundiu no po? e o noso corpo pegado á terra? ²⁶ Érguete! Sé a nosa axuda, e líbranos pola túa misericordia.