¹ So kiyapasad inin, si Jesus na gumiyanat ah sumiyong sa ripag ah ragat ah Galilea, ah p'tawag'n p'n ah Ragat oh Tiberias. ² Tanto ko madak'l ah p'tundog ron kagiya miya-ilay iran so mga pinggalb'k iyan ko adn ah mga sakit iyan. ³ Tumiyabid si Jesus ko kilid oh palaw agu miyuntod p'd iyan so mga sugu-suguan iyan. ⁴ (Imanto dii ka kanduri oh mga Judio na mgaan dn). ⁵ So kiyapamagilaylay eh Jesus na miya-ilay niyan so madak'l ah taw ah muobay ron, pitharo iyan ki Felipe,"Anda tano maka pamasa sa paan ka on maka khan ah mga taw aya? ⁶ (Uway na pitharo bu aya eh Jesus ka p't'p'ngan iyan si Felipe, kagiya katawan iyan ko ginawa niyan eh suwaan iyan.) ⁷ Sumimbag si Felipe rkiyan," So paan ah arga ah duwa ka dinar na di p'thuon ko uman eh isa kataw apya mbagi-mbagian sa mga iito." ⁸ Isa ko mga sugo-sugoan, si Andres, pagari eh Simon Pedro, na pitharo iyan ki Jesus, ⁹ "Ad'n ah wata saya ah adn ah lima ka putos eh paan agu duwa timan ah sda, uway na dabun aya sa laged aya kadak'l ah taw?" ¹⁰ Pitharo eh Jesus," Paka untuda niyu so mga taw." (Imanto na madak'l ah utan sa kag'g'n'khan iran uto.) Na miyuntod so mga taw, mga lima ngibu. ¹¹ Agu kinuwa eh Jesus so paan agu ko maka pasad manalamat na mingi pamgay niyan ko kipaka uuntod. Samakawto bun so sda, taman sa kabaya iran. ¹² Ko mausig so mga taw, pitharo iyan ko mga sugo-sugoan iyan," timo ah niyo so mga sama ka para di kawlaan." ¹³ Na tinimo iran agu miyapno so sapulo agu duwa ah taguay ah sama bu matag oh lima b'k's ah paan - so mga mga sama ah miyaka phuon ko miykama khan dn. ¹⁴ Agu ko maylay oh mga taw so mga tanda ah pinggal'bk iyan, pitharo iran," giyaya eh bnar ah nabi ah pakhawma sa dunya." ¹⁵ Ko masag'npa eh Jesus ah psung rkiyan so mga taw kagiya p't'g'l'n iran skiyan ah mambayoy ah datu, na miniwaan iyan skiran agu tumiyabid ko palaw ah skiyan bu. ¹⁶ So kiyagagawii niyan, so mga sugo-suguan na miyaba ka sung ko linaw. ¹⁷ Miyagda siyan sa awang, ah ipripag sa ragat ah psung sa Capernaum. (Gagawii dn uto na da kiran sung si Jesus). ¹⁸ Imanto, na miyaka bag'r so samb'r sa ragat ah kiyaphoonan ah mga ala ah bag'l. ¹⁹ Agu ko maka sagwan so mga sugu-suguan sa mga duwapulo agu lima o t'lopulo ka istadya, miya-ilay iran si Jesus ah plalakaw ko puro oh ragat ah psung kiran, agu kiyalkhan siran. ²⁰ Uway na pitharo iyan kiran,"Saki aya, di kano p'khal'k." ²¹ So kiyapasad uto na tiyarima iran ko awang, agu magaan ah kiyapaka-uma iran ko sungan iran. ²² So kiyapita iyan, miya-ilay oh kadaklan ah tumitind'g ko ripag ah ragat ah daba p'd ah awang ruwar ko iisa agu si Jesus na naba ron mamagda ah p'd iyan so mga sugu-suguan iyan, ka su bo so mga sugu-suguan iyan matag. ²³ (Kagiya, ad'n bun ah mga awang ah miyaka phoon sa Tiberias marani ko eng'd ah kiyanan iran ko mga paan ko kiyapaka panalamat iran ko kadnan.) ²⁴ So kiyatukawi oh kadaklan ah si Jesus agu so mga sugu-suguan iyan na daa roo, na miyagda siran mambo sa awang agu sumiyong sa Capernaum agu piyangilay iran si Jesus. ²⁵ So kiyapasad iranon mangilay na miyatoon iran ko sabala ah linaw, pitharo iranon, "Rabi, kano eh kiyasung ka saya? ²⁶ Sumimbag kiran si Jesus, "Bnar baa, piyangilay ako niyo, naba kagiya miyaka ilay kano sa mga tanda, ka kagiya miyamaka khan kano sa phaan agu miyanga uusog kano. ²⁷ upha kano gagalb'k ka para bu sa mga kakhan ah p'kabinasa, uway na galb'k kano para ko mga kakhan ah taman sa taman ah imbgay rakiyan oh wata oh taw, kagiya inibgay oh kadnan so mga t'ndo iyan rkiyan. ²⁸ Pitharo iran rkiyan, "Antunaa eh mapiya ah suwaan ami, ka on ami masuwa so ikasusuat oh kadnan?" ²⁹ Sumimbag si Jesus, "Giyaya na baal oh kadnan: na samabaa niyu so mingi sugo iyan. ³⁰ Na pitharo iran rkiyan, " Samawto na antunaa eh tanda ah kailay ami agu maka pangimbnar kami rka? Antunaa eh suwaan ka? ³¹ Kiyan oh mga paloksloksan ami so mana sa ilang, laged oh misusurat, "Bigan iyan skiran sa paan ah miyaka phoon ko langit ka on iran makhan." ³² Sumimbag si Jesus kiran, "Bnar baa, naba si Moises eh p'm'bgay rkano sa paan ah paka phoon ko langit, sapad sa so ama akn eh pamgay sa paan ah pakha-phoon ko langit. ³³ Kagiya so paan ah pakha-phoon ko langit agu paka bgay sa niyawa ko dunya. ³⁴ Na pitharo iran rkiyan, "Kadnan, isditi kami nga dn p'mbigi sa paan aya." ³⁵ Pitharo eh Jesus kiran, "Saki so paan ah niyawa, sadn sa moobay raki na did,n kagutman agu sadn sa mangingimbnar raki na didn mawaw taman sa taman. ³⁶ Kagiya, pitharo ko rkano ah miya-ilay ako niyo, uway na dakano bu pangimbnar. ³⁷ Langon eh imbagay raki oh Ama na pagubay raki, agu sadn sa pagubay raki na naba ko pamugawn. ³⁸ Kagiya saki na miyaba phuon sa langit, Naba baya oh ginawa akn ka baya ah ginawa oh sumusugo rak'n. ³⁹ Ago giyaya eh kabaya oh sumiyugo raki, ah da khada ah langu'an oh inib'gay raki, ka aya kinang'lan na mitimbawaw siran ko mauri ah alungan. ⁴⁰ Kagiya giyaya eh kabaya oh ama akn. na sadn sa phakailay ko wata ago mangingim'b'nar r'kiyan na kab'gan sa niyawa ah da taman iyan ago paguyag'n akn skiyan ko muri ah alungan. ⁴¹ Ko kiyapasad iyan na miyamag'tunga so mga Judio makapuon r'kiyan kagiya ko pitharu iyan, "Saki so paan ah miyababa phuon sa langit." ⁴² Pitharu iran, K'naba mangaday aya si Jesus ah wata eh Jose, ah katawan tano antaa e ama ago ina iyan? Angkaino niyan map'tharu, 'Saki na miyababa ako phuon sa langit'?" ⁴³ Sumimbag si Jesus, Pitharu iyan r'kiran, "Upha'e niyo sa ginawa niyo ah kapamagtunga anan sa ginawa niyo." ⁴⁴ Da ped ah taw ah pakaubay rak'n aya tabiya na phakaubay'n raki eh Ama a sumusugo raki, ago iphuro akn s'kiyan sa mauri ah alungan, ⁴⁵ Giyaya na misusurat ko mga propeta, Siran langon na pamanduon oh kad'nan. ' Langon oh umaniisa ah miyamakin'g ago miyamakasuwa sa Ama na pakaubay raki. ⁴⁶ K'naba langon na miyalay niyan si Ama, aya tabiya na s'kaniyan na miyakapuon ko Kad'nan - miyalay niyan d'n so Ama. ⁴⁷ Phiyur baa, so mangingib'nar na ad'n a niyawa niyan sa da tamanan iyan. ⁴⁸ Saki so paan ah niyawa. ⁴⁹ Kiyan oh mga apu-apuan iyo so manna sa ilang ago siran na miyamatay. ⁵⁰ Giyaya so paan ah miyaka phoon sa langit, ka sadn sa taw ah kuman saya na di patay. ⁵¹ Saki so niyawa paan ah phoon sa langit. Sadn sa kuman sa paan aya na, kawyag taman sa taman. So paan ah imbagay akn na giya ginawa akn para ko dunya. ⁵² So mga Judio na miyangarirido agu mipapawala, ah di iran dii taroon, "Panon eh kimbgan ah taw aya ah giya giyana niyan ka on tano makhan? ⁵³ Agu pitharo kiran eh Jesus, "Bnar baa, aya tabya na kh'n iyo so ginawa akn ah wata ah taw agu paginum'n iyo so rugo iyan, naba kano kab'gan sa niyawa sa mga ginawa niyo. ⁵⁴ Sad'n sa taw ah kuman raki agu minom ko rugo akn na ad'n ah niyawa niyan taman sa taman, agu paguyag'n skiyan sa muri ah alongan. ⁵⁵ Kagiya so ginawa akn na bnar ah khakan, agu rugo ak'n na bnar ah kainom. ⁵⁶ Sadn sa kuman agu minum ko rugo akn na sisii raki dn istidi, agu saki rkiyan. ⁵⁷ Laged oh niyawa oh Ama ah sumiyogo raki, agu laged akn ah miya uyag miphoon ko Ama, sadn sa kuman raki na kawyag miphoon raki. ⁵⁸ Giyaya so paan ah miyaba miyaka phoon ko langit, naba laged oh kiyan oh mga loks iyo agu miyamatay. Sadn sa kuman sa paan aya na kawyag taman sa taman. ⁵⁹ Pitharo eh Jesus giyaya ah mga katharo ko di niyan di kapamangdao sa Capernaum. ⁶⁰ So kiyapasad iran aya man'g ko kadaklan ko mga sugo-suguan, pitharo iran, "Giyaya na mar'g'n ah pamangdaowan; antaa managaday eh tarima saya?" ⁶¹ Kagiya katawan eh Jesus ko ginawa niyan ah so mga sugu-suguan niyan na ddi mbibitiyarae miphoon saya, pitharo iyan kiran, ba aya rkano miyaka sakit? ⁶² Samawto, na panon oh mayly niyo so wata oh taw ah p'tabit ko kiyaphoonan iyan? ⁶³ So Espirito na aya pamgay sa niyawa. Daba labot ron oh lawas. So mga bityara akn rkano na langoon dn Espirito, agu giyaya na mga uyag uyag. ⁶⁴ Makin p'n mawto na adn ah pd rkano ah naba mangingimbnar." Kagiya katawan eh Jesus miphoon sa phoonan antaa so mga naba mamaratiyaya rkiyan agu antaa so mga p'tipo ron. ⁶⁵ Pitharo iyan, "Kagiya pitharo mo rkano ah daba raki pakha ubay aya tabya na indingan skiyan oh Ama. ⁶⁶ Mapasad aya, madak'l ko mga sugu-suguan iyan ah kimiyasoy agu da lalakaw ah p'd iyan. ⁶⁷ Na phitaro eh Jesus ko sapolo agu duwa, "Naba niyu kabaya mawa? diba?" ⁶⁸ Simbag skiyan eh Simon Pedro, Kadnan, anda kami song? Ska so adn ah mga katharo iyan ah niyawa ah da tamanan iyan, ⁶⁹ agu skami na miyangimbnar agu kiyatukawan ami ah ska so kadnan." ⁷⁰ Pitharo eh Jesus rkiran, "Naba ko skano piyamili, ah sapulo agu duwa, agu so isa rkano na maratha eh adat?" ⁷¹ Imanto na pitharo iyan so makaphoon ki Judas ah wata eh Simon Iscariote, sabap sa skiniyan so isa ko sapulo agu duwa ah tuminipo ko Jesus.