¹ ضوفر کی تقریرتب ضوفر نعماتی نے جَواب دیا۔ ² کیا اِن بہت سی باتوں کا جَواب نہ دیا جائے۔ اَور کیا بکواسی آدمی راست ٹھہرایا جائے؟ ³ کیا تیری لاف زَنی سے لوگ چُپ رہیں اَور جب تُو ٹھٹّھا کرتا ہے تو تُجھے کوئی شرمِندہ نہ کرے۔ ⁴ تُو کہتا ہے۔ کہ میری تعلیم دُرست ہے اَور مَیں تیری نِگاہ میں پاک ہُوں۔ ⁵ لیکن کاش! خُدا ہی بولے۔ اَور تُجھے جَواب دینے کے لئے اپنے لب کھولے۔ ⁶ اَور حِکمَت کے راز تُجھے بتائے۔ کیونکہ اُس کی تاثِیر گو ناگُوں ہے۔ پس تُو جان لے۔ کہ خُدا نے تیرے گُناہوں کے لئے تیرے ساتھ نرمی کی ہے۔ ⁷ کیا تُو خُدا کی گہری باتوں کو سمجھتا ہے۔ یا قادرِ مُطلِق کے خیال کوپُہنچتا ہے۔ ⁸ وہ افلاک سے بلند ہے۔ پس تُو کیا کرے گا؟ وہ پاتال سے زیادہ گہرا ہے۔ پس تُو کیا جانے گا؟ ⁹ اُس کا اندازہ زمین سے زیادہ لمبا اَور سمُندر سے زیادہ چوڑا ہے۔ ¹⁰ اگر وہ گرِفتار کرے اَور قید میں ڈالے اَور ظاہراً فیصلہ کرائے تو کون اُسے روک سکتا ہے؟ ¹¹ کیونکہ وہ بے ہودہ آدمیوں کو جانتا ہے اَور شرارت کو دیکھتا ہے۔ تو کیا اُس کے خیال نہیں کرتا۔ ¹² لیکن بے عقل جان کو تب سمجھ آئے گی جب گورخر کا بچّہ اِنسان پیدا ہو گا۔ ¹³ لیکن اگر تُو اپنا دِل دُرست کرے اَور اپنے ہاتھ اُس کی طرف پھیلائے۔ ¹⁴ اگر اُس بَدی کو دُور کرے جو تیرے ہاتھ میں ہے۔ اَور ناراستی کو اپنے خَیمہ میں رہنے نہ دے۔ ¹⁵ تب تُو اپنے چہرہ کو بے عیب اُٹھائے گا۔ اَور تُو ثابت قدم ہو گا۔ اَور نہ ڈرے گا۔ ¹⁶ اَور اپنی خستہ حالی کو بُھول جائے گا۔ یا اُسے گُزرے پانی کی طرح یاد کرے گا۔ ¹⁷ تیری زِندگی دوپہر سے زیادہ روشن ہوگی اَور تیری تارِیکی فجر کی مانند ہو گی۔ ¹⁸ اَور تُو مُطمئین رہے گا کیونکہ اُمّید وہاں ہو گی۔ اَور اپنے چوگِرد دیکھ دیکھ کر چَین سے سوئے گا۔ ¹⁹ اَور تُو آرام کرے گا۔ اَور تُجھے کوئی نہ ڈرائے گا بلکہ بُہتیرے تیرے سامنے مِنّت و سماجت کریں گے۔ ²⁰ لیکن شریروں کی آنکھیں دُھندلا جائیں گی۔ اُن کے لئے بھاگنے کو بھی رستہ نہ ہو گا۔ اَور دَم دے دینا ہی اُن کی اُمّید ہوگی۔