¹ Vuchili muka va kele navuo va Yunda? Na lukulu muka lua ku mukanda? ² Evi via chili mungila yoshe. Chakulivanga, va Yunda kova thselelele na kujombolola kua Kalunga. ³ Nga vati cho Vayunda vamo ko va kele na luthselelo? Kujeneka kuthselela kuavo kuatha kunonaho kuthselela kua Kalunga. ⁴ Keti vika kale. Te nga, Kalunga vamu uane kukala vucili, nambe mukukala nguavo nkala muntu muka vishaki. Ngue muva vithona, "Nguavo citava vakulekethe kukala uakushungama majui ove, na yove lalo ukathambue mukaya ku mpangulo. ⁵ Vunoni nga kuyeneka kujela kuetu kusholola kujela kua Kalunga, vika vituatha kuhandekako? Kuatha tuhandeke nguetu Kalunga kajelele muku neha vukalu vuendi kuli yetu? (Ange njili na kupangetha vimpata via vuntu.) ⁶ Keti vikakale! Amba ngoco vati Kalunga muaka pangula kaye? ⁷ Nga vushunga vua Kalunga muvishaki viange vuhana kushangala kuakama kuliendi, vika nolo viva nji panguila ngue muka vupi? ⁸ Vika viakujenekela kutumbula, ngue mova tuvangeya kutuhandeka, na vimo vituketava kuhandeka, "Lingeni tupange vupi, linga vucili vuije"? Kupangula kuavo hasha. ⁹ Vika hani? Tuli nakuliamena etu vanenia? Kuahi. Mukonda tua vangeya laja voshe va Yunda na vaNgelengu, voshe, mu kukala mu vupi. ¹⁰ Evi ngue mova vithona: "Kokuethi uashungama naumo uahi, keti nambe umo. ¹¹ Naumo uahi ua vikuatele mana. Naumo uahi uathetelele Kalunga. ¹² Voshe vana tengulukila kuako. Voshe kumo vanakala vimantu viangoco. Naumo uahi a kapanga viacili, kuahi, keti nambe umo." ¹³ Milivu yavo mbumbo ya kushokoloka. Vindaka viavo viakuitha. vushungu vua manoka vuakala kuinthsi lia milomo yavo." ¹⁴ Tunua tuavo tuashula na kuthinga na kushasha." ¹⁵ Mianja yavo yathiua muku mbalumuna maninga. ¹⁶ Kutangula na kayando viakala muvingila viavo. ¹⁷ Vantu ava kanda vezhive ngila ya chiyulo." ¹⁸ "Kukuethi liova lia Kalunga kulutue lua mesho avo." ¹⁹ Ngechi tunezhiva nguetu evi vioshe vio a tumbula mashiko, a handeka na vaje vali muithsi lia mashiko. Evi kulingila nguavo tunua tuoshe vaka tuholuethe, na lifuti lioshe vaka likundike kuli Kalunga. ²⁰ Kulingila mukonda yahi Nthsitu yovakamena muvipanga via mashiko mumesho endi. Mukonda mumashiko muneja vutumbe vua vupi. ²¹ Vunoni kunonako Mashiko vushunga vua Kalunga vana vulingitha vavuizhive. Evi viakele vukaleho ku mashiko na vaPolofeto, ²² ovio, vushunga vua Kalunga mu kuitava muli Yesu Kilistu ku voshe vetava. Mukonda kokuethi kutepetha. ²³ Mukonda voshe vavulumuna na ku jeneka vumpahu vua Kalunga, ²⁴ oshe vanavamena nakuzhituka ha kavumbi kuhitila mu ku tundithilaho chakecho muli Kilistu yesu. ²⁵ Keho Kalunga uahanene Kilistu Yesu ngue vushunga mukuitava mumaninga endi. Ua hanene Kilistu mukupua vukaleho vua kujeneka kahangu kuendi, mukonda kujeneka kutanta vupi vuakunima kuendi ²⁶ mukuthimpa kuendi. Evi vioshe viatholokele mu ku leketha vushunga hanthsimbu yino yamualolo. Vioshe lika muku leketha nguvo endi kahanguile, na kuleketha nguavo endi akamena muntu woshe a thselele muli Yesu. ²⁷ Kuiko hani kuli kulihametha? Vana kuthiko. Mukonda vika? ha vipanga? Kuahi, vunoni ha chitume cha kuthselela. ²⁸ Tumanetha hani nguetu muntu vamuamena ha kuthselela kunonako vipanga via mashiko. ²⁹ Ndi Kalunga yendi Kalunga ua va yunda lika? Keti yakeye lalo Kalunga ua vakavifuti? Mukemo, na vaka vifuti navo. ³⁰ Nga, mukemo, na kujeneka kulovoka mu ku thselela. ³¹ Keho tunonaho hani mashiko mukonda lia kuthselela ndi? Keti vikakale! Vunoni, tujelula mashiko.