¹ Ti piree kan Buluj, shookno Kiriti Yeesho, mo yeena shii in yooni mo an kaawi, birang in wak shii longku kpaalo po shinnyi Yen tomonno Yamma. ² Shinnyi Yen Tomonno Yamma ye deewaanku milan yau ti fok me an-pigrani, kaa ye ballii ti ta ballan paarono Yamma me shaana. ³ Shinnyi Yen Tomon tene ti Ku Laani Yeesho Kiriti Fo-mina. Kaa ye shii po peenno Dauda. ⁴ Pene kaa ye ti bi shaana Shoomni kunnga kan shii Laano Yamma birang in kumi kan shii ka kumen kping ti bi ilitni ti ta duwo. ⁵ Ti piree kan Kiriti Yeesho birang kan longku shommoni ye ne weyaan kunngu kan yee shiwo la an shuran longku nen ye memme ti shakki memme ku-buk ding longku shinui in min kumanju kan murku. ⁶ We te taa kama, ma me Yamma yeyaa ma man shiwo ma sheeno Yeesho Kiriti. ⁷ We war shik me ti Rooma ding me Yamma leka kan in ye shinui mo yooju memmeni me shaana: Kunngu kan twaalan shaari ye ti piree kan Yamma Fomu kama birang kan Fo-mina Yeesho kiriti mo deeju ti kuuma. ⁸ Ka toom, Ne pammaa ti Yamma ti piree kan Yeesho Kiriti longkuuma ma ding, longku ti Ku sheero pi lishaari ma ti koo tong ti ku-buk. ⁹ Longku Yamma ye Ne ti Ku yuun shuran ti shii ka poshaarino dok ti bi kpaalo po shinnyi Ye Tomon we Laani, shii jimrono ye ya Ne ti sha toom ka sheero pirma. ¹⁰ Koddi ye ding Ne ta forin fok. Ne ti beng Yamma na, maa nyimmo sheeni, daa ta yooro yaau, nen we koddi wende nen waru shikma. ¹¹ Longku ne ti Ku dalak nen we shik ma, longku nen min ma manni kunngu shoom ye tei ta pee shik ma. ¹² Nyimmonoi tene, kaman pee shik shaayi, na nen pee ma shik ma ka lishaarino, ma sheema man peeno shikno ka sheema. ¹³ Ma molonno, ne leka man peni a sho dok ye ne nyimmaa war shik mam, pene sho gbe, (pene we foottu wende beelono foki), longku warannoi kulang nen kasshani ti taama kaa ye ne yuwaa ti shakki dogi mei Yawudaawam. ¹⁴ Ka tirano koo nong ti kuuno, she mei Yawudaawa kan me biino, kan she me shen kan she me dili. ¹⁵ Tenei ye na ne leka kping nen sheeroma shinnyi Yen Tomon, ma sheema me ti Rooma. ¹⁶ Shinnyi Yen Tomon te a we duulo-shik ti piree kan nem, longku tei kumenno Yamma ye tei ti warin koo nong mo kunnga waraa we marku, ka toom ti Yawudaawa ka bi ti mei Yawudaawam. ¹⁷ Longku ti piree kan shii ye ti shuklo diyo dob ti piree kan lishaari we war lishaari, kaa ye ballii ya, "Mo dob-dob ti piree kan lishaari, ta yooni kan dwei." ¹⁸ Longku tenei ye ti shukullu denno Yamma ti ku-dang, ti ku mei ti shi Yammam kan piire shuran memme me ti nummo ku kulli ka piire shuranju. ¹⁹ Longkunno te, wee ta dum penani ti ku shuranno Yamma ti kudam ti shikju, longku Yamma po kuunii ye shuklaan ti shinui. ²⁰ Longku kaa we po penani ti kuuno Yamma kan kumenni ye po-ding, a wee ta dum we shiki ka adom, pene yau ye kpiinan ku-buk shukilla we te ti kudam, ti dum jemlani ti ku wee kpiina ti shik wee kpiina. Longkuuno te, memme a kan manni koko po yippo dom! ²¹ Kaa ye shinui penaa Yamma, kaa tei shinui a shokro shii ti po sherini kaa Yammam. Kan ye kaa teerei, nang nyimmojui in yooro waani, poshaariju yei ti penim, in yooju dil. ²² Kaa ye shinui teka ya shinui me an shen, pene shinui mei peno wem. ²³ Shinui in paaroku shokranno Yamma yei ti murim ka yemman biro ye kaa pelle adeewe, kan we-ta-gun, kan po peen ma kuret kan she angojo, ²⁴ Longkunno te, Yamma in min shinui ta yuyyo peen piire dalak poshaariju, kan lo-shikju birang shinui in ti ya we duulo-shik ti shaayi. ²⁵ Shinui shigan kullino Yamma in yooro shaba. Shinui in ti wawi ti wee kpiina, birang shinui in ti yuun shuran ye daa shinui yuwaai ti Mo an kpiya po kuuni, shi mo fooraa in shokro shii po-ding. Mo yooro kaa te. ²⁶ Longkuuno te, Yamma in min shinui ka yuyyo we dalak ye ti li duulan shik. Sherebju in paaroku kpomit shwiji kan paamun ye teerei dob-dob kaa ye yuunan ti kpiyan ku-buk, shinui in shiwon kpomit yei yu dob-dobum. ²⁷ Kaa we te birang sheranku paarojui in shar nyimmojui, nang shwiji in dai po kpomani kan shereb ye teerei ye dob-dob kaa ye kpiinan. Shwiji kan shereb shinui in ti yuyyo we duulo-shik, kaa we te shinui in yeeru kelmo ti kuuju ye yuwaa dob-dob kan piire shuranju. ²⁸ Kaa ye shinui kuraaju deeju kan penanno Yamma, nang Yamma in min shinui ti ta piire nyimmo, kulang shinui in ya wee a nenno in yam. ²⁹ Shinui kemii kan kenni ya ween kpang ding, kan shek, kan gawa, kan piire nyimmo. Shinui kemii kan mwisshi, kan tuk niyo, kan nee, kan piire shubet, kan ding poshaari. Shinui me an sheero-shik. ³⁰ Me an mal-fok, me an kura Yamma, me an kuwak, me an kpir ku, me an leu kuuju, me an nyimmo ya shek, mei ti yaaro fok me an pariju kan munin gbam. ³¹ Shinui a kan nyimmon kpangum, a ti kem deewankuujum, a kan lewanum, kan mei ti ya kunngom. ³² Shinui penaa shorono Yamma ye ya ding mo ti yuyyo peen we te, nenna muro, pene a bara ya we te ye shinui ti yuyyina waanim, birang shinui sheeju ti dau gun peddi me an yuyyo ween shurme.