¹ خداوند کی پہلی تقریر تب خُداوند نے کلام کر کے تُند طوفان میں سے اَیُّوبؔ سے کہا کہ۔ ² یہ کون ہے ۔ جو نادانی کی باتوں سے علم کو تارِیک کرتا ہے؟۔ ³ اپنی کَمر باندھ اَور مَرد بن۔ مَیں تُجھ سے سوال کرُوں گا۔ پس تُو مُجھے جَواب دے۔ ⁴ تُو کہاں تھا جب مَیں نے زمین کی بُنیاد رکھّی تھی؟ تُجھ میں سمجھ بوجھ ہے تو بتا تو بِیان کر۔ ⁵ کِس نے اُس کے پیمانے رکھّے اگر تُو جانتا ہے۔ یا کِس نے اُس پر ساہول کھینچی؟ ⁶ کونسی چیز پر اُس کی بُنیادیں رکھی گئیں یا کِس نے اُس کے کونے کا پتّھر رکھّا؟۔ ⁷ جِس وقت صُبح کے سِتارے مِل کر گاتے تھے اَور خُدا کے فرزند خُوشی سے للکارتے تھے۔ ⁸ کِس نے سمُندر کو دروازوں سے بند کِیا۔ جس وقت کہ وہ گویا رحِم سے نِکل کر پُھوٹ پڑا؟ ⁹ جب مَیں نے بادلوں کو اُس کا لباس اَور تارِیکی کو لپیٹنے کا کپڑا بنایا۔ ¹⁰ اُس وقت جب میں نے سُمندر کے لئے اپنی سرحد کا نشان لگایا تھا۔ ¹¹ اَور کہایہاں تک تُو آئے گا اَور آگے نہ بڑھے گا۔ اَور یہاں تیری موجوں کا زور ٹُوٹے گا۔ ¹² کیا تُو نے اپنے ایّام میں صُبح پر حُکم کِیا ہے یا فجر کو اُس کی جگہ بتائی ہے؟۔ ¹³ کہ وہ زمین کے کِناروں کو پکڑ لے اَور شریر وہاں سے نکال دیئے جائیں گے۔ ¹⁴ وہ ایسے بَدلتی ہے جیسے مُہر کے نیچے چِکنی مَٹی۔ اَور گویا لباس پہنےہُوئے نُمایاں ہو جاتی ہے۔ ¹⁵ اَور شریروں سے اُن کی روشنی لے لی جائے گی۔ اَور بڑھایا ہُؤا بازُو توڑ دِیا جائے گا۔ ¹⁶ کیا تُو سمُندر کے پانی میں داخِل ہُؤا ہے یا گہراؤ کی نیچلی سطح پر چلا ہے؟۔ ¹⁷ کیا مَوت کے دروازے تیرے لئے کھولے گئے ہَیں یا تُو نے مَوت کے سائے کے پھاٹکوں کو دیکھا ہے؟ ¹⁸ کیا تُو نے زمین کی وُسعت کو سمجھ لِیا ہے؟ یہ سب کُچھ جانتا ہے تو بتا۔ ¹⁹ کہ روشنی کےمقام کا کونسا رستہ ہے اَور تارِیکی کی جگہ کہاں ہے؟۔ ²⁰ کیونکہ تُو ہر چیز اُس کی حد تک لے جا سکتا ہے؟۔ اَور تُو اُس کے مسکِن کی راہیں جانتا ہے۔ ²¹ بےشک تُوجانتا ہے۔ کیونکہ تب تُو پیدا ہُؤا تھا۔ اَور تیرے ایّام کا شُمار وسیع ہے۔ ²² کیا تُو برف کے مَخزنوں میں داخِل ہُؤا ہے؟ یا تُو نے اَولوں کے خزانوں کو دیکھا ہے؟۔ ²³ جنہیں مَیں نے تکلیف کے وقت کے لئے اَور لڑائی اَور جنگ کے دِن کے لئے رکھّا ہُؤا ہے ۔ ²⁴ کِس رستے سے روشنی پھیلتی اَور مشرق کی ہَوا زمین پر تقسیم ہوتی ہے؟ ²⁵ کِس نے مینِہ کے سیلابوں کےلئے نالیاں اَور رَعد کی بجلیوں کےلئے راہیں مُقرّر کی ہیں؟ ²⁶ تاکہ اُس زمیں پر مینِہ برسائے جہاں اِنسان نہیں۔ اَور بِیابان میں جہاں آدمی نہیں۔ ²⁷ کہ وِیران اَور سُنسان جگہ سیراب ہو جائے اَور سبز گھاس سُوکھی زمین سے اُگ پڑے۔ ²⁸ کیا میِنہ کا کوئی باپ ہے یا کِس نے شبنم کے قطروں کو پیدا کِیا ہے؟ ²⁹ یخ کِس کے شِکم سے نِکلی اَور آسمان کا پالا کِس سے پیدا ہُؤا ہے؟ ³⁰ جب پانی پتّھر کی مانند ہو کر چُھپ جاتے ہَیں۔ اَور سمُندر کی سطح مُنجمد ہو جاتی ہے۔ ³¹ کیا النعش کو زنجیروں سے جکڑ سکتا یا جبار کی رسیوں کو کالعدم کر سکتا ہے؟ ³² کیا تُو وقت پر زُہرہ کو نِکال سکتا ہے یا دَبّ کی اُس کے بچوں کے ساتھ ہدایت کر سکتا ہے۔ ³³ کیا تُو افلاک کے قَوانین کو جانتا ہےیا اُن کا اِقتدار زمین پر قائم کر سکتا ہے؟ ³⁴ کیا تُو اپنی آواز بادِلوں تک بُلند کر سکتا ہے۔ تاکہ پانی کی فراوانی تُجھے چُھپا دے؟ ³⁵ کِیا تُو بجلی کے تیروں کو روانہ کر سکتا ہے اور کیاوہ تُجھے کہہ سکتے ہیں کہ ہم حاضر ہیں۔ ³⁶ کون بادلوں میں حِکمَت رکھتا ہے یا کِس نے دُھند کو فہم بخشا؟ ³⁷ کون اپنی عقل سے بادلوں کو گِن سکتا ہے اَور کون آسمان کی مشَکوں کو اُنڈیل سکتا ہے؟ ³⁸ جب گرد مِل کر تودہ بن جاتی ہے۔ اَور ڈھیلے باہم لپِٹ جاتے ہَیں۔ ³⁹ کیا تُو شیرنی کے لئے شِکار مارے گا اَور شیر بچّوں کی بُھوک کو سِیر کردے گا؟ ⁴⁰ جب وہ اپنی غاروں میں چُھپے رہتے ہَیں۔ یا جھاڑیوں میں گھات لگا کر بیٹھتے ہَیں۔ ⁴¹ جنگلی کَوّے کے لئے کون خُوراک تیاّر کرتا ہے؟ ب اُس کے بچّے خُدا کے پاس چلّاتے ہَیں۔ اَور خُوراک کے نہ ہونے سے اِدھر اُدھر پھرتے ہَیں۔